Mutapu wa Kujingunin DIFUKWIL DIAKIN

MARELIJON mavud malondining anch yilejeningau yidiokil kudi Nzamb. Chawiy lel, tuwapidil kutesh mazu ma Yohan, kambuy wa Yesu, wafunda anch: “Akarukat, kangal witiyijany aspiritu awonsu, pakwez yipakany aspiritu anch adi a Nzamb; mulong aprofet a makasu apalangedin kal mu mangand.” (1 Yohan 4:1) Mutapu ik tukutwisha kupak chom chakwel kutal anch chidiokil kudi Nzamb?

Chom chin chawonsu chidiokila kudi Nzamb chimekeshining untu wend, nakash kamu ngikadil yend yijim, rukat. Chilakej, ukaliweny wetu wa kwov madjimb, ukata kututwishish kusanger res ruwamp ra mayij, madjimb ma yisalamb, ap ma mukat udiokila mu fur, chidi chimekesh cha rukat ra Nzamb. Ukaliweny wetu wa kuman kuzwek kwa muten, chinzuwanzuu, ap kumwemwet kwa kabas a mwan, umekeshin anch Nzamb utukatin. Chilik chimwing kand nich ukaliweny wetu wa kutesh kudil kwa kajil, muminy uwamp, ap dizu dia mukatish. Ap mutapu watutangau etu antu, twikalap nchik akad kuwanyin, umekeshin rukat ra Nzamb. Chawiy tumening chisu ni chisu uyakin wa mazu ma Yesu malonday anch: “Chiyukish chijim kudi mwin kupan chamupandakan mwin kutambul.” (Midimu 20:35) Tukat kusanger kumekesh rukat mulong atutanga “mu chifu cha Nzamb.” (Disambishil 1:27) Ap anch Yehova ukwet ngikadil yikwau, rukat rawiy ripandikenamu mu untu wend.

Mifund yidiokila kudi Nzamb yifanyidin kumekesh rukat rend. Marelijon ma mangand makwet mifund yivud yikur. Ov, mifund yiney yitwishin kumekesh rukat ra Nzamb?

Uyakin udi anch, mifund yivud yikur ya marelijon yilondil yom yikemp piur pa mutapu utukatiningay Nzamb ap mutapu tukutwisha kumukat Nzamb. Chawiy, tutikit twa antu tukatap kutan chakul pakatau kwipul anch, “Ov, mulong wak tumen rukat ra Nzamb mu yom yatangay oku mar ni uyimp yidandamedin?” Pakwez, Bibil, ndiy kusu buku mukur wa relijon urumburila nakash rukat ra Nzamb. Utulejin kand mutapu wa kumekesh rukat.

Buku Wisambidina Rukat

Dizu dia Nzamb, Bibil, dimumekeshin Yehova mudi “Nzamb wa rukat.” (2 Korint 13:11) Bibil urumburil mutapu rukat ramubachika Yehova kuyinkish antu a kusambish mwom wakad mayej ni rufu. Pakwez kumubwambwil Nzamb kwayiletina antu mar. (Kuvurik Yijil 32:4, 5; Rome 5:12) Yehova wasala chakwel anch achirisha yom yashadika. Dizu dia Nzamb dilondil anch: “Nzamb wakata ngand, ndiy wapana Mwanend wa kuval kwend umwing, chakwel mwawonsu ukwitiya kudiay ndiy kakujiyip, pakwez ukwet kal mwom wa chikupu.” (Yohan 3:16) Mifund Yitumbila yilejen patok rukat ra Nzamb ni kurumburil mutapu wapanay Nzamb winyikel uwanyidina mu makas ma Yesu chakwel ayichirishina antu in kuziyil chisambu.—Daniel 7:13, 14; 2 Pita 3:13.

Bibil ulondil mu wiswimp chisend cha muntu mu mazu manam: “Ukamukata Mwant Nzamb [Yehova] wey nich muchim wey wawonsu, nich mupim wey wawonsu, nich manangu mey mawonsu. Chinech chawiy chijil chipandakena ni cha kusambish. Ni cha kaad chifanikenaku nich chawiy ech: Ukamukata mukwen mudi ey amwiney. Pa yijil yiney yaad pawiy pakudikinau yijil yawonsu.” (Mateu 22:37-40) Bibil ulondil anch udiokil ku mwiku utumbila wa Nzamb. Mulong urumburil patok untu wend, tukutwish kwikal nich kashinsh anch udiokil kudi “Nzamb wa rukat.”—2 Timoteu 3:16.

Anch twasadil yany yidiamu, tukutwish kujingunin mifund ik yikur yidiokila chakin kamu kudi Nzamb. Rukat rikat kand kuyijikesh in kwifukwil akin, mulong akat kwimburij rukat ra Nzamb.

Mutapu wa Kuyijik Antu Amukatina Nzamb?

Antu amukatina Nzamb chakin kamu ijiken nawamp, nakash kamu pitushicha mu chirung chitazukinay Bibil anch “machuku ma kwisudiel.” Antu ikadil kal kamu “in kwikat ayinau, in kukat nfalang, . . . akwisangarish ayinau, Nzamb bwat.”—2 Timoteu 3:1-4.

Mutapu ik ukutwisha kuyijik antu amukatina Nzamb? Bibil ulondil anch: “Mulong rukat ra Nzamb rawiy er, chakwel tukulam yijidik yend; ni yijidik yend kiyikutukasikenip.” (1 Yohan 5:3) Kumukat Nzamb kuyibachikining antu kulimish yijil ya ngikadil ya Bibil. Chilakej, Dizu dia Nzamb dikwet yijil piur pa kwijikijan kwa ikundj ni mband ni uruw. Ching kusu mu uruw mwawiy mufanyidinau ikundj ni mband kwijikijan, ni uruw udi wa chikupu. (Mateu 19:9; Hebreu 13:4) Mband umwing wa mu Espagne wileja teoloji, pakumanganay ku chikumangan kwadingau ni kwilej Atuman a Yehova yijil ya Bibil, warumburila anch: “Nachirika ukasikeshinau, kichadingap kusu mulong wa diskur dirumburila Mifund pakwez, chadinga mulong wa mutapu wau wa kuyak antu akad kwikal Atuman a Yehova ni ngikadil yau yiwamp.”

Kuwejin pa kumukat kwau Nzamb, chiswapeling kuyijik in Kristu akin kusutil ku mutapu uyikatiningau akwau antu. Mudimu wau ujim nakash udi kuyilej antu akwau ruchingej rimwing kusu, Want wa Nzamb. (Mateu 24:14) Kwikil chom chikutwisha kuyiletin akwetu antu yiyukish ya chikupu chisutina kuyikwash kwak ronganyin ra Nzamb. (Yohan 17:3) In Kristu akin amekeshining kand rukat mu mitapu yikwau. Akat kupanang ukwash wa ku mujimbu kudi antu amena mar. Chilakej, chisu kwikala chak cha kuzal kwa divu mu Itali, jurnal umwing wa mwi ngand yiney wafunda anch Atuman a Yehova “asala yisal yifanyidina, ayikwasha antu adinga mu mar, pakad kusot bil kwijik relijon wau.”

Kuwejin pa kumukat Nzamb ni mutej, in Kristu akin akatijadining umwing ni mukwau. Yesu walonda anch: “Napan kal chijidik chisu kudi en, chakwel en ukatijanany; mudi am chinakukatanya en ni yen ukatijanany kand muntu ni mukwau. Ku chinech kwawiy kukwijikinau antu awonsu anch en udiany in kwilej amam anch wakatijanany.”—Yohan 13:34, 35.

Ov, rukat rikatijadinau in Kristu akin riding ra pakampwil? Mwamu mwadingay ni kutong mwilomb Ema. Wadinga ni kusal mudimu mu La Paz, mu Bolivie, kwinikwa kasolikany ka michid kakat kuyauril chisu ni chisu mpich ni kazwendj. Ndiy walonda anch: “Kapamp ka kusambish naya ku chikumangan cha Atuman a Yehova, namana ikundj umwing udjita nawamp ushich ni wambambin ni changadim ngez mwin Inde. Kand kal nichimanangap. Kapamp kamwing, nijika anch antu inay afanyidin kwikal antu a Nzamb.” Chawiy chimwing kand, Miriam changadim umwing mwin Brésil walonda anch: “Kinadingap nija mutapu wa kwikal ni musangar, ap kusu mu dijuku diam din. Kapamp ka kusambish namana mutapu usadila rukat, radinga mukach mwa Atuman a Yehova.” Mu États-Unis, mukurump umwing ntakel wa televizion wafunda anch: “Anch antu avud ading ashich mudi mudinga relijon wen, ing muchid winou welangap kwikal mu mwikadil winou. Nidi kwam kabamb-a-nsangu wija anch dirijek dien dimedin pa rukat ni pa ritiy rikash mudiay Sakatang.”

Kimb Difukwil Diakin

Rukat ridi chijingidij chijim cha difukwil diakin. Yesu wafanikesha kutan difukwil diakin nich kutan njil yiwamp ni kutond kwendilamu. Yawiy njil yimwing kusu yiyila ku mwom wa chikupu. Yesu walonda anch: “Andamany mu kachis kiwongila; mulong chis chibwabumukina ni njil ya mukombil yiyil ku kujiy, akata kwandaminamu avudil. Mulong chis chiwongila ni kajil katentamina yitakedil ku kupand, akemp kusu akata kuyibudikin.” (Mateu 7:13, 14) Ching kusu chirund chimwing cha in Kristu akin awiy endila mu uumwing ni Nzamb mwi njil ya difukwil diakin. Chawiy lel, kutond kwey kwa relijon kudi kwa usey. Anch watan njil yiney ni watond kwendilamu, ukez kutan njil yiwamp ya mwom mulong yidi njil ya rukat.—Efesus 4:1-4.

Tongin musangar ukutwisha kwikal nich piwendidina mwi njil ya difukwil diakin! Chidi mudi kwend ni Nzamb. Kudi Nzamb kwawiy ukutwisha kwilejin manangu ni rukat chakwel uta urund uwamp ni akwen antu. Kudi Nzamb kwawiy ukutwisha kwilejin piur pa rutong ra mwom, ni ukutwish kutesh kushilamu kwa Nzamb ni kwikal nich ruchingej mulong wa machuku ma kurutu. Kiukezap kwinan mulong wa kukimb difukwil diakin.

[Chipich chidia pa paj wa 3]

Mu mifund yikur ya relijon, ching Bibil kusu ndiy ulejena rukat ra Nzamb

[Chipich chidia pa paj wa 5]

In Kristu akin ijiken mulong akat kumekesh rukat