Yehova Udi Kafung Wetu

‘Yehova ndiy Kafung wam. Kinikusotip kwam chom.’—KUSENG 23:1.

1-3. Ov, mulong wak chidiap cha kushimok anch David wamwisikeja Yehova ni kafung wa amikoku?

ANCH akwit kurumburil mutapu ukatay Yehova kuyibangin antu end, ov, yom ik ukulonda? Chilakej ik ukutwisha kusadil chakwel kufanikesh nawamp kubangin kwa ranaken kuyibangidinay atushalapol end ashishamena? Pasutil kal mivu 3 000, mwant David wafunda mu kuseng kurumburil kupandakena kuwap kwa Yehova, nich kusadil chifanikesh cha mudimu wadingay ni kusal David kwisambishil kwa mwom wend.

² Padingay nsand, David wadinga kafung, chawiy lel ndiy wading wij mutapu wa kuyilam amikoku. Wading wij kamu nawamp anch amikoku, anch ayisha ayinau, akutwish kushadik swa ni akutwish kuyiy ap kuyidia kud annam ayidiany. (1 Samwel 17:34-36) Pakad kafung mwin kuyilam, kakutwishap kutan madil mau ni yakudia yau. Ku mivu ya upal wend, chakin anch David wavurika yisu yivud yasalay mulong wa kuyitakel, kuyilam, ni kuyidish amikoku.

³ Chidiap cha kushimok anch David wavurika mudimu wa ukafung pamubachikau nich mwiku wa Nzamb kurumburil kubangin kumekeshinay Yehova pad antu end. Kuseng wa 23, wafunday David, usambishin nich mazu manam: “[Yehova] ndiy kafung wam, kinikusotip kwam chom.” Tushinshikinany chakwel kutal mulong wak mazu minam madi kamu mafanyidina. Kupwa, nich ukwash wa Kuseng 23, tukuman mutapu ukatay Yehova kuyibangin in kumwifukwil end mud mukatay kafung kuyibangin amikoku end.—1 Pita 2:25.

Kwisikej Kufanyidina

4, 5. Mutapu ik murumburilay Bibil mikadil ya amikoku?

⁴ Bibil umupidil Yehova majin mavud, pakwez dijin “Kafung” didi mukach mwa majin mamekeshina ranaken nakash. (Kuseng 80:1) Chakwel kutesh nawamp mulong wak chifanyidina kamu kumutazuk Yehova anch Kafung, chidi cha usey kud etu kwijik yom yaad: cha kusambish, mwikadil wa amikoku ni cha kaad, mijikit ni ngikadil ya kafung muwamp.

⁵ Chisu chivud Bibil ukat kwisambin mikadil ya amikoku, ukat kurumburil anch ading tayad kwakul ku rukat ra kafung (2 Samwel 12:3), itudishining (Isay 53:7), ni kakwetingap usu wa kwikamunin. (Mike 5:8) Mwin kufund umwing wapita kal amikoku mivu yivud wafunda anch: “Amikoku katwishiningap kwau ‘kwibangin ayinau’ mud mukutwishau kutong antu amwing. Asotining, kuyibangin kamu nakash ni chisu chawonsu kupandakanamu mulad wa yivam yikwau.” Chakwel kupand, yitang yiney yakad usu yiswiridin kafung mwin kuyibangin.—Ezekiel 34:5.

6. Ov, mutapu ik urumburilay ndinguril umwing wa Bibil dichuku dia mudimu dia kafung wa pasak?

⁶ Mutapu ik wadinga dichuku dia mudimu dia kafung wa pasak? Ndinguril umwing wa Bibil urumburil anch: “Pamanch nakash ukuyibudish amikoku mu diyind, wayitakel djat ni ku madil mau. Kwinikwa ukuyilam muten wawonsu, ni kushinshikin anch kangal kwashadik mukoku ap umwing, pa chisu kanang anch umwing wau kamekenap ni wapumbuk wayisha akwau, ukumukimb nawamp ni kumuchirish. . . . Anch kwazwek urel ukuyibing kand amikoku djat ni mu diyind, wayichind lel pandaminau mu chis mwishin mwa diland diend chakwel kutal anch kwikil uburedinap. . . . Chisu ni chisu wadinga ni kuyilam amikoku uchuku mulong wa kuyichidij ku annam ayidiany, ap ku aij akupakisha kuyiy.”a

7. Ov, mulong wak yisu yimwing kafung wading uswiridin kushimpish muchim ni riy?

⁷ Kwadinga yisu yadinga ni kwit kushimpish muchim ni kutaku muchim, nakash kamu amikoku, akweta mavumu ni achidia akemp nakash. (Disambishil 33:13) Mukand umwing wisambidina Bibil ulondil anch: “Chisu chivud amikoku adinga ni kuvadin kulemp ku tubet twa mikandu. Nich kubangin nakash kafung ukumulam makwau mu chisu chiburedinay usu ni kuyizambul an kuyilet ku diyind. Machuku makemp kupwa kwa kuvadik, djat pakutwishinau kwend, ukutwish kuyisend mwi nkond yend ap kumusendin mu mavav ma chidjal chend.” (Isay 40:10, 11) Choviken komb anch, kafung muwamp wading uswiridin kwikal ni usu ni muchim wa riy.

8. Mayingishin ik majimbwilay David mulong wa ruchingej rend mudiay Yehova?

⁸ ‘Yehova ndiy Kafung wam’—ov, dined didiap dizu dimufanyidina kamu nawamp Tatukwetu wa mwiur? Chitushinshikidina Kuseng 23, tukuman mutapu ukatay kutubangin Nzamb nich usu ni riy ra kafung. Mu verse wa 1, David ulejen ruchingej rend anch Nzamb ukez kutenchik yawonsu yifanyidina chakwel anch amikoku End ‘kakusotap kwau chom.’ Mu maverse malondwilaku, David ujimbwil mayingishin masatu ma ruchingej riner: Yehova uyitakedil amikoku End, uyichidijin ni kuyidish. Tushinshikinany mayingishin minam dimwing ku dimwing.

‘Ukat Kwintakelang’

9. Mwikadil ik wa chisambu urumburilay David, ni mutapu ik ukatau kushiken amikoku mu mwikadil mud winou?

⁹ Cha kusambish, Yehova uyitakedil antu end. David ufundil anch: “Ukat kwinladikang mu madil matalel, ukat kwintakelang kuns kwa mem matuntamena. Ukat kwimpizurishang mupim wam, ukat kwinlaminang mu jinjil jitentamina mulong wa dijin diend.” (Kuseng 23:2, 3) Amikoku adia mu chisambu, akweta yakudia yivud—David ulejen pinap mwikadil wa kusanger, wa diswedish, ni wa zoong. Dizu dia Uhebereu diakarumwinau anch “madil” dikutwish kurumburik “ndond yisangareshina.” Chimeken anch, amikoku ayinau, kakutwishap kutan ndond ya diswedish ni ya kulal mu chisambu. Kafung wau ufanyidin kuyitwal kwi “ndond yisangareshina” mud yiney.

10. Mutapu ik ukatay Nzamb kumekesh ruchingej rend mud etu?

¹⁰ Mutapu ik ututakedilay Yehova ilel? Mutapu umwing usadiningay mwamu udi kusutil ku chilakej chend. Dizu diend ditukasikeshin ‘kumwilakej Nzamb.’ (Efes 5:1) Mazu minam marumburikin ranaken, dilikishin, ni rukat. (Efes 4:32; 5:2) Chakin kamu, Yehova udi chilakej chipandikena kuwap mu kumekesh ngikadil yiney yisangareshina. Ov, kajinguninap yom nawamp patwitinay etu kumwilakej? Bwat. Chiyul chinech chipepidilau nich mwiku wa Nzamb chidi chakin kamu chimekesh chipandakena kuwap cha ruchingej rend mud etu. Mu mutapu ik? Atutanga mu chifu cha Nzamb, charumburik anch atuvala nich ngikadil ni ukaliweny wa kusot yom ya muspiritu. (Disambishil 1:26) Chawiy, Yehova wij anch chikalap nchik kuburen kuwanyin kwetu, tukwet mutapu wa kukudish ngikadil yiney yimekeshinay. Tong bil—Nzamb wetu mukatish uchingejin anch tukutwish kumwilakej. Anch twalondul chilakej chend, ndiy ukututakel, mud mwi ‘ndond ya diswedish’ ya mazang. Mu mangand minam mavundangena, tukez ‘kasok kwetu nawamp,’ ni kuman chisambu chidiokila ku kwijik anch Nzamb utwitiyijin.—Kuseng 4:8; 29:11.

11. Chayitakedilay amikoku end, chom ik chikatay kushinshikin Yehova, ni mutapu ik chimekena mu yom yitwitinay?

¹¹ Patutakedilay, Yehova udi mwin riy ni mwin kushimpish muchim. Kafung ukat kushinshikin mimbu ya amikoku end, chakwel kuyitakel “mudi mudia kwend kwa yisak ya annam.” (Disambishil 33:14) Chawiy chimwing Yehova utakedil “mudi mudia kwend” kwa amikoku end. Ukat kutongin ukaliweny ni mikadil yetu. Chakin, ukat kulondwish mu rizau retu, kakatap kutwit yivud chipandakena yitukutwisha. Chitinay chidi anch twipana nich muchim wetu wawonsu. (Kolosay 3:23) Pakwez chikwikal nchik anch udi ipal ni utwishinap kusal yiwadinga ni kusal pasak? Ing anch uyedin mayej makash makutekidina mimbu kanang? Mu mikadil mud yiney chipandaken kuwap kuman anch atwitin kumusadil [Nzamb] nich mupim wetu wawonsu. Kwikiling mipim yaad yifanakena ku kachom kamwing ni kamwing. Kusal nich mupim wey wawonsu kurumburikin kusadil usu wey wawonsu ni ukash wey wawonsu ukweta mu mudimu wa Nzamb. Kwikalap nchik kuziy kukutwisha kulabish kwend kwetu, Yehova umen nich usey difukwil dietu ditusadidina nich muchim wetu wawonsu.—Marko 12:29, 30.

12. Chilakej ik chidia mu Chijil cha Moses chilejena anch Yehova utakedil “mudi mudia kwend” kwa amikoku end?

¹² Chakwel kovikesh anch Yehova utakedil “mudi mudia kwend” kwa amikoku end, shinshikin yilondilau piur pa yakupesh yimwing ya kufa nich yadingau ni kwit mu Chijil cha Moses. Yehova wakata yakupesh yiwamp yadingau ni kulet nich michim ya kujikitish. Pa chisu chawiy chimwing, ading ni kutek yakupesh kulondwish nich yikwetay mwin kupan. Chijil chalonda anch: “Pakwez anch chamukasiken kulet mwan a mukoku, mulikany aleta kwend . . . amaund atwinkudimb aad ap amaund amayemb aad.” Ing anch chamukasiken kupan amaund amayemb aad? Ukutwish lel kulet “wung uwamp.” (In Levi 5:7, 11) Chinech chimekeshin anch Nzamb kadingap ni kwit yom yipandakena yakad kutwishay kwikal nich mwin kupan yakupesh. Mulong Nzamb kaswimpinap, tukutwish kutan rongoj pa kwijik anch kakwitangap yom yivud kupandakan yitukutwisha kupan; pakwez, ukat kusanger kutambul yitukutwisha kumwinkish. (Malakiy 3:6) Udi musangar mud ik kwikal atakedilau kud Kafung mwin chovu mud winou!

“Kinikwovip Wom wa Kuyip, Mulong Ey Udi kal Niyamam”

13. Mu Kuseng 23:4, ov, mutapu ik ulondilay David mud ni murund, ni mulong wak chidiap cha kushimok?

¹³ David uletin diyingish dia kaad dia ruchingej rend: Yehova uyilamin amikoku end. Tutangin anch: “Mwaning, anch nasutilip nchik mu ruwengil ra urel wa kufa kinikwovip wom wa kuyip, mulong Ey udi kal niyamam.” (Kuseng 23:4) Katat David ulondil mud ni murund, wisambin nend Yehova nich kusadil dizu “Ey.” Chinech chidiap cha kushimok, mulong David wisambidin mutapu wamukwashau kud Nzamb kujijaman ku rupompat. David wasutila mu jiwengil jivud ja mididim nakash—mwom wend piwadinga mu ubaj. Pakwez kashilap wom ndond chakwel umuyikela, mulong ndiy wova anch Nzamb—nich “mukombu” wend ni “diland” diend ku makas—wadinga nend. Kwijik kwa diking dined kwamwongoja David ni pakad kwidjidjek chinech chamupwitina piswimp ni Yehova.b

14. Kashinsh ik katwinkishinay Bibil piur pa diking dia Yehova, pakwez chinech chirumburikinap chom ik?

¹⁴ Mutapu ik ukatay Yehova kuyilam amikoku end ilel? Bibil utwinkishin kashinsh anch kwikil akankuny—chilembil ap muntu—akeza kupandakan mu kuyinongish amikoku end pa divu. Yehova kakezap kulik chom chinech chisadika. (Isay 54:17; 2 Pita 2:9) Pakwez, chinech chirumburikinap anch Kafung wetu ukez kutuchidij ku mar min mawonsu. Tukat kusankan yoziu yiyikwatina antu awonsu, ni turishin nich rupompat rikata kuyishiken in Kristu akin awonsu. (2 Timote 3:12; Yakob 1:2) Kudi yisu tukutwisha, kufanikesh nich ‘kusutil mu ruwengil ra urel wa kufa.’ Chilakej, tukutwish kwikal piswimp ni rufu mulong wa kuzengol ap mayej. Ap kand chitwishikin anch mukatish netu kanang ikal piswimp ni rufu ni ap kufa kamu. Pa chisu mud chinech chimekena mu yisu ya mididim yikash, Kafung wetu udi pamwing netu, ni ukutulam. Ov, mutapu ik?

15, 16. (a) Mitapu ik kushalijan yikatay kutukwash Yehova kupwish yikangesh yitukutwisha kurish nich? (b) Shimunin uman umwing umekeshina mutapu ukatay kutukwash Yehova mu yisu ya choziu.

¹⁵ Yehova kakatap kushilamu diking dia mu chilay.c Pakwez tukutwish kwikal nich kashinsh anch: Yehova ukez kutukwash kuwin chikangesh chawonsu tukutwisha kurish nich. Ukutwish kutwinkish manangu ma kurish nich “yoziu kushalijan.” (Yakob 1:2-5) Kafung kakatap kusadil mukombu wend ap diland diend mulong kusu wa kuyopat annam ayidiany pakwez ukat kuyisadilang kand mulong wa kuyibing amikoku end nich manangu chakwel kuyitadish mwi njil yiwamp. Yehova ukutwish “kutubachik,” pamwing ap kusutil kud mbay netu mwin kwifukwil, chakwel tusadila chiyul chimedina pa Bibil chikutwisha kusal anch kwikal kuswimp kukash mu mwikadil wetu. Chikwau kand, Yehova ukutwish kutwinkish usu wa kujijaman. (Filip 4:13) Kusutil ku spiritu wend utumbila, ukutwish kutwinkish “ukash upandakena ukash wawonsu.” (2 Korint 4:7, MM) Nich ukwash wa Spiritu wa Nzamb tukutwish kujijaman ku choziu chawonsu chikutwishay kutek Satan. (1 Korint 10:13) Ov, chikasikeshinap kwijik anch Yehova udi tayad nakash mulong wa kutukwash?

¹⁶ Inge, rikalap nchik ruwengil ra mididim mutukutwisha kwikal, tukwendilamwap ayinetu bwat. Kafung wetu udi netu, utukwashin mu mitapu yitwakad etu kusambel kujingunin. Shinshikin uman wa kalam umwing mwin Kristu walejau anch ukwet mayej ma kunan kwa wong. “Nifanyidin kwitiyij anch kwisambishil nasambisha kutong anch Yehova wading wanjimena kal ap anch wading uchinkatin. Pakwez nakwata mupak wa kulik kudiokal kudiay Yehova. Chad namuleja milong yam. Ni Yehova wankwasha, wankasikesha chisu ni chisu kusutil kudiau akadivar ni anambaz. Avud anleja yom ya ukwash yamanau ayinau ya kujijaman mu mayej makash. Yirumburil yau yiwamp yanvurisha anch kwadingap chom chisu chinadinga nirishina nich. Ukwash usadila, pamwing nich yom ya ukwash yangikishau, yangikisha kashinsh anch Yehova kanjimenap bwat. Chakin kamu, nifanyidin kudandamen kurish nich mayej mam, ni nijap mutapu chikwikala. Pakwez nitiyijin nich kashinsh anch Yehova udi ni yamam ni ukudandamen kwinkwash mu choziu chinech.”

“Ey Ukat Kwingadil Mes Kurutu Kwam”

17. David umumekeshin nchik Yehova mu Kuseng 23:5, ni mulong wak chinech chipwitijadinap nich chilakej cha kafung?

¹⁷ Katat David ujimbwil diyingish dia kasatu dia ruchingej rend mu Kafung wend: Yehova uyidishin amikoku end, ni ukat kuyidish yom yivud. David ufundil anch: “Ey ukat kwingadil mes kurutu kwam ku mes kwa akankuny nam, ukat kuuzizil mutu wam many, rupas ram rusumpokin bwafu.” (Kuseng 23:5) Mu verse winou, David umumekeshin Kafung wend mud mwin kwak angendj ukata kupan yakudia ni yakuna yivud. Yilakej yawonsu yaad—kafung mwin kubangin ni mwin kwak angendj ni mwin kupan—yipwitijadinap. Chikalap nchik mwamu, kafung muwamp ufanyidin kwijik kwa kutan madil mawamp ni mem mavud chakwel anch amikoku end kakezap ‘kusot chom.’—Kuseng 23:1, 2.

18. Chom ik chilejena anch Yehova udi chak a ngendj mwin kupan?

¹⁸ Ov, Kafung wetu udi niyend mwin kwak angendj ni mwin kupan? Kwikil cha kutadik pa mulong winou! Tongin bil kuwap, uvud, ni kushalijan kwa yakudia ya muspiritu yitusangaredina katat. Kusutil ku chisak cha kashalapol ushishamena ni kubabal, Yehova ukat kutwinkish mikand ya ukwash ni maprogram mapitishina ma yikumangan, ni yitentam—yawonsu yiney yikat kuwanyish maswir metu ma muspiritu. (Mateu 24:45-47) Chakin kamu kwikil kand kamungun ka yakudia ya muspiritu. “Kashalapol ushishamena ni kubabal” wabudishin kal mamiliyon ma Mabibil ni mikand ya kwilejin Bibil, ni mikand yiney yidiaku mu jindim 413 ni kusut. Yehova watenchikin kal yakudia yiney kushalijan—kusambishin ku “mayel,” malejan ma Bibil ma pa dishin, djat ku “yakudia yikash,” malejan makurikina ma muspiritu. (Hebereu 5:11-14) Chawiy lel, pitukata kurish nich milong ap kukwat mipak, tukutwish chakin kamu kutan yituswiridina. Ov, kwisu twelang kushiken pakad yakudia yiney ya muspiritu? Chakin kamu Kafung wetu udi mwin kwak ngendj ni mwin kupan!—Isay 25:6; 65:13.

‘Nikez Kasok mu Chikumbu cha Yehova’

19, 20. (a) Ruchingej ik risambidinay David mu Kuseng 23:6, ni mutapu ik tukutwisha kwikal ni ruchingej riner? (b) Chom ik tukwisambina mu mutu wa mulong ulondwilaku?

¹⁹ Kupwa kwa kushinshikin jinjil ja Kafung wend ni Mwin Kutenchik wend, David wapwisha ni kulond anch: “Chakin kamu, kuwap ni riy yikez kanlondul machuku mam mawonsu minidia mwom, niyam nikez kasok mu chikumbu cha [Yehova] chikupu.” (Kuseng 23:6) David ulondil yidiokila mu muchim wizwila bwafu nich kujikitish ni ritiy—kujikitish pavurikinay milong ya pakur ni ritiy patadilay ya kurutu. Kafung winou wa pasak udi mu diking, chijay anch, anch washal piswimp nend Kafung wend wa mwiur, mud muntu ushicha mu chikumbu chend, ndiy ukez kudandamen kwikal chom cha kubangin nich rukat kud Yehova.

²⁰ Tudi in kujikitish mud ik mulong wa mazu mawamp mafundau mu Kuseng 23! Chela kumukasiken nakash David kuman njil ya kurumburil mutapu utakedilay Yehova, uyilaminay ni kuyidish amikoku. Mazu minam ma David masangareshina amalama mulong wa kutwinkish ruchingej anch tukutwish niyetu kukarumukin kudiay Yehova mud Kafung wetu. Mwaning, anch twashal piswimp ni Yehova, ukez kutubangin mud Kafung mwin rukat “chikupu,” ap mivu ni minang. Pakwez, chitudia amikoku, tukwet chisend cha kwend pamwing nend Kafung wetu mujim, Yehova. Tukwisambin mu mutu wa mulong ulondwilaku ulejen yitufanyidina kusal chakwel kwend nend pamwing.

[Mazu madia kwishin kwa paj]

Ov, Uchivurikin?

• Ov, mulong wak chifanyidin anch David wamwisikeja Yehova ni kafung?

• Mutapu ik ukatay kututakel Yehova nich chovu?

• Mutapu ik utukwashiningay Yehova kujijaman ku yoziu?

• Chom ik chimekeshina anch Yehova udi mwin kwak angendj ni mwin kupan?

[Chipich chidia pa paj wa 24]

Mud kafung mu Isarel, Yehova ukat kuyitakel amikoku End