DILEJAN DIA 54
Chisend cha “Kashalapol Ushinshamena ni Kubabal”
Yesu ndiy udia Mutu wa chikumangen cha win Kristu. (Efes 5:23) Nlel, kudiokal mwiur Yesu ukat kuyitakel in kwilejend adia pa divu kusutil “kashalapol ushinshamena ni kubabal.” (Tang Mateu 24:45, TMK.) Mulong amutonda kud Yesu amwinend, “kashalapol” winou wafanyina kwikal ni ulabu kanang pakwez wafanyina kand kudandamen kwikal kashalapol wa Kristu ni kuyisadin akadivar nend a Kristu. Kashalapol winou ndiy nany? Ni mutapu ik utubangidinay?
1. Nany udia “kashalapol ushinshamena ni kubabal”?
Yisu yivud Yehova wasadinang ikundj umwing ap chisak cha amakundj mulong wa kuyitakel antu end. (Malakiy 2:7; Hebereu 1:1) Kupwa kwa rufu ra Yesu, atwimbuy ni amakurump a mu Yerusalem awiy asambisha kutakel. (Midimu 15:2) Chawiy, mud muchading pa chisu chinicha, nlel kachisak kakemp ka amakurump—katazukinau anch Chisak Chitakedila cha Atuman a Yehova—kakat kupan yakudia ya mu spiritu ni kutakel mudimu wa kulejan. Chisak chinech chawiy chitazukinau anch “kashalapol ushinshamena ni kubabal, watekau [kud Yesu]” (Mateu 24:45a, TMK) Akadivar awonsu adia mu Chisak Chitakedila ad in Kristu azizidilau many, ni achingedin kuyikel pamwing ni Kristu mu Want wa mwiur anch afa panap pansh.
2. Yakudia ik ya mu spiritu yipaniningay kashalapol ushinshamena?
Yesu walonda anch kashalapol winou wafanyina “kuyangen [in Kristu akwau] yakudia pa chisu chiwanyidina.” (Mateu 24:45b) Mud mukata yakudia kutukwash kwikal akash ku mujimbu ni mu manangu, yakudia ya mu spiritu, charumburik anch mafundish madia mu Dizu dia Nzamb—yikat kutwinkish usu tukweta nich kuswir mulong wa kushal ashinshamena kud Yehova ni kuwanyish mudimu watwinkishau kud Yesu. (1 Timote 4:6) Tukat kutambul yakudia yiney ya mu spiritu kusutil yikumangan, yitentam, pamwing kand ni mikand yimedina pa Bibil ni mavideo yitukwashina kutesh nawamp rusot ra Nzamb ni yikasikeshina urund wetu ni Yehova.
ILEJA CHIKURIKINA
Tal mulong wak tukwet kuswir kwa “kashalapol ushinshamena ni kubabal”—Chisak Chitakedila.
Chisak Chitakedila chikat kupan yakudia ya mu spiritu, umutakel, ni kuyikwash Atuman a Yehova pa mangand mawonsu
3. Antu a Yehova afanyidin kwikal arijekinau
Kusutil umutakel wa Yesu, Chisak Chitakedila chikat kurijek mudimu wa Atuman a Yehova. Ditenchik mud dined diadingaku kand pakach pa in Kristu akusambish. Talany VIDEO.
Tang 1 Korint 14:33, 40, kupwa isambinany chipul ech:
Maverse minam mamekeshin mutapu ik anch Yehova ukatin anch Atuman end ikala arijekinau?
4. Kashalapol ushinshamena ukat kutenchik mudimu wetu wa kulejan
Kulejan rusangu ruwamp wawiy mudimu wa usey nakash wasalau in Kristu akusambish. Tang Midimu 8:14, 25, kupwa isambinany yipul ey:
Nany watakelang mudimu wa kulejan pakach pa in Kristu akusambish?
Mutapu ik wasalau Pita ni Yohan patambulau umutakel wa atwimbuy akwau?
Kulejan rusangu ruwamp wawiy mudimu wa usey nakash utenchikinau kud Chisak Chitakedila. Talany VIDEO.
Yesu wakasikeshina pa usey wa kulejan rusangu ruwamp. Tang Marko 13:10, kupwa isambinany yipul ey:
Mulong wak Chisak Chitakedila chikwatin nich usey nakash mudimu wa kulejan?
Mulong wak tukwet kuswir kwa “kashalapol ushinshamena ni kubabal” mulong wa kutenchik mudimu winou usadikina pa mangand mawonsu?
5. Kashalapol ushinshamena ukat kupan umutakel
Chisak Chitakedila chikat kupan umutakel kud in Kristu pa mangand mawonsu. Mutapu ik chikata kukwat mipak piur pa umutakel wa kupan? Tal mutapu wasalau mwamu kud chisak chitakedila cha in Kristu akusambish. Tang Midimu 15:1, 2, kupwa isambinany yipul ey:
Mulong ik walangwisha kupwitamijan pakach pa in Kristu amwing akusambish?
Kwisu kwayau Paul, Barnabas, ni akwau mulong wa kupwish mulong winou?
Tang Midimu 15:12-18, 23-29, kupwa isambinany chipul ech:
Kurutu kwa kukwat mupak, chisak chitakedila chakusambish chashinshikina yom ik chisu chading chikimbinau umutakel wa Nzamb pa mulong winou?—Tal verse wa 12, 15, ni 28.
Tang Midimu 15:30, 31 ni 16:4, 5, kupwa isambinany yipul ey:
Yom ik yasalau in Kristu akusambish patambulau umutakel udiokila ku chisak chitakedila?
Yehova wayukisha mutapu ik kuziyin kwau?
Tang 2 Timote 3:16 ni Jakobu 1:5, kupwa isambinany chipul ech:
Nlel, kwisu kukuta Chisak Chitakedila kukimb umutakel kurutu kwa kukwat mipak?
ANCH MUNTU WAKWEL ANCH: “Anch walondul umutakel wa Chisak Chitakedila, uyilondwil kwey an a antu.”
Yom ik yikwinkishina ey kashinsh anch Yesu utakedin Chisak Chitakedila?
YOM TWILEJA KAL
Chisak Chitakedila ndiy “kashalapol ushinshamena ni kubabal” watondau kud Kristu. Chikat kupan umutakel ni yakudia ya mu spiritu kud in Kristu pa mangand mawonsu.
Ov, uvurikin?
Nany wamutonda “kashalapol ushinshamena ni kubabal”?
Chisak Chitakedila chikat kutubangin mutapu ik?
Ov, witiyijin kamu anch Chisak Chitakedila ndiy “kashalapol ushinshamena ni kubabal”?
JINGUNIN KAND
Tal mutapu Chisak Chitakedila chirijekina midimu yach.
“Chisak Chitakedila cha Atuman a Yehova Chom ik?” (Mutu wa mulong udia pa jw.org)
Jingunin mutapu Chisak Chitakedila chisadining usu mulong wa kwikal nich kashinsh anch tutambwil yakudia yiwamp ya mu spiritu.
Mutapu ik ukatau akadivar a mu Chisak Chitakedila kuman mudimu wayinkishau kusal kud Yesu?
Yikumangan ni yitentam yetu yimekeshin mutapu ik anch Yehova ukat kutakel Chisak Chitakedila?