Likany Dizu Dia Nzamb Ditakela Nzau jen
“Dizu diey didi kutok ku mend mam ni chimunyik mwi njil yam.”—KUSENG 119:105.
1, 2. Ov, mulong wak ukangenau antu avud kutan chisambu ni musangar wakin?
OV, UKUTWISH kuvurik dichuku wamwipulap muntu kanang akuleja njil ya kuya? Pamwing ap wadinga piswimp ni kushik kuuyila pakwez kiwadingap wija njil ya kwamburikin kuya. Ap chitwishikin anch wadi washadikang kal kamu ni wading uswiridin kwamburikin mwi njil yindjing. Mwi njil yikwau, chelap kwikal cha manangu kulondul umutakel wa muntu kanang wija mwab nawamp? Muntu winou ukutwish kukukwash ushika ku uyila.
2 Mu tunan twa mivu yasutina, antu avud adinga ni kwibodil muntu ni muntu njil yend mu mwom pakad ukwash wa Nzamb. Pakwez, pakad kumwengamin Nzamb, antu akayitil ashadikin kal kwau. Akanganya kuman njil yitwadila ku chisambu ni musangar wakin. Ov, mulong wak wakanganyau kushik ku chisambu ni musangar winou? Pasutil kal mivu 2 500 ni kusut, muprofet Yeremiy walonda anch: “Kwikil muntu ukutwisha kutakel mwom wend amwinend.” (Yeremiy 10:23) Muntu mwawonsu ukupakisha kutakel mwom wend amwinend pakad kwitiyij ukwash uwanyidina ukat chakin kukangany. Chakin kamu, antu aswiridin umutakel!
3. Ov, mulong wak ching Yehova Nzamb kusu ndiy uwanyishinau chakwel kuyinkish antu umutakel, ni yom ik yishidilayimu?
3 Yehova Nzamb udi uwanyishinau kamu kulet umutakel winou. Ov, mulong wak? Mulong uteshining nawamp kumupandakanamu muntu ap wisu mutapu wayitangau antu. Ni wij kamu mutapu wapumbukau antu ni mutapu washadikau. Wij kand chiyitinau chakwel atwisha kuchirikin mwi njil yitentamina. Chikwau, chidiay Sakatang, chisu chawonsu Yehova wij chom chidinga chiwamp mulong wetwetu. (Isay 48:17) Chawiy, tukutwish chakin kamu kuchingejin mu kushilamu kwend kufundilau mu Kuseng 32:8 anch: “Am nikez kukwijidish ni kukulej mwi njil yiukeza kuya, nikez kuyul padi ey ni dis diam.” Kwikil kwidjidjek pa mulong winou: Yehova uletin umutakel upandikenamu kuwap. Chad lel, mutapu ik ukatay kututakel?
4, 5. Ov, mutapu ik ukutwisha kututakel mazu ma Nzamb?
4 Nfund-a-kuseng walonda pamulembilay Yehova anch: “Dizu diey didi kutok ku mend mam ni chimunyik mwi njil yam.” (Kuseng 119:105) Mazu ma Nzamb ni yijil yend yidi mu Bibil, ni yikutwish kutukwash etu kupandakanamu yikangesh yitukutwisha kutan mu mwom wetu. Chakin, pitukata kutang Bibil ni kumulik atutakela, tukat kwimen ayinetu yilondilau mu Isay 30:21: “Matu men makez kutesh dizu kwinyim kwen dilondil anch: ‘Njil yawiy ey. Yangany mwinimwa.’”
5 Shinshikin anch, Kuseng 119:105 ujimbwil mitapu yaad yisadila Dizu dia Nzamb. Cha kusambish, didi mudi mwend wa kasu ku mend metu. Pitukata kura tutaku nich yikokujol ya pichuku-pichuku, yijil yidia mu Bibil yifanyidin kutakel jinzau jetu chakwel anch tukwata mipak ya manangu ni twiyepa mipit ya mangand minam. Cha kaad, yijil ya Nzamb yidi chitokish mwi njil yetu, yitukwashining tutonda kutond kwambatena nich ruchingej retu ra mwom wa chikupu mu Paradis washilayimu Nzamb. Tukat kujingunin swa yibudikin—yiwamp ap yiyimp—ya ngikadil kanang, mulong tukwet chitokish chikata kutokish nawamp kurutu mwi njil tuyila. (Rom 14:21; 1 Timote 6:9; Kuburik 22:12) Katat tushinshikinany mu mutapu ujim mutapu ukutwisha kwikal mazu ma Nzamb madia mu Bibil mudi mwend wa kasu ku mend metu ni chitokish cha mwi njil yetu.
“Kutok ku Mend Mam”
6. Mazu ma Nzamb mading chitokish ku mend yetu mu mikadil ik?
6 Tukwatining mipak dichuku ni dichuku. Mipak yimwing yikutwish kumekan yakad usey, pakwez pa yisu yimwing tukutwish kura nich mwikadil wa yikokujol piur pa ngikadil yetu, win yakin wetu, kulik kwetu kwiyandjik mu milong ya mangand. Chakwel kupandakan yoziu yiney nawamp, tufanyidin kwikal “ifumbil[a] kal manangu [metu] mu . . . kujingunin kuwap ni kuyip.” (Hebreu 5:14) Kusutil ku kwak ronganyin rakin ra Dizu dia Nzamb ni kukudish chovu cha yijil yend, tukat kufumb kom ketu mu chilik cha kwel anch tukez kutwish kukwat mipak yikumusangaresha Yehova.—Jinswir 3:21.
7. Rumburil mwikadil mukutwishay pamwing ap mwin Kristu kwikal nich yitongijok ya kusot kuta urund ni arund a mudimu akad kwitiyij.
7 Tushinshikinany chilakej chimwing. Ov, udi muntu mukurump usotila kusangaresh muchim wa Yehova? (Jinswir 27:11) Anch mwamu, tukujikitishin. Pakwez tong bil anch arund amwing a mudimu akwinkish diladikij uya nau ku masengan makusadika. Asangaredin nakash kwikal ney ku mudimu ni asotil wikal murund nau ni pol pa mudimu. Ukutwish kwikal nich chovil chikash anch antu inay kadiap kwau ayimp. Akutwish pamwing ap kwikal nich ngikadil yimwing yiwamp. Chom ik ukusala? Ov, kudi ubaj wa kwitiyij diladikij diau? Mutapu ik Dizu dia Nzamb dikutwisha kukukwash kukwat mupak uwamp pa mulong winou?
8. Yijil ik ya Bibil yitukwashina kutongin pa mulong wa urund?
8 Tushinshikinany yijil yimwing ya Bibil. Cha kusambish chikutwisha kwez mu manangu chidi mu 1 Korint 15:33, chilondila anch: “Urund uyimp ukat kuyipish yaku yiwamp.” Ov, kulondul chijil chinech kwitin uyiyepa kamu antu akad kwitiyij? Bibil wakwil chipul chinech anch kimwawiyap. Oku, kambuy Paul amwinend wayimekeshina rukat ni kalimish “antu awonsu,” pamwing ni akad kwitiyij. (1 Korint 9:22) Ukristu win kamu witin anch tuyisangera antu akwau—pamwing ni antu akad kwitiyij yitiyij yetu. (Rom 10:13-15) Chakin kamu, mutapu ik lel tukutwisha kulondul chiyul cha kuyisadil “antu awonsu nawamp” anch twiyauril kudiokal kudi antu aswiridina ukwash wetu?—Galatia 6:10.
9. Chiyul ik cha Bibil chitukwashina kwikal isikena mu urund wetu ni ambay netu a midimu?
9 Pakwez, padi kushalijan kujim pakach pakwikal mwin masip ni murund wa mudimu ni kwikal murund nend wa pa muchim. Pa mulong winou pawiy tuvurikininga chijil chikwau cha Bibil. Kambuy Paul wayibabesha in Kristu anch: “Kangal wabwalakanany ni antu akad kwitiy.” (2 Korint 6:14) Mazu “kangal wabwalakanany ni antu akad kwitiy” marumburikin ik? Yikarumun yimwing ya Bibil yikarumwin mazu mina anch “kangal wabombakanany,” “kangal wasalany mudimu pamwing mudi ambay,” ap anch “kangal watany urund wakad kufanyin.” Chisu ik chidinga chiyimp kuta urund ni mbay a mudimu? Chisu umatikininga mimbu ni kwikal urund wakad kufanyin? Bibil, Dizu dia Nzamb, ukutwish kutakel ruzau rey mu mwikadil winou.
10. (a) Mutapu ik watonday Yesu arund? (b) Yipul ik yikutwisha kumukwash muntu kukwat mipak yiwamp piur pa arund?
10 Tushinshikinany chilakej cha Yesu, kudiosh pa chisu chamutangau muntu ni kuya kurutu, wayikata nakash antu. (Jinswir 8:31) Padingay panap pansh, wata urund wa piswimp ni in kwilej end. (Yohan 13:1) Ndiy “wamukata” ikundj umwing wadinga ushadikina mu relijon. (Marko 10:17-22) Pakwez kand Yesu wateka kushalijan pa mutapu watonday arund nend a pa muchim. Kadingap nich urund wa piswimp ni antu adinga alikina kusal rusot ra Tatukwend. Dichuku dimwing, Yesu walonda anch: “En udiany arund nam anch wasalany yom [nikulejinany].” (Yohan 15:14) Inge, ukutwish kwiyov nawamp pamwing ni mbay kanang wa mudimu. Pakwez iyipula anch: ‘Ov, muntu winou usotil kusal yalonday Yesu kusal? Ov, usotil kwilej amwijika Yehova, watulejay Yesu anch ndiy kusu tufanyidina kwifukwil? Ov, ukwet yijil ya ngikadil mudi yamam chinidia mwin Kristu?’ (Mateu 4:10) Piukata kwisamb ni mbay ney wa mudimu ni kukasikeshin pa kusadil yijil ya Bibil, ukez kuman patok yakul ku yipul yiney.
11. Jimbul mikadil mukutwisha mazu ma Nzamb kutakel jinzau jetu.
11 Kudi mikadil yikwau yivud mukutwisha mazu ma Nzamb kwikal mudi chitokish ku mend metu. Chilakej, akutwish amwinkish mwin Kristu wakad mudimu, mudimu uswiridinay. Pakwez, program udi mukash, ni anch witiyij kusal mudimu, ukusambish kuburenang ku yikumangan kanang ya Ukristu ni kuburen ku mijikit yikwau ya difukwil diakin. (Kuseng 37:25) Mwin Kristu mukwau ukutwish pamwing ap kwikal mu choziu chikash cha kwipuwangesh kumwing kujirila yijil ya Bibil. (Efes 4:17-19) Mukwau niyend ukutwish kujiman mulong wa kurumbuk kwa ambay akaritiy. (Kolosay 3:13) Mu mikadil yiney yawonsu, tufanyidin kulikin Dizu dia Nzamb dikal chitokish ku mend metu. Chakin kamu, kusutil ku kulondul yijil ya Bibil, tukutwish kupandakan chikokujol ap chisu mu mwom. Dizu dia Nzamb didi dia “kuyilej antu kuyibabesh ni kuyitenchik, ni kuyilej kwirijek mu kutentam.”—2 Timote 3:16.
“Chimunyik Mwi Njil Yam”
12. Mazu ma Nzamb madi nchik chimunyik cha njil yetu?
12 Kuseng 119:105 ulondil kand anch mazu ma Nzamb makutwish kwikal chimunyik mwi njil yetu, matokishin kurutu kutuyila. Kitudiap mu mididim bwi piur pa machuku ma kurutu, mulong Bibil ulejen chirumburikina mikadil ya mar yidia mu mangand ni chikwikala chibudikin. Mwaning, twij anch tushich mu “machuku ma kwisudiel” ma ditenchik dined diyimp dia yom. (2 Timote 3:1-5) Kwijik kwetu yidia kurutu kufanyidin kwikal nich usu ukash pa mutapu tushicha ilel. Kambuy Pita wafunda anch: “Talany mudi yom yiney yawonsu yikujiy, en ufanyidinany kushakam mu yom yiwamp ni yom yawonsu yitumbila; lamatinany kuchingej dichuku dia kumekan kwa Nzamb!”—2 Pita 3:11, 12.
13. Mutapu ik ufanyidina kuya swa kwa yisu kwikal nich usu pa yitongijok ni mashakamin metu?
13 Yitongijok yetu ni mashakamin metu yifanyidin kumekesh kwitiyij kukash anch “ngand [yisutil], ni maku mau.” (1 Yohan 2:17) Kusadil yijil ya Bibil kutukwashin kukwat mipak ya manangu piur pa jintong ja kurutu. Chilakej, Yesu walonda anch: “Pakwez sambilany bil kusurib want wend ni kutentam kwend, chawiy lel yom yawonsu akez kananzukeshilip.” (Mateu 6:33) Chidi cha musangar mudi ik pa kuyiman ansand avud chitiyijinau mazu ma Yesu kusutil ku kusal mujikit wa chisu chawonsu! Akwau—pamwing ni majuku ma kabuj—ayil kwa kusokin mu jingand muswiridinau nakash in kulejan a Want.
14. Dijuku dimwing dia Ukristu diarumburila nchik mujikit wau?
14 Tushinshikinany dijuku dimwing dia in Kristu anying dia diokala mu États-Unis diaya mwi Ngand ya Dominiken kusadil pamwing ni chikumangen chadinga mu musumb mwadinga antu 50 000. Chikumangen chikwet in kulejan a Want piswimp 130. Chikwau, pa Ndol 12, 2006, antu piswimp 1 300 akumangana ku Chivurikish cha rufu ra Kristu! Chingand mu mwab winou ‘chatokin kal, chashikedin kal pa kwangul’ kwinyim kwa mivu yitan kusu, tatuku winou, maku, ni mwan ikundj, ni changadim wau atakela uvud wa malejan ma Bibil 30. (Yohan 4:35) Tatuku urumburil anch: “Chikumangen chadinga ni akadivar ni anambaz 30 adiokala kwidjing kwez kupan ukwash. Piswimp antu 20 adiokil mu États-Unis, ni akwau ashadilaku adiokala mu Bahamas, Canada, Espagne, Italie, ni Nouvelle-Zélande. Eza ni impu yikash ya kusal mujikit ni ikadil kal nich chibudikin chiwamp pa musangar wa akadivar.”
15. Yiyukish ik watanina kal mulong wa kutek yisakin ya Want pa ndond ya kusambish mu mwom wey?
15 Choviken, anch antu avud kakutwishap kushemunikin mwi ngand yindjing mulong wa kusadil kwi ndond kudia maswir makash. Pakwez in akutwisha—ap akutwisha kutenchik mikadil yau chakwel ikala tayad—chakin kamu akez kuman yiyukish yivud yidiokila ku kusal mujikit mu mutapu winou. Chikalap nchik kwi ndond kuusadidila, kangal waburen kwisakin musangar ukutwisha kwikal nich piumusadidila Yehova ni usu wey wawonsu. Anch watek yisakin ya Want pa ndond ya kusambish mu mwom wey, Yehova ushidilamu “kukupungurilany chiyukish kushik ni pakuburena kuswir.”—Malakiy 3:10.
Kutaninamu mu Umutakel wa Yehova
16. Ov, mutapu ik tukeza kwisakin anch twalik mazu ma Nzamb matutakela?
16 Mudi mutwamana kal, mazu ma Yehova makat kututakel mu mitapu yikwau yaad. Madi mudi chitokish ku mend yetu, matukwashin kuya kurutu mwi njil yitentamina ni kututakel pa chisu tufanyidina kukwat mipak. Ni chidi chimunyik mwi njil yetu, dikat kututwishish kuman nawamp yidia kurutu. Chawiy lel, chikata kutukwash kutesh chiyul cha Pita chalonday anch: “Djalany may ma manangu men, ikalany zong, tekany ruchingej ren ku ranaken raniletilanyau ku kuburik kwa Yesu Kristu.”—1 Pita 1:13.
17. Ov, mutapu ik kwilej Bibil kutukwashininga kulondul umutakel wa Nzamb?
17 Chakin kamu anch Yehova ututakedin. Chadi chipul chidi ech, Ov, ukez kuuziyil? Chakwel kutesh umutakel wa Yehova, ikwatina mupak wa kutang chikunku cha Bibil dichuku ni dichuku. Tongijokin pa yiutangina, pakish kujingunin rusot ra Yehova mu milong, ni tongin mu mitapu yikwau yom yiukutwisha kusadil mu mwom wey. (1 Timote 4:15) Kupwa sadilany “usu wa manangu” men piukwatinany mipak yen.—Rom 12:1, NW.
18. Anch twalikin Dizu dia Nzamb ditutakela, yuyikish ik tukutambula?
18 Anch twayishil ndond, yijil yitutanina mu Dizu dia Nzamb yikez kutumunyikin ni kutwinkish umutakel utuswiridina pitukwatina mipak piur pa mashakamin ma mwom uwamp. Tukutwish kuchingejin anch mazu ma Yehova mafundau makat “kuyibabesh ayisup.” (Kuseng 19:7) Anch twamulik Bibil atutakela, tukuyukishiu nich kom kishitwila ni musangar udiokilinga ku kumusangaresh Yehova. (1 Timote 1:18, 19) Anch twalik mazu ma Nzamb matakela jinzau jetu dichuku ni dichuku, Yehova ukez kutuparij nich chiyukish chipandikenamu cha mwom wa chikupu.—Yohan 17:3.
Ov, Uvurikin?
• Ov, mulong wak chidia cha usey kumulikin Yehova Nzamb atakela nzau jetu?
• Mwi njil ik mukutwisha mazu ma Nzamb kwikal chitokish ku mend metu?
• Ov, mutapu ik ukutwisha mazu ma Nzamb kwikal chimunyik mwi njil yetu?
• Kwilej Bibil kukutukwash nchik kulondul umutakel wa Nzamb?
[Chipich chidia pa paj wa 19]
Ov, chisu ik tufanyidinap kuta urund ni muntu wakad kwitiyij?
[Chipich chidia pa paj wa 20]
Arund a pa muchim a Yesu adinga in asalanga rusot ra Yehova
[Chipich chidia pa paj wa 21]
Ov, mashakimin ma mwom wetu mamekeshin anch tutekin yisakin ya Want pa ndond ya kusambish?