End Ni Nzamb Mu Yisu Yiney Yivundangena

“Enok wenda pamwing ni Nzamb, chad kwinyim kamekanap, mulong Nzamb wamusenda.”—DISAMBISHIL 5:24.

1. Yom ik yimwing ya yisu yetu yiyikadishina yikash?

YISU yivundangena! Mazu minam marumburil nawamp mivu yakad rongoj ni ya chisum yimenau antu kudiosh kwavadikina Want wa Umesia mu muvu wa 1914. Mu chisu chinech chawonsu, antu adi mu “machuku ma kwisudiel.” Mar mud tumungun, misong, kuzal kwa divu, ni jinjit yiyikwatin mu chilik chimwing chijim. (2 Timote 3:1; Kujingunik 6:1-8) Yom yiney yiyikwatin ni antu amwifukwidila Yehova. Mu chilik chijim ap chikemp, etu awonsu tukat kurish nich mar ni mikadil yakad kuchingejin ya mu mangand ma katat. Mikadil yikash ya ekonomi, kanvundangesh ka chipolitik, chisum, ni mayej yidi yimwing ya yom yikadishina mwom ukash nakash.

2. Yipopok ik yikatau kurish nich atushalapol a Yehova?

² Chikwau kand, atushalapol avud a Yehova ajijamen mu kuzengol kwa mutapu ni mutapu chidandamedinay Satan kwas njit nau antu “akata kulam yijidik ya Nzamb ni kusend uman wa Yesu Kristu.” (Kujingunik 12:17) Chakin, ap anch etu awonsu kand kal atuzengolap, in Kristu akin awonsu afanyidin kurish nend Satan Djabul ni spiritu ubudishinay pakach pa antu. (Efes 2:2; 6:12) Chitin kucha ku mes chakwel kangal kwikal upwichikina nich spiritu winou, mulong spiritu winou tukat kumutan ku mudimu, ku shikol, ni ndond yin yawonsu, chawiy tufanyidin kusadil chikij ku chikij nau antu asangaredina difukwil dishitwila.

End ni Nzamb, Kangal ni Michid

3, 4. In Kristu ashalijadin nchik ni mangand?

³ Kwinyim mu mivu chitot ya kusambish, in Kristu ni yawiy ara tutaku nich spiritu wa mangand minam, ni chinech chayikadisha ashalijadina nau antu adinga pol pa chikumangen cha Ukristu. Paul wisambina kushalijan kwinoku pafunday anch: “Chinech chawiy nalonda kunishindil mu Mwant, chakwel en kangal wendany kand mudi mukat kwend in mangand mu usup wa manangu mau; akwet ronganyin ra mididim, akat kwaurik ku kupand kwa Nzamb, mulong wakad kwijik kudiau nich mulong wa kuchinchik kwa michim yau. Pashadishau muchim ipana kal ayinau mu milong ya kwimik dis, ni kusalijok yom yawonsu yijondila nich maku.”—Efes 4:17-19.

⁴ Mazu minam marumburil kamu patok mididim ya muspiritu ni ya ngikadil ya mangand minam—pa dichuku dia Paul ni mu machuku metu! Mud mu mivu chitot ya kusambish, ilel unou in Kristu kakatap ‘kwend mud mwendilau in michid.’ Pakwez, itapidil dilau dijim dia kwend pamwing ni Nzamb. Chakin, antu amwing akutwish kwipul anch chidi cha manangu kulond anch antu a pansh, akad kuwanyin endil nend Yehova. Chikalap nchik mwamu, Bibil ulejen anch akutwish. Chikwau kand, Yehova uyichingejin antu asala mwamu. Mu chitot cha chinan cha mivu kurutu kwa Chirung Chetu, muprofet Mike wafunda mazu malondwila am mapepilau nich spiritu wa Nzamb anch: “Yom ik yisotilay Yehova kud ey ching usala yom yitentamina, ni kukat ranaken ni kushakam nich kwitudish mu kwend ni Nzamb wey?”—Mike 6:8, NW.

Mutapu ik ni Mulong wak Kwend ni Nzamb?

5. Ov, mutapu ik ukutwishay muntu wakad kuwanyin kwend ni Nzamb?

⁵ Ov, mutapu ik tukutwisha kwend pamwing ni mwin dikand diawonsu, Nzamb wakad kumekanang? Chakin kamu, chidiap mud mutukata kwend pamwing nau ambay netu antu. Mu Bibil, dizu “kwend” dikutwish kurumburik “kulondul mulad kanang wa kusal.”a Nich chitong chinech mu manangu, twatesh kal komb anch muntu wendila ni Nzamb ulondwil mulad kanang wa mwom watenchikay Nzamb ni umusangareshina ndiy. Kulondul mulad winou wa mwom kukat kutwikadish ashalijadina ni antu avud atwombilamu. Pakwez, kwawiy kusu kutond kumwing kuyifanyidina in Kristu. Ov, mulong wak? Kudi mayingish mavud.

6, 7. Ov, mulong wak kwend ni Nzamb yidi njil yipandakena kuwap?

⁶ Dia kusambish, Yehova udi Sakatang wetu, Musul wa mwom wetu, ni Mwin Kupan yawonsu yituswiridina mulong wa kulam mwom. (Kujingunik 4:11) Mud chibudikin, ndiy kusu ukweta mbil ya kutulej mutapu tufanyidina kwend. Chikwau kand, kwend ni Nzamb yawiy njil yimwing kusu ya mwom ya kwisakin nakash yitwishikina. Mulong wa antu endila nend, Yehova watenchika kal ditenchik mulong wa dilikishin dia chitil, ni upanin ruchingej rakin ra mwom wa chikupu. Tatukwetu mwin rukat rawonsu wa mwiur upanin kand yiyul ya manangu yiyikwashina antu endila nend kupandakan mu mwom wa katat, ikalap nchik akad kuwanyin ni ashicha mu mangand madia mu chikas cha Satan. (Yohan 3:16; 2 Timote 3:15, 16; 1 Yohan 1:8; 2:25; 5:19) Diyingish dikwau dia kwend ni Nzamb didi anch kusot kwetu kusal mwamu kuwejidin ku chisambu ni ku uumwing wa chikumangen.—Kolosay 3:15, 16.

⁷ Diyingish dia nsudiel, ni dijim nakash, pitwendila ni Nzamb, tumekeshin mutambu utwengamidina pantaliken nich mulong ujim walanka kwinyim mu chir cha Eden—mulong wa ukaleng. (Disambishil 3:1-6) Tukat kumekesh kusutil ku mwom wetu anch tudi kamu ku mutambu wa Yehova, ni pakad wom tukat kulejan anch ndiy kusu ufanyidina kwikal Mukaleng. (Kuseng 83:18) Chawiy tukata kusal kwambatan nich malembil metu anch dijin dia Nzamb aditumbish ni rusot rend risadika. (Mateu 6:9, 10) Adi in manangu mud ik antu atondina kwend pamwing ni Nzamb! Akutwish kwikal nich kashinsh anch ayil mwi njil yitentamina, mulong Yehova ndiy “kusu ukweta manangu.” Kand kal asalap chilim.—Rom 16:27, MM.

8. Mutapu ik ufanikena yisu ya Enok ni Nowa nich chisu chetu?

⁸ Ov, mutapu ik lel, chitwishikina kushakam mud in Kristu mu yisu yivundangena ni antu avud kasangaredinap kwau kumusadil Yehova? Tukutan chakul anch twayishinshikin amakundj ashinshamena a pasak, alama kushinshaman kwau mu yisu ya mar makash. Enok ni Nowa adinga aad a pakach pa amakundj inay. Awonsu aad ashakama mu yisu yifanikena ni yetwetu. Uyimp wapalangana. Mu machuku ma Nowa mangand mizula too nich chisum ni masandj. Ap mwamu, Enok ni Nowa ajijamana ku spiritu wa mangand wa pa chisu chau ni enda ni Yehova. Mutapu ik watwishau kusal mwamu? Chakwel kwakul ku chipul chinech, tukwisambin mu mutu wa mulong winou chilakej cha Enok. Mu mutu wa mulong ukulondula, tukez kumushinshikin Nowa.

Enok Wenda Pamwing ni Nzamb mu Yisu Yivundangena

9. Rusangu ik tukweta padiay Enok?

⁹ Enok wadinga muntu wa kusambish wisambidinau mu Bibil mud wenda ni Nzamb. Rusangu ra Bibil rilondil anch: “Enok wenda pamwing ni Nzamb [wakin]. Pamuvalay Metushela.” (Disambishil 5:22) Kupwa, kwinyim kwa kwisambin kulep kwa mwom wa Enok—kuwisikesh nich kulep kwa mwom wetu, wadinga wiswimp nakash mu machuku minima—rusangu rilondil anch: “Enok wenda pamwing ni Nzamb, chad kwinyim kamekanap, mulong Nzamb wamusenda.” (Disambishil 5:24) Chakin kamu, Yehova wamushemunina Enok kumudiosh mwi ngand ya aom kumutwal ku tul twa rufu kurutu in kumupompat amusala uyimp. (Hebereu 11:5, 13) Kuwejin pa maverse minam miswimp, kudi mifund yikemp mu Bibil yisambidina piur pa Enok. Chikalap nchik mwamu, kusutil ku rusangu ritukweta ni uman ukwau uvud, tukwet diyingish diwamp dia kulond anch yisu ya Enok yadinga yivundangena.

10, 11. (a) Mutapu ik wapalangana uyimp kupwa kwa wintombuj wa Adam ni Eve? (b) Uruu ik wa uprofet walejanay Enok, ni mutapu ik wakulau ku uruu wend?

¹⁰ Chilakej, tushinshikinany, mutapu wapalangana swa kwijond mu chisak cha muntu kupwa kwa Adam kusal chitil. Bibil utulejin anch Kain mwan ikundj kabuzivumu wa Adam, wikala mpongarik wa kusambish pamujipay mwanamakwend Abel. (Disambishil 4:8-10) Kwinyim kwa rufu ra chisum ra Abel, Adam ni Eve avala mwan ikundj mukwau, ni amupila anch Set. Piur pend, tutangin anch: “Niyend Set wamuvala mwan ikundj, chad wamupila anch Enosh. Winou ndiy wikala muntu wa kusambish kulembil mu dijin dia [Yehova].” (Disambishil 4:25, 26) Cha ushon, ‘kulembil mu dijin dia Yehova’ kwinoku kwadinga kuyimp.b Mivu yivud kwinyim kwa Enosh kuvadik, mwan wenday Kain wapilau anch Lamek watomba muminy mulong wa akajend aad wayileja anch wamujipa nsand ikundj wamutapa chitat. Wapana kand dibabesh anch: “Anch amufundakeshil Kain tupamp sambwad, chad Lamek akumufundakeshil tupamp makum sambwad ni sambwad!”—Disambishil 4:10, 19, 23, 24.

¹¹ Uman winou wiswimp mud chijikish cha kusambish umekeshin anch uyimp wandjikay Satan mu chir cha Eden washikija swa ku kupalangan kwa uyimp pakach an a Adam. Mu mangand mud minam, Enok wadinga muprofet wa Yehova ni mazu mend mapepidilau ma usu madi ma kusadil djat ni nlel unou. Jud ulondil anch Enok wabwaka anch: “Talany, Mwant wez kal nich tunan dikum twa aend atumbila kurumburish nich awonsu, ni kufish nich awonsu akad Nzamb ku yisalijok yau yawonsu mu mutapu uyimp wakad Nzamb, ni yom yawonsu yikash yamupompatau kumulond kudi antu akad Nzamb, akayitil.” (Jud 14, 15) Mazu minam makez kuwanyin ku Armagedon. (Kujingunik 16:14, 16) Chikwau kand, tukutwish kwikal nich kashinsh anch ap kand mu machuku ma Enok, kwadinga “antu akad Nzamb, akayitil” ova kuyip nakash pateshau uprofet wa Enok. Chadinga cha rukat kud Yehova amusenda muprofet winou chakwel kakutwishap kumusal uyimp!

Chom ik Chamukasikesha Enok Kwend Pamwing ni Nzamb?

12. Chom ik chamwikadisha Enok ushalijadina ni antu a pa chirung chend?

¹² Mu chir cha Eden, Adam ni Eve amutesha Satan, ni Adam wamubwambwila Yehova. (Disambishil 3:1-6) Mwanau Abel walondula njil yindjing, ni Yehova wasangara mulong wendendiy. (Disambishil 4:3, 4) Cha ushon, an avud a Adam kadingap mud Abel. Pakwez, Enok, wavadika kwinyim kwa yitot ya mivu, wadinga mud Abel. Kushalijan ik kwadinga pakach pa Enok ni an akwau avud a Adam? Kambuy Paul wakula ku chipul chinech pafunday anch: ‘Ku ritiy kwawiy kwamusendilau Enok, chakwel kangal amana rufu; ndiy kamekanap kand, mulong Nzamb wamusenda; mulong kurutu kwa kumusend wading nich uman wa kumusangarish Nzamb.’ (Hebereu 11:5) Enok wadinga umwing wa “chisak chijim [cha kurutu kwa Ukristu] cha atuman,” adinga yilakej yiwamp ya ritiy. (Hebereu 12:1) Ritiy rawiy ramutwishisha Enok kujijaman mu mwikadil utentamina mu chirung cha mivu 300 ni kusut cha mwom wend—tupamp tusatu kusutamu kulep kwa mwom wa antu avud ilel!

13. Enok wadinga nich ritiy ra mulad ik?

¹³ Paul wisambina ritiy ra Enok ni ra atuman akwau pafunday anch: “Ritiy rawiy kushinshik kwa yom ya ruchingej, ni kwitiyil kwa yom yakad kumekan ku mes.” (Hebereu 11:1) Inge, ritiy ridi ruchingej rikash, rengamidina pa kashinsh, anch yom yituchingejina yikez kusadik chakin. Ritiy ritin ruchingej rikash mu chilik cha kwel anch rikala nich usu pa mwom wetu. Mulad winou wa ritiy wamutwishisha Enok kwend pamwing ni Nzamb ap anch antu ashakama nend kendap ni Nzamb.

14. Ritiy ra Enok radinga rengamidin pa ronganyin ik?

¹⁴ Ritiy rakin rengamidin pa ronganyin rakin. Enok wadinga nich ronganyin ik? (Rom 10:14, 17; 1 Timote 2:4) Pakad ap chinshilend ku muchim, ndiy wijika milong yasuta mu Eden. Pamwing ap, watesha kand piur pa mutapu wadinga mwom mu chir cha Eden—chir chadinga pamwing ap chichimeken, ap anch ayikangesha antu kwandamamu. (Disambishil 3:23, 24) Wadinga wij kand rutong ra Nzamb anch an a Adam akez kwizwish divu ni kudikadish diawonsu mud Paradis winou wa kusambish. (Disambishil 1:28) Chikwau kand, Enok wasangera kamu chakin kushilamu kwa Yehova kwa kusongish Mbut yikeza kumuchany Satan ku mutu ni kupwish uyimp wadiokala ku makasu ma Satan. (Disambishil 3:15) Chakin, uprofet upepidilau wa Enok, walaminau mu buku wa Jud, wisambidin piur pa kusheshik kwa mbut ya Satan. Mulong Enok wadinga nich ritiy, twij anch ndiy wamwifukwila Yehova mud “ukez kayifut . . . awiy akata kumusot.” (Hebereu 11:6) Chawiy lel, ap anch Enok kadingap nich ronganyin rawonsu mud ritukweta, ndiy wadinga ni ronganyin riwanyidina mu chilik cha kutek dishin dia ritiy rikash. Nich ritiy mud riner, ndiy walama kushishaman kwend mu yisu yivundangena.

Imburij Chilakej cha Enok

15, 16. Ov, mutapu ik tukutwisha kulondul chilakej cha Enok?

¹⁵ Mulong, mud Enok, tusotil kumusangaresh Yehova mu yisu yivundangena yidiaku nlel, tufanyidin kwimburij chilakej cha Enok. Tuswiridin kwak ni kulam ronganyin rakin piur pa Yehova ni rutong rend. Pakwez tuswiridin kand yivud. Tuswiridin kushil ronganyin rakin riner chakwel ritakela mwom wetu. (Kuseng 119:101; 2 Pita 1:19) Tuswiridin kwikal atakedilau nich yitongijok ya Nzamb, kwikasikesh chisu chawonsu mulong wa kumusangaresh ndiy nich yitongijok ni yisal yetu yawonsu.

¹⁶ Tukwetap rusangu ra muntu mukwau wadinga ni kumusadin Yehova mu chisu cha Enok, pakwez chitwishikin anch ndiy wadinga kusu amwinend ap chid cha kachisak kakemp kadinga ni kumusadin Nzamb. Niyetu kand tudi kachisak kakemp mu mangand, pakwez chinech chituziyishinap bwat. Yehova ukez kutukwash kwikalap nchik muntu ukutwisha kutupompat. (Rom 8:31) Nich mushiku, Enok wababeshana piur pa kwez kwa disheshik dia antu akad Nzamb. Niyetu kand tukwet mushiku wa kulejan ‘rusangu ruwamp riner ra want’ kwikalap nchik dikonkuril, rupompat, ni kuzengol. (Mateu 24:14) Enok kashakamap mivu yivud mud mwashakamangau antu a pa chirung chend. Pakwez, ruchingej rend radingap mu mangand minima. Wadinga utadil mes mend pa chom chimwing chipandakena kujimb. (Hebereu 11:10, 35) Niyetu kand tutadil mes metu pa kuwanyin kwa rutong ra Yehova. Chawiy lel, tukatap kusadil mangand minam muchifanyidina. (1 Korint 7:31) Pakwez, tukat kusadil usu wetu ni mapit metu cha kusambish mu mudimu wa Yehova.

17. Ronganyin ik tukweta raburenay Enok, chad chom ik tufanyidina lel kusal?

¹⁷ Enok wadinga nich ritiy anch Mbut yashilayimu Nzamb yikez kumekan pa chisu chatekay Yehova. Pasutil kal katat mivu 2000 kudiosh kwamekena Mbut yiney—Yesu Kristu—mbut yapana difut, ni kutwanzuril njil yetwetu, pamwing nau atuman inay ashishamena a pakur mud Enok, ya kuswan mwom wa chikupu. Mbut yiney, yikadila kal katat Mwant wa Want wa Nzamb, yamwopatin kal Satan mwiur ni kumudjibwil pa divu dined, chawiy tumena riyind rawonsu er ritwombilamu. (Kujingunik 12:12) Inge, tukwet ronganyin rijim nakash kupandakanamu radingay nich Enok. El niyetu, twikala nich ritiy rikash mud radingay nich Enok. El ruchingej retu mu kuwanyin kwa yakushilamu ya Nzamb rikal nich usu pa chom chin chawonsu tusadila. Mud Enok, twendany pamwing ni Nzamb, ap anch tushich mu yisu yivundangena.

[Mazu madia kwishin kwa paj]

Ov, Mutapu ik Ukwakula?

• Kwend pamwing ni Nzamb kurumburikin ik?

• Ov, mulong wak kwend pamwing ni Nzamb yidi njil yipandakena kuwap?

• Chom ik chamutwishisha Enok kwend pamwing ni Nzamb yikalap nchik yisu yivundangena?

• Ov, mutapu ik tukutwisha kumwimburij Enok?

[Chipich chidia pa paj wa 25]

Ku ritiy, “Enok wenda pamwing ni Nzamb [wakin]”

[Chipich chidia pa paj wa 26]

Twitiyijin nich kujijaman anch yakushilamu ya Yehova yikez kuwanyin

[Chipich chidia pa paj wa 23]

Mband, ku ris ra katatuku: FAO photo/B. Imevbore; kuwupuk kwa chikumbu: San Hong R-C Picture Company