Nzamb Udi Nany?

OV, UKUCHAKUL nchik chipul chinech? Antu amwing atongin anch amwij Nzamb nawamp—anch udi murund nau wa piswimp nakash. Akwau niyawiy amumening Nzamb mudi muntu umwing udia kulemp. Itiyijining anch udiaku pakwez ij yom yikemp piur pend. Anch umwitiyijin Nzamb, ov, ukwakul nchik ku yipul yilondwilaku ey?

1. Ov, chakin kamu Nzamb udi muntu?

2. Ov, Nzamb ukweting dijin?

3. Ov, Yesu udi Nzamb Mwin Dikand Diawonsu?

4. Ov, Nzamb winbangidin?

5. Ov, Nzamb witiyijin mitapu yawonsu ya kwifukwil?

Anch wayipul antu akwau chakwel ayakula yipul yiney, ukutwish washimok pa ukutesha yakul kushalijan. Kichishimokishinap, anch kudi jingany ni yitongijok yiyimp yipalangena piur pa Nzamb.

Yakul Yidi ya Usey

Pisambay Yesu Kristu ni mband watanijanay nend ku dijiy dia mem pa mulong wa relijon, ndiy wakasikeshina maswir ma kwijik uyakin piur pa Nzamb. Mband winou mwin Samariy witiyija anch Yesu wadinga muprofet. Pakwez kwadinga chom kanang chamurumbangesha manangu. Relijon wa Yesu wadinga ushalijadina ni wendendiy. Pabundishay patok chitongijok chinech, Yesu wamuleja patok anch: “En ukat kwifukwilany yiwakadiany kwijik.” (Yohan 4:19-22) Chakin kamu, Yesu walejana anch kadiap antu awonsu adia mu relijon amwija chakin kamu Nzamb.

Ov, mazu ma Yesu marumburikin anch kwikil muntu ap umwing ukutwisha wamwijik Nzamb? Bwat. Yesu wadandamena nich kumulej mband anch: “Pakwez muten ukez kwez, ni katat udi kal kwaku, in kumwifukwil akin akez kamwifukwil Tatuku mu [spiritu] ni uyakin, mulong Tatuku ukat kusot adia mwamu ang kwikal in kumwifukwil end.” (Yohan 4:23) Ov, udi umwing wa antu amwifukwidila Nzamb “mu [spiritu] ni uyakin”?

Chidi cha usey kudi ey kwijik chakul ku chipul chinech. Mulong wak? Yesu wakasikeshina maswir ma kwikal nich ronganyin rakin pa chisu chalembilay anch: “Kupand kwin kwa chikupu kwawiy oku, chakwel akwijika ey Nzamb wakin, ni watuma ey, ndiy kamu Yesu Kristu.” (Yohan 17:3) Mwaning, ruchingej rey rin kamu ra mwom wa machuku ma kurutu rengamidin pa ronganyin rey ra uyakin piur pa Nzamb!

Ov, chitwishikin kamu kwijik uyakin piur pa Nzamb? Mwaning! Ov, mutapu ik ukutwisha kuwijik? Yesu wilondila amwinend pa mulong winou anch: “Yam njil ni uyakin ni mwom; kwikil ukwiyezila kudi Tatuku ching kudi am.” (Yohan 14:6) Walonda kand anch: “Kwikil umwing umwija Mwan mudiay, ching kwend Tatuku; ni kwikil umwija Tatuku mudiay, ching kwend Mwan, ni ndiy mwinau usotilay Mwan kumumekesh kudiay ndiy.”—Luka 10:22.

Chawiy chom cha usey chakwel kumwijik Nzamb chidi mu malejan ma Yesu Kristu, Mwan a Nzamb. Chakin kamu, Yesu ushidilamu anch: “Anch en washakamany mu dizu diam, chad wikalany in kwilej am akin; ni yen ukez kijikany uyakin, ni uyakin ukez kanikolany.”—Yohan 8:31, 32.

Ov, mutapu ik welay Yesu kwakul ku yipul yitan yitwiyipulang kwisambishil oku?

[Chipich chidia pa paj wa 4]

Ov, ukat kwifukwil Nzamb wakad ey kwijik nawamp?