Ov, Wij?

In manangu ilejina yom ya atutumbu eza chisu ik kumutal Yesu?

Mu Rusangu Ruwamp rafunday Mateu, atulejin anch: “in manangu amwing ilejina yom ya atutumbu, adiokala kwingangel” eza kumutal Yesu, amuletina yipan. (Mateu 2:1-12, MM) Uvud wa in manangu ilejina yom ya atutumbu, ap anch “in manangu,” eza kumutal mwan Yesu wijikenap, ni kwikil pa kwengamin mudi malejan ma ashankur malejena anch adinga asatu; ap majin mau kamajimbwilap mu rusangu ra Bibil.

New International Version Study Bible ulondil mu Mateu 2:11 anch: “Chinyim nich chishankur, in Manangu kezap kumutal Yesu pandingay mu madil pa uchuku wavadikay mudi mwayau atufung. Eza kwinyim kwa angond ni amumana mudi ‘mwan’ mu ‘chikumbu’ chend.” Chom chinech chambaten nich yasalay Herod, pasotay kumujip mwan, ndiy wapana mbil ya kuyijip ansangarum awonsu kusambishil pa akweta mivu yaad kushirik pansh adinga mu Betlehem mwawonsu ni miab yend. Watongina reng riner ra mivu kusutil ku kupampish “ashikena kal ku mivu yaad ni a pakach a pa muten wijikinay kudi in manangu ilejina yom ya atutumbu.”—Mateu 2:16.

Anch in manangu ilejina yom ya atutumbu inay aya kumutal Yesu pa uchuku wavadikay ni kumuletin milambu ya or ni yipau yikwau ya usey, ing Mariy kelap kulambul atujil aad kwinyim kwa machuku 40 pamuletay Yesu ku tempel mu Yerusalem. (Luka 2:22-24) Chom chinech chadinga ditenchik dia Chijil mulong wa atuzwendj akad kutwish kuman mwan a mukoku. (In Levi 12:6-8) Pakwez, yipan yiney ya usey yela kuyikwash ni kuyitwishish kuman nfalang mulong wa dijuku dia Yesu kushal mu Idjibit.—Mateu 2:13-15.

Ov, mulong wak Yesu wasutisha machuku manying kurutu aya kwi nzay ya Lazar?

Chakin, chimeken anch mwamu mwatenchikay Yesu milong. Mulong wak tukutwisha kulond mwamu? Tushinshikinany rusangu ridia mu Yohan shapitre wa 11.

Padingay Lazar mu Betaniya ni wadinga murund wa Yesu, wayela nakash, anambaz end amutumina Yesu mazu. (Verse wa 1-3) Pa kusut kwa chisu, kwadingay Yesu pa chisu chinicha wela kusal machuku maad kudiokal kwinikwa kuya ku Betaniya. (Yohan 10:40) Chakin kamu Lazar wafa pa chisu chinicha kamu pateshay Yesu rusangu. Yesu wasala nchik? Ndiy “wajingila kwi ndond yadingay machuku maad,” ni kupwa watumbuka waya ku Betaniya. (Verse wa 6, 7) Chawiy, ku kuchingel machuku maad ni kupwa kuya weny wa machuku maad, washika kwi nzay kupwa kwa machuku manying ma kufa kwa Lazar.—Verse wa 17.

Kurutu, Yesu wasala yilay ya disanguk yaad—chimwing kupwa kwa rufu ra muntu ni chikwau chisu chikemp pa dichuku dia rufu. (Luka 7:11-17; 8:49-55) Ov, ukutwish kumuvumbul muntu wafa pasutil kal machuku manying ni mujimbu wend wadinga wasambish kal kuvund? (Verse 39) Chisangareshin, referans wa Bibil ulondil anch pakach pa in Yuda padinga chitiyij anch “kwadingap ruchingej kudi muntu wadinga wafa kal machuku manying; mulong kand mujimbu wadinga wasambishin kal kuvund, ni mupim, wadinga watwik kal kudiokal mu mujimbu mu machuku masatu, wadinga wayil kal.”

Anch amwing pakach pa antu adingaku kwi nzay adinga idjidjekin, ading ni kusot imenap ayinau usu ukwetay Yesu pa rufu. Pimanay kurutu kwa chis cha nzay, Yesu wabarika anch: “Lazar, budik.” Kupwa, “wadinga mufu wabudik.” (Verse wa 43, 44) Divumbuk, didiap malejan ma makasu malejena anch mupim ufilingap, didi ruchingej rakin piur pa afu.—Ezekiel 18:4; Yohan 11:25.