Muchingila Yehova, Ikal Mukash

“Muchingila [Yehova], ikal mukash muchim wey ujijaman. Inge, muchingila [Yehova]!”—KUSENG 27:14.

1. Ruchingej rikwet usey ik ujim, ni mutapu ik usadidilau dizu dined mu Bibil?

RUCHINGEJ rakin riding mudi mwend wa kasu. Rukat kutukwash kutal kulemp kupandakanamu pa yoziu ni kuchingel dikez nich kwikasikesh ni musangar. Ching kusu Yehova ndiy ukutwisha kutwinkish ruchingej, rikatay kupan kusutil ku Dizu diend diapepilay. (2 Timoteu 3:16) Chakin kamu, mazu “ruchingej,” “achingejina,” ni “kuchingejin” madi tupamp tuvud mu Bibil ni mawonsu makat kwisambin ruchingej risangareshina ni rakin ra chom kanang chiwamp ni piur pa chom chichingejinau.a Ruchingej riner ripandikenamu impu ya chamwamu, yakad kwikal nich mufulandal pa mutapu wa kuwanyin.

2. Ruchingej radinga ni usey ik mu mwom wa Yesu?

² Parishay nich yoziu ni mar makash, Yesu watala kurutu kupandakanamu yadinga yimenay ni wamuchingejina Yehova. “Mulong wa musangar watekau kurutu kwend, ndiy wakasikena mu mar [pa mutond wa mar], wapipeja usany, washakama ku chikas cha katatuku cha nkwas ya Nzamb.” (Hebreu 12:2) Mulong Yesu washinshikina nakash pa ruchingej ra kuchidij ukaleng wa Yehova ni kutumbish dijin dia Nzamb, ndiy kalikap ap pakemp njil yend ya kuziyil kudi Nzamb, chikalap nchik chom chamushikena.

3. Ruchingej rikwet usey ik mu mwom wa atushalapol a Nzamb?

³ Mwant David wisambina kukwatijan kudia pakach pa ruchingej ni kwikasikesh, walonda anch: “Muchingila [ Yehova], ikal mukash, muchim wey ujijaman. Inge, muchingila [ Yehova].” (Kuseng 27:14) Anch tusotil muchim wetu wikala ukash, kangal twalik ruchingej retu rikala rirumbangena pakwez turilamany mu manangu ni kuritudikin mu muchim. Kusal mwamu kukez kutukwash kumwimburij Yesu mu kumekesh kwikasikesh ni mushiku pitusadila mudimu wayinkishay in kwilej end kusal. (Mateu 24:14; 28:19, 20) Chakin, ruchingej rendining pamwing ni ritiy ni rukat ridi ra usey ujim, ngikadil ya chikupu ya mwom wa atushalapol a Nzamb.—1 Korint 13:13.

Ov, “Ukujimbilany mu Ruchingej”?

4. Chom ik chichingedilau in Kristu azizidilau many ni ambay nau “amikoku akwau”?

⁴ Antu a Nzamb akwet dikez disangarishina nakash kurutu kwau. In Kristu azizidilau many achingedin kusal pamwing ni Kristu mwiur, oku “amikoku akwau” achingejin “kudiokal kand ayinau mu uswik wa yom yivundila, ni kwez ku kwikol kwa uyaj [pa divu] wa an a Nzamb.” (Yohan 10:16; Rome 8:19-21; Filipoi 3:20) Mu “kwikol kwa uyaj” kwinoku mudi kukolik kudiokal ku chitil ni yibudikin yach yiyimp. Chakin, Yehova—mwin Kupan “yom yawonsu yiwamp ni yiwanyidina”—ukez kuyinkish antu end ashinshamena yom yiwamp kusu.—Yakob 1:17; Isay 25:8.

5. Mutapu ik tukutwisha kushiken ku ‘kujimb mu ruchingej’?

⁵ Ruchingej rifanyidin kwikal ni usey ik ujim mu mwom wetu? Ku Rome 15:13, tutangin anch: “Katat Nzamb wa ruchingej anizwishany nich musangar wawonsu ni chisambu mu kwitiy, chakwel ukujimbilany mu ruchingej mu ukash wa [s]piritu [u]tumbila.” Mwaning, ruchingej ra Ukristu chitwishikin kurifanikesh, chidiap ni buji wakina mu mididim, pakwez nich nsis ja muten wa pamanch, rikat kwizwish mwom wa muntu nich chisambu, musangar, rutong ni kwikasikesh. Shinshikin anch tukat ‘kujimb mu ruchingej’ pitwiyijidishina nich Dizu dia Nzamb diafundau ni kutambul mwiku wend utumbila. Rome 15:4 ulondil anch: “Yom yawonsu yafundau pakuru ayifundila kutulej nich etu, chakwel tukutambul ruchingej mu kudandamen ni mu kwongoj kwa mukand wa Nzamb.” Chawiy lel iyipula anch: ‘Ov, ruchingej ram rikat kuzut kusutil ku kwikal mwin kwilej muwamp wa Bibil, kusutil ku kumutang dichuku ni dichuku? Ov, nikat kumulembilang Nzamb chakwel angikish spiritu wend?’—Luka 11:13.

6. Tufanyidin kwilam ku chom ik, chakwel ritiy retu rikal rom?

⁶ Yesu, Chilakej chetu, watambula usu mu Dizu dia Nzamb. Kusutil ku kumushinshikin nakash, tukwipuk ‘kuziy ni kukangany ku mipim yetu.’ (Hebreu 12:3) Chiwapidil kutong anch Nzamb wetu mwin kutwinkish ruchingej kakwikalap mu manangu ni mu michim yetu ap anch twasidin ching kusu pa yom yindjing—pamwing ap pa yom ap pa ntong ja ku mujimbu—tukutwish kuziy swa mu spiritu, chakin kamu kukutwish kututwal ku kushadish usu ni kwikasikesh mu ngikadil. Nich ngikadil yiney ya manangu, tukutwish ap ‘kujiy mu ritiy retu.’ (1 Timoteu 1:19) Ku mutambu ukwau, ruchingej rakin rikasikeshining ritiy retu.

Usey wa Ruchingej ku Ritiy

7. Ruchingej ridi nchik ra usey ujim ku ritiy?

⁷ Bibil ulondil anch: “Ritiy rawiy kushinshik kwa yom ya ruchingej, ni kwitiyil kwa yom yakad kumekan ku mes.” (Hebreu 11:1) Chawiy lel, ruchingej ridiap chom chamwamu chiwejidinau ku ritiy; ridi chikunku chimwing cha usey ujim ku ritiy. Shinshikinany Aburaham. Kulondul nich kuman kwa antu, ndiy ni mukajend, Sara, adinga asutin kal mivu ya kuval pa chisu chashilayimu Yehova anch akwikal ni nswan. (Disambishil 17:15-17) Mutapu ik witiyijay Aburaham? “Mulong wa ruchingej ndiy witiya anch akwingikadish ngak wa michid yivud.” (Rome 4:18) Mwaning, Aburaham wadinga nich ritiy mudiay Nzamb mwin kupan ruchingej anch ukez kwikal ni mbut mudi mufulandal umwing ukash. Ritiy rend ratokisha ni rakasikesha kand ruchingej rend. Aburaham ni Sara niyawiy akasikana ni asha chikumbu chau ni anamakwau chad ashakama chirung cha mwom wau washalaku mu antent mwi ngand ya wingendj!

8. Kudandamen mu kujijaman kukat kukasikesh ruchingej mutapu ik?

⁸ Aburaham walama ruchingej rend rikash kusutil ku kumuziyil Yehova, ap pa chisu chadinga chikash kusal mwamu. (Disambishil 22:2, 12) Chawiy chimwing, anch twaziyil ni kujijaman mu mujikit wa Yehova, tukutwish kwikal ni kashinsh ka kutambul difut dietu. Paul wafunda anch: “Kudandamen” kukat kulet “wuntu wakin” chawiy wuntu wakin ukat kulet ruchingej, ni “ruchingej kirikat kutukwatishap usany.” (Rome 5:4, 5, MM ) Chawiy chamubachika Paul kufund kand anch: “Etu tusotil chakwel mwiwonsu wa pakach pen umekesha mushiku wa kudandamen kwinoku kwa kuwanyish kwa ruchingej ni kushik kwisudiel.” (Hebreu 6:11) Kuman kwinoku kuwamp, kwengamidina pa urund wa piswimp ni Yehova, kukutwish kutukwash kurish nich ngikadil yawonsu yikash ni kwikasikesh, ni musangar.

“Sangarany mu Ruchingej”

9. Chom ik tufanyidina kusal chisu ni chisu chikutwisha kutukwash ‘kusanger mu ruchingej’?

⁹ Nzamb wetu mwin kutwinkish ruchingej udi mujim kupandikanamu chom chin chawonsu chikutwisha kutwinkishau mu mangand. Kuseng 37:34 ulondil anch: “Muchingilany [Yehova], wilamany mwi njil yend, Ndiy ukez kakuyukish ni kukwink ngand; pakuyijiyishau ayimp shitit ukez kachiman.” Mwaning, tukwet mayingish mawonsu ma ‘kusanger mu ruchingej.’ (Rome 12:12) Pakwez, chakwel kusal mwamu, tufanyidin kutongijokinang chisu chawonsu pa ruchingej retu. Ov, ukat kutongin chisu ni chisu ruchingej rey rakwinkau kudi Nzamb? Ov, wimen mudi udi mu Paradis, nich kuzangurok mulong wa ukash wa mujimbu, wiyakamishinap kand, akwombilamu kudi akatish ney, ni usadil mudimu umwing usangarishina? Ov, ukat kutongijokin pa yipich yidia mu mikand yetu yilejena Paradis? Kutongijokinang kwinoku chisu ni chisu kufanaken nich kowish dikalash dia pa dididish chakwel muntu atwisha kuman nawamp yom. Anch twadiburil kowish dikalash swa, rufunfut rikez kutukangesh kuman nawamp yom ya ufun. Chad yom yikwau yikez kwizul too mu manangu metu. Kangal twalikinany chom chinech chitushikena!

10. Ov, mulong wak kushinshik kwetu pa difut kukwet chibudikin chiwamp pa urund wetu ni Yehova?

¹⁰ Chakin, diyingish dietu dia kusambish dia kumusadil Yehova ridi rukat retu mulong wendendiy. (Mako 12:30) Pakwez, tufanyidin kushinshikin nakash pa difut. Chakin, Yehova uchingejin anch tusala mwamu! Hebreu 11:6 ulondil anch: “Kwakad ritiy kakutwiship kumusangarish Nzamb. Mulong mwawonsu ukweza kudi Nzamb uwapidil kwitiy anch uding kwaku, ni ndiy ukez kayifut uruu kudi awiy akata kumusot.” Ov, mulong wak usotilay Yehova tumuman mudi mwin Kufutan? Mulong anch twijik mwamu, tukumekesh anch tumwij nawamp Tatukwetu wa mwiur—anch udi mwin kupan ni uyikatining anend. Tong bil mutapu chidia chakad kusangarish ni mutapu chela kwikal chiswapela kuziy anch kitwadingap nich “ruchingej ra kurutu.”—Yeremiy 29:11.

11. Ov, ruchingej ramwinkishau Moses kudi Nzamb ramukwasha kukwat mupak wa manangu mutapu ik?

¹¹ Chilakej cha muntu wadinga ushinshikin nakash pa ruchingej ramwinkishau kudi Nzamb wadinga Moses. Mudi “mwan wa changadim wa mwant wa in Idjibit,” Moses wadinga ni usu, mwaz, ni dipit dia Idjibit diadinga diendendiy. Ov, wela kulondul nakash yom yiney, bil anch wela kumusadil Yehova? Nich kwikasikesh, Moses watonda kumusadil Yehova. Ov, mulong wak? Mulong “mes mend mading matadil ku difut dikutambulay kurutu.” (Hebreu 11:24-26, MM ) Mwaning, Moses kadingap chakin ni kudiul ruchingej ramutekinau kurutu kudi Yehova.

12. Ov, mulong wak ruchingej ra Ukristu rifaniken ni mpup?

¹² Kambuy Paul wafanikesha ruchingej ni mpup mulong yikat kuchidij usu wa manangu metu, kututwishish kukwat mipak ya manangu, kutek pa ndond ya kusambish yom ya usey, ni kulam kushinshaman. (1 Tesalonika 5:8) Ov, udjit mpup yey ya chifanikesh chisu chin chawonsu? Anch mwawiy, komb mudi Moses ni Paul, ukez kutek mufulandal wa ruchingej rey, kangal mu mapit makad kuchingejin “pakwez amuchingej Nzamb ukata kutwinkish yom yawonsu ya kutusangarish.” Chakin, kulik kusal yisadilau antu awonsu ku kwiyep yom ya choy kwitining kwikasikesh, pakwez usu winou ufanyidin kamu! Twamb oku twel oku, mulong kwitiyij chom chin chawonsu chakad usey chipandikenau kudi “mwom udia wakin,” uyichingedina antu amuchingejina ni amukatila Yehova?—1 Timoteu 6:17, 19, MM.

“Am Kinikez Kakulikip”

13. Yehova uyinkishin atushalapol end ashinshamena kashinsh ik?

¹³ Antu achingejina ditenchik dia yom dia katat dia mangand chiyifanyidin kutongin pa yom ya diamashik ni piur pa yibudikin yiyichingedina kurutu pimakeza kwikal mangand mu “yakamish” yikash. (Mateu 24:8) Pakwez antu amuchingejina Yehova kovilap wom winou. Akez kudandamen “kushakam wakad kwakam, ndiy ukez kwikal zong wakad wom wa kuyip.” (Jinswir 1:33) Mulong awiy kachingejinap kwau mu ditenchik dia katat, ateshin ni kusanger chiyul cha Paul anch: “Lamany mwom wen wakad rukat ra nfalang; shakamany ni musangar ni yom yiukwetanya kal; mulong amwinend walonda kal anch, Am kinikez kakulikip, ap kukusha ey chamwamu.”—Hebreu 13:5.

14. Ov, mulong wak in Kristu kaswiridinap kwau kwinan kwa chamwamu piur pa maswir mau ma ku mujimbu?

¹⁴ Verse winou kashilap chinshilend ap pakemp win chakwel anch Nzamb kakezap kutubangin. Yesu niyend watwinkisha kashinsh ka kubangin kwa Nzamb, palonday anch: “Sambilany bil kusurib want wend ni kutentam kwend, chawiy lel yom yawonsu [yom ya ku mujimbu mulong wa mwom] akez kananzukeshilip. Chawiy kangal watongamany ya diamashik, mulong diamashik [dikwitongamin] idinau. Kuyip kwa dichuku dimwing kuwanyidin.” (Mateu 6:33, 34) Yehova wij anch chitukasikedining kwikal nich mushiku mulong wa Want wend ni pa chisu chawiy chimwing kusend yisend yetu mulong wa kuwanyish maswir metu ma mujimbu. Tutekany amboku ruchingej retu rawonsu mu ukaliweny wend ni kusot kwend kuwanyish maswir metu.—Mateu 6:25-32; 11:28-30.

15. Mutapu ik ulaminingau in Kristu ‘dis didia zwang’?

¹⁵ Tukat kumekesh kumuchingejin Yehova anch twikal nich ‘dis didia zwang.’ (Mateu 6:22, 23) Dis didia zwang didi diakin, dikwet yitongijok yiwamp, dikwetingap chibud ni maku ma choy. Pakwez, kwikal nich dis didia zwang, kurumburikinap kushakam mu uswik ukash ap kudiburil kuwanyish yisend yetu ya Ukristu. Pakwez, kurumburikin “kwirijek” pitudandamedina kutek mujikit wa Yehova pa ndond ya kusambish.—2 Timoteu 1:7.

16. Ov, mulong wak tuswiridin ritiy ni kwikasikesh mulong wa kulam dis didia zwang?

¹⁶ Kulam dis didia zwang kwitining ritiy ni kwikasikesh. Chilakej, anch mukurump wa mudimu ukasikeshidin chisu ni chisu anch ufanyidin kusal mudimu pa yisu ya yikumangan ya Ukristu, ov, ukutwish kulamat ba ku kutek yom ya mu spiritu pa ndond ya kusambish chiudia mwin Kristu? Anch muntu widjidjek anch Yehova kakezap kuwanyish kushilamu kwend kwa kuyilam atushalapol end, chawiy Satan ukudandamen kwend nich yipwichik ni muntu winou ukutwish kulik kukumangan ku yikumangan yawonsu. Mwaning, kuburen ritiy ku mutambu wetu kukutwish kumutwishish Satan ikal nich usu padi etu, ndiy ukusambish kututekin yom ya kusambish, kakwikalap kand Yehova. Chikwikal chak mud ik!—2 Korint 13:5.

‘Muchingejinany Yehova’

17. Mutapu ik uyukinau antu akata kumuchingej Yehova kudiosh kamu katat?

¹⁷ Chisu ni chisu Bibil ulejen anch antu akata kumuchingejin Yehova kakatap kukangany. (Jinswir 3:5, 6; Yeremiy 17:7) Chakin, pa yisu yimwing akat kurish nich kuburen kwa yom ya ku mujimbu, pakwez akat kukuman mudi kudi kwipan kukemp anch akwisikesh nich yiyukish yiyilamidinau. Chawiy chikatau kumekesh anch ‘amuchingejin Yehova’ ni itiyijin anch ndiy ukez kuyinkish chakin kamu antu end ashinshamena maku mawonsu matentamina ma muchim wau. (Kuseng 37:4, 34) Chawiy, chikwetau musangar ap ilel unou. “Ruchingej ra mwin kutentam rikez kamusangarish, pakwez ruchingej ra antu ayimp rikez kajiy.”—Jinswir 10:28.

18, 19. (a) Kashinsh ik ka rukat katwinkishinay Yehova? (b) Mutapu ik tukudandamena kumutek Yehova ku “chikas [chetu] cha katatuku”?

¹⁸ Anch mwan ikundj mukemp wendil chikas mu chikas cha tatukwend, ukat kwiyov mu diking. Niyetu tukat kwiyov mu diking ni zong pitwendila ni Tatukwetu wa mwiur. Yehova wayileja in Isarel anch: “Kangal wovany wom, mulong nidi nen. . . . Nikukukwashany. Am [Yehova] Nzamb wen. Nikez kakukasikeshany ni kukulejany anch: ‘Kangal wovany wom, nikukukwashany.’ ”—Isay 41:10, 13.

¹⁹ Chimekeshin rukat mud ik—Yehova ukwatin ku chikas cha muntu! David wafunda anch: “Nikat kutal kudi [ Yehova] udia kurutu kwam, ni udi kand ku chikas cham cha katatuku, kinikez kashemunikip.” (Kuseng 16:8) Mutapu ik tukudandamena kumutek Yehova ku “chikas [chetu] cha katatuku”? Tusadining mwamu mu mitapu yaad. Cha kusambish, tukat kulikin Dizu diend ditutakela mu milad yawonsu ya mwom; ni cha kaad, tukat kutal ku difut dia ntumb ditutekidinay Yehova kurutu. Nfund-a-kuseng Asaf wawanga anch: “Nading ney yisu yawonsu, Ey wanlamin nich chikas chey cha katatuku, ukat kwintakel mu chiyul chey, ni kurutu ukez kwingak mu uyaj wey.” (Kuseng 73:23, 24) Nich kashinsh kinak, tukutwish chakin kamu kuchingejin dikez nich kwikasikesh.

“Kukol Kwez kal Piswimp”

20, 21. Dikez ik diyichingedina antu amuchingejina Yehova?

²⁰ Dichuku ni dichuku disutina, chikat kwikal cha swa-swa anch tudandamena ku chikas cha katatuku cha Yehova. Piswimp ap kamu, kusambish nich disheshik dia relijon wa makasu, mangand ma Satan makuman mar mamwing kand kal mamekanangap kudiokal pa kusambish kwa mangand. (Mateu 24:21) Wom ukez kayikwat antu akad ritiy. Chikwau kand, pa chisu chinech cha mar, atushalapol akasikena a Yehova akez kusangar nich ruchingej! Yesu walonda anch: “Piyikusambisha yom yiney kumekan ukutalany, ni kudjindul mitu yen mwiur; mulong kukol kwez kal piswimp.”—Luka 21:28.

²¹ Tusangerany mwi Nzamb wetu utwinkishina ruchingej ni kangal atudimba ni atwoza nich kudimwok kwa manangu ma Satan. Pa chisu chawiy chimwing, tusalany mudimu ukash wa kukudish ritiy, rukat, ni kumwov Nzamb wom. Anch twasal mwamu, tukez kwikal akash mu kumuziyil Yehova mwishin mwa ngikadil yawonsu ni kumurishish Djabul. (Yakob 4:7, 8) Mwaning, “kasikeshany, ni muchim wen ujijaman, en awonsu uchingejilany mudi [ Yehova]!”—Kuseng 31:24.

[Mazu madia kwishin kwa paj]

Ov, Ukutwish Kwakul?

• Ruchingej ra Yesu rawejina mutapu ik ku kwikasikesh kwend?

• Mutapu ik uyilinga pamwing ritiy ni ruchingej?

• Mutapu ik rikutwisha ruchingej pamwing ni ritiy kumukasikesh mwin Kristu chakwel itekina yom ya usey pa ndond ya kusambish mu mwom?

• Ov, mulong wak utwishinau antu ‘amuchingejina Yehova’ kuchingel dikez nich kwikal akash?

[Chipich chidia pa paj wa 26]

Wikalap nchik nsand ap ipal, ov, wimen anch udi mu Paradis?