Yehova Ndiy Ufanyidina Kushiman Kwetu
“Mushimanany Nzamb.”—KUS. 111:1.
1, 2. Dizu “Aleluya” dirumburikin ik, ni mutapu ik udisadidilau mu Mifund ya Grek ya Ukristu?
“ALELUYA!” Mazu minam tumoviling chisu chawonsu kudi in maegliz ma Kristendom. Antu amwing akat kumasadil mazu minam mulong wa kukasikesh mambamb ma pichuku pichuku. Pakwez, antu akemp kusu ija chimarumburikina, ni mashakamin ma antu akata kumusadil mamuletidinap Nzamb kalimish. (Titus 1:16) Ndinguril umwing wa Bibil urumburil anch “Aleluya,” didi “dizu diasadilau kudi in kufund kuseng kushalijan mulong wa kuyel antu awonsu inunga pamwing mu kumushiman Yehova.” Chakin kamu, ma Bibil mavud mafundau kudi in kwilej Bibil malondil patok anch “Aleluya” dirumburikin anch: “Mushimanany Yah.”
2 Choviken komb, mu Testament Musu ni Kuseng dizu dined mu Kuseng 111:1 akarumwin anch, “Mushimanany Nzamb.” Mutapu wa kufund wa Grek wa mazu minam umeken tupamp tunying mu Kuburik 19:1-6 pashimekinau mulong wa kusheshik kwa relijon wa makasu. Pichikeza chom chinech kusadik, in kwifukwil akin akez kwikal nich diyingishin diwamp dia kulond nich kalimish anch: “Aleluya.”
Midimu Yend Yijim
3. Risu rutong rijim ridiaku ra kukumangan kwetu chisu ni chisu?
3 Muntu wafunda Kuseng wa 111 utwinkishin mayingishin mavud malejena mulong wak Yehova ufanyidin anch tumushimana etu awonsu. Verse wa 1 ulondil anch: “Am nikumujikitish [Yehova, NW] ni muchim wam wawonsu mu chiyul cha atentamina ni mu kukumangan kujim.” Mwamu mwiyovilingau ilel Atuman a Yehova. Rutong ra kusambish ra kukumangan kwetu chisu ni chisu, chikala mu yikumangen yetu ni kuyitentam yijim yijim, riding ra kumushiman Yehova.
4. Mu chilik ik mukutwishau antu kukimbijol mu midimu ya Yehova?
4 “Midimu ya [Yehova, NW] yidi yijim, yikat kushimokish antu awonsu ayikatila.” (Kus. 111:2) Shinshikin mazu “kushimokish.” Kukwatijan nich buku umwing, verse ukutwish wasadil nakash padi antu akata “kutongijokin nakash ni kwilej chikurikina” midimu ya Nzamb. Yitang ya Yehova yizwil too nich rutong rishimokishina. Ndiy wateka muten, divu, ni ngond pa jindond jau, yawonsu yiney yiyil mu kwovijan chimwing ni chikwau, mu chilik cha kwel anch divu dietu ditambula chirungul chiwanyidina ni chitokish, uchuku ni muten yifanyidina, yirung ni kwizul ni kuum kwa mem kufanyidina.
5. Chom ik chiyila kurutu mu mutapu wa kutesh yom yijinguninau mu mangand?
5 In siyans ajingunin kal mulong ujim piur pa ndond yidia divu mu dipang dia muten pamwing nich njil yiwanyidina, kujimb, ni kulim kwa katumb wetu mujim. Mutapu muyitenchikinau ni kwovijan kwa yitang yiney ya mwiur kwawiy kutwishishina ufun ni kuswimpijan kwa yirung. Ilej kal kand yom yikwau yivud piur pa usu wa chitangil mu mangand. Chawiy mu mutu wa mulong umwing ulondila anch: “Mangand ‘Matenchikau,’” mulej umwing wa moter walonda anch: “Chiswapel kwau kutesh mulong wak mu mivu 30 yasutila ey, in siyans avud ashikedin kal ku kukarumun yitongijok yau, itiyijin anch wadinga mulong ukash wa ritiy chakwel itiyija anch chikasiken kwitiyij anch mangand miyezina kwau aminam. Uman ulejena anch kudi muntu mwin manangu wamasala udi uvud nakash anch twashinshikin divu dietu.”
6. Ov, woviling nchik anch watongin pa mutapu wamusalau muntu kudi Nzamb?
6 Mudimu ukwau ujim wa kutang udi mutapu watutangay Nzamb. (Kus. 139:14) Payitangay antu, ndiy wayinkisha manangu, yid yivud chakwel mujimbu usala nawamp, ni wayinkisha kand ukaliweny ni usu wa kusal mudimu. Chilakej, chidi chilay chaletay Nzamb cha ukaliweny wa kulond ni kutesh, pamwing ni kufund ni kutang. Antu avud akwet ukaliweny winou. Udi kand chitang chamushena—kwiman kwey djing. Chishimokishin, rutong ni kwiman kwa mujimbu, usu wend wa kutwa yakudia yidilay ni kuyikarumun yikala usu, yikwatishen wom. Chipandakenamu, kunungijan kwa mijir yitwishishina wong wey ni yovil yey yisala mu mutapu umwing wakad kwikal ni chom chifanikena nich chasadilau kal in siyans. Chakin kamu, yom yawonsu yasadilau kal antu yitwishikin mulong wong udiaku ni yovil yidiaku yamwinkishau muntu. Kwikil moter ap umwing watenchikau ni ukutwisha kusal chom cha ufun chipandakenamu kuwap ni chikutwishau kusal mudi jimwat ej dikum jishimokishina nakash—miny yey ya ku makas. Iyipula amwiney, ‘Midimu ya ufun ya kusong ni kutung yikumbu yishimokishena, ov, ayisala pakad kusadil miny yatwinkishay Nzamb?’
Midimu Yijim ya Nzamb ni Ngikadil Yend
7. Ov, mulong wak tufanyidin tumana Bibil mudi umwing wa midimu yishimokishena ya Nzamb?
7 Mu midimu yijim ya Yehova mudi yom yikwau yishimokishena yayisadilay antu, mudi muyilejenau mu Bibil. Mukand winou wovijadin mu mutapu umwing ushimokishena. Pakad kwikal mudi mikand yikwau, chakin kamu winou ‘wadiokala ku spiritu wa Nzamb, ukutwish kuyilej antu.’ (2 Tim. 3:16) Chilakej, mukand wa kusambish wa Bibil, Disambishil, ulejen mutapu watokishay Nzamb divu padioshay tuyimp mu machuku ma Nowa. Mukand wa kaad, Kubudik, ulejen mutapu wamekeshay Yehova wi-Nzamb wend pa chisu chayikolay in Isarel kudiokal mu usuk mu Idjibit. Mwin kufund kuseng niyend wadinga nich yishiken yiney mu manangu chawiy chashikenay ku kulond anch: “Yisalijok [ya Yehova, NW] yamekesha kujimb kwend ni uyaj wend, kutentam kwend kushich chikupu. Ndiy wachitenchika chakwel akavurik midimu yend. [Yehova, NW] ukwet riy ni ranaken.” (Kus. 111:3, 4) Ov, witiyijinap kwey anch yisalijok ya Yehova mu rusangu rawonsu ra muntu, pamwing nich yom yisadilay mu mwom wey, yidi kwau chivurikish cha “kujimb kwend ni uyaj wend”?
8, 9. (a) Midimu ya Nzamb yishalijadin ni ya antu mu mutapu ik? (b) Ngikadil ik yimwing ya Nzamb yiusangaredina?
8 Shinshikin kand anch mwin kufund kuseng niyend ukasikeshidin pa ngikadil yishimokishena ya Yehova, mudi kutentam, riy ni ranaken. Wij nawamp anch midimu ya antu akayitil yengamidin pakemp pa kutentam. Chisu chivud yidi kwau yibudikin ya chibud, ris ni kwitutul. Chimekedin patok ku mat ma chisum masadilau antu chakwel atana nfalang ni mulong wa jinjit jisarumwinau, jiletina mar makash kulond ni yisal yiyimp yiyisadidilau antu a wer asheshinau. Chikwau, midimu yivud ya antu ayisadil nich rutong ra kuyimesh atuzweny mar. Chilakej chimwing chikutwishau antu avud kujimbul chidi cha kuyisadil asuk mulong wa kutung jinzay jijimbwilau anch mapiramid. Madingau ni kusadil mulong wa kuyijik Afarao adinga in kwitutul. Chikwau, midimu yivud ya antu adia aom ilel kiyiletinap ching kusu mar pakwez kand yikat “kushesh ngand.”—Tang Kuburik 11:18.
9 Yishalijadin mudi ik nich midimu ya Yehova, mulong yawiy yengamidining ching kusu pa yom yiwamp! Mu midimu yend mudi ditenchik dia ranaken dia kuyipandish antu akayitil. Patenchikay difut, Nzamb wadinga ‘ulejen kutentam kwend.’ (Rome 3:25, 26) Chakin kamu, “kutentam kwend kushich chikupu”! Piur pa ranaken, ramekeshay Nzamb mu mutapu wasalay ni antu akayitil. Pa yisu yimwing, wadinga ni kusal nau ni ranaken padingay ni kuyilembil chakwel akarumuka, adiokala ku jinjil jiyimp ni chakwel asala yom yitentamina.—Tang Ezekiel 18:25.
Ushinshamen ku Kushilamu Kwend
10. Chilakej ik cha kushinshaman chashay Yehova pantaliken nich kushilamu kwend ni Abraham?
10 “Ukat kupan yakudia kudi akata kumwov wom, ukat kuvurik kushilamu kwend mu yisu yawonsu.” (Kus. 111:5) Chimeken anch payom pinap mwin kufund kuseng wadinga wisambidin piur pa kushilamu nenday Abraham. Yehova washilamu kuyukish an a Abraham ni walonda anch akez kuswan yis ya akankuny nau. (Dis. 22:17, 18; Kus. 105:8, 9) Mu kuwanyin kwa kusambish kwa kushilamu kwinoku, an a Abraham ashikena ku kwikal muchid wa Isarel. Muchid winou wadinga pasak mu usuk mu Idjibit, pakwez “Nzamb wavurika manswik masukay nend Aburaham” ni wayikola. (Kub. 2:24) Mutapu wayisadilau kudi Yehova kumekeshin chakin kamu chidingay mwin riy. Wayinkisha yakudia ya ku mujimbu ni ya muspiritu mulong wa manangu ni michim yau. (Kuv. 6:1-3; 8:4; Neh. 9:21) Mu yitot ya mivu yalondulaku, muchid wadinga ching kulemp ni Nzamb, ap anch ndiy wadinga ni kuyitumin aprofet mulong wa kuyikasikesh chakwel akarumuka. Kwinyim kwa mivu 1500 ni kusut, kupwa kwa kuyikol in Isarel mu Idjibit, Nzamb wamutuma Mwan wa kuval kwend amwinend pa divu. Ayuda avud amulika Yesu ni amujipeshisha. Kupwa Yehova wasala muchid ukwau usu, wa muspiritu, “Isarel a Nzamb.” Pamwing ni Kristu, ni muchid winou asadil mbut ya muspiritu ya Abraham, yalondilay Yehova anch ukez kuyisadil mulong wa kuyiyukish nich antu awonsu.—Gal. 3:16, 29; 6:16.
11. Mutapu ik udandamedinay Yehova “kuvurik kushilamu kwend” nend Abraham?
11 Yehova udandamedin “kuvurik kushilamu kwend” ni yiyukish yikwezinaku. Ilel, uletin yakudia yivud ya muspiritu mu jindim 400 ni kusut. Ni udandamedin kamu kwakulang ku malembil metu piur pa maswir metu ma ku mujimbu, kukwatijan nich mazu manam: “Itwinkisha yakudia yetu ya pichuku pichuku.”—Luka 11:3; Kus. 72:16, 17; Isay 25:6-8.
Usu Wamushena wa Yehova
12. Mu mutapu ik wamwinkishau Isarel wa pasak “uswan wa michid”?
12 “Wamekesha usu wa midimu yend kudi antwend, payinkishay uswan wa michid.” (Kus. 111:6) Shinshikin chinship chimwing chijim mu rusangu ra Isarel chadinga pamwingap chivurikinay mwin kufund kuseng, chikutwish chikal mutapu wamushena wayikolau mu Idjibit. Chisu Yehova chayitwishishay in Isarel kwandam mwi Ngand ya Kushilamu, atwisha kuwin mant madinga kwingangel ni kurand kwa Wiit wa Yordan. (Tang Nehemi 9:22-25.) Inge, Yehova wamwinkisha Isarel “uswan wa michid.” Kumekesh usu wa Nzamb kwamushena mudi ik!
13, 14. (a) Kumekesh kwa usu ik wamekeshay Nzamb piur pa in Babilon kwadingay nich mwin kufund kuseng mu manangu? (b) Yisal ik yikwau ya kuyikol antu yasalay Yehova?
13 Twij nawamp win kamu anch, chikalap nchik yom yawonsu yamusadilau kudi Yehova, Isarel kamulimishap ap kuyilimish kusu angakau Abraham, Isak, ni Yakob. Adandamena nich kumubwambwil djat ni pezay Nzamb kumusadil Babilon ayikwata ni ayitwala mu uyong. (2 Jins. 36:15-17; Neh. 9:28-30) Anch, mudi mulondilau in kwilej Bibil amwing anch, mwin kufund Kuseng wa 111 wadingaku kupwa kwa Isarel kudiokal mu uyong wayau mu Babilon, komb adinga nich diyingishin dikwau dia kumushiman Yehova mulong wa kushinshaman kwend ni mulong wa usu wend. Nzamb wayimekesha yom yiney payikolay Ayuda kudiokal mu Babilon—muchid umwing wadinga nich chaku chakad kuyilikishangaku aswik au.—Isay 14:4, 17.
14 Pa kusut kwa mivu yitot yitan, Yehova wausadila usu wend mwinjil yimwing yijim nakash pa kuyikol antu akarumukina kudiokal ku usuk wa chitil ni rufu. (Rome 5:12) Chibudikin chimwing chadinga anch chis chanzurika mulong wa antu 144000 chakwel ikala in kwilej azizidilau many a Kristu. Mu muvu wa 1919, Yehova wasadila usu wend chakwel ayikola atushal akemp a antu inay azizidilau many kudiokal mu usuk wa relijon wa makasu. Yom yisadilau mu chisu chinech cha kwisudiel yidi mulong wa usu wa Nzamb. Anch ashinshaman ni ku rufu, akez kuyikel pamwing ni Kristu mwiur pa divu diawonsu mulong wa kuwap kwa antu akarumukina. (Kubur. 2:26, 27; 5:9, 10) Akez kuswan ngand mu mutapu upandakena chasalau in Isarel.—Mat. 5:5.
Yijidik Yitentamina, ya Chikupu ni Chikupu
15, 16. (a) Yik yidia mu midimu ya makas ma Nzamb? (b) Yijidik ik yayinkishau in Isarel kudi Nzamb?
15 “Midimu ya makas mend yawiy uyakin ni kutentam, yijidik yend yawonsu yidi yikash, yishich chikupu ni chikupu, mulong ayisadila mu uyakin ni kutentam.” (Kus. 111:7, 8) Mu “midimu ya makas [ma Yehova]” mwadinga masalet maad ma mayal pafundau yijil dikum yijim mulong wa Isarel. (Kub. 31:18) Yijil yiney, pamwing nich yijidik yikwau yikala yawonsu Chijil cha manswik cha Moses, yengamidin pa yijidik yitentamina, ya chikupu.
16 Chilakej, chimwing cha yijidik ap anch yijil, chadinga pa masalet minam chadinga chilondil anch: “Am, [Yehova] Nzamb wey, nidi Nzamb wa mukau.” Chilondil kand anch Yehova ukat kumekesh “rukat [rend] kudi antu tunan ni tunan [amukatila], awiy kamu akata kulam yijil [yend].” Pa masalet minam ma mayal padinga kand yijidik yikwau yiney yifanyidina mudi “limish tatukwey ni makwey” ni “kangal wiy,” pamwing ni chijil chikurikina nakash pantaliken nich kwovang ris mulong wa mapit ma antu akwau.—Kub. 20:5, 6, 12, 15, 17.
Mukol Wetu Utumbila, Ukwatishena Wom
17. Mayingishin ik madingau nich in Isarel ma kumen dijin dia Nzamb anch ditumbil?
17 “Watuma kukol kudi antwend, waswika manswik mend ma chikupu; dijin diend ditumbil, dikwatishen wom.” (Kus. 111:9) Kakwau kand, mwin kufund kuseng umeken anch wadinga nich mu manangu kushinshaman kwa Yehova ku manswik mend ma kushilamu nenday Abraham. Kukwatijan nich, Yehova kayidjibwilap kwa antwend mudi asuk mu Idjibit wa pasak ni mudi amayong mu Babilon. Mu yawonsu yaad, Nzamb wayikola. Ap anch mulong wa yom yiney yaad yasadika, Isarel wadinga ufanyidin kudiman dijin dia Nzamb anch ditumbil.—Tang Kubudik 20:7; Rome 2:23, 24.
18. Ov, mulong wak utongina anch didi dilau kwipil dijin dia Nzamb?
18 Mwamu chidia kand ku mutambu wa in Kristu ilel, alandau kudiokal mu uswik wakad ruchingej wa chitil ni rufu. Tufanyidin tusala usu wetu wawonsu kukwatijan nich chom cha kusambish chitinau mu malembil ma sampul anch: “Dijin diey aditumbish.” (Mat. 6:9) Kutongijokin pa dijin dined ditumbila kufanyidin kutushikij ku kumwov Nzamb wom. Mwin kufund Kuseng wa 111 wadinga nich chitongijok chiwamp piur pa kumwov Nzamb wom, ndiy walonda anch: “Wom wa Nzamb udi disambishil dia chiyul. Ni mwawonsu ukulam yijil yend ukwet ronganyin.”—Kus. 111:10.
19. Chom ik tukeza kwilej mu mutu wa mulong wambakedinap ou?
19 Kumwov Nzamb wom chakin kamu kutukwashining tukisa yom yiyimp. Ukutukwash kand twimburija ngikadil yipandakena kuwap ya Nzamb mudi muyilejenau mu Kuseng wa 112, utukushinshikina mu mutu wa mulong wambakedinap ou. Kuseng kwinoku kulejen mutapu tukutwisha kuwanyish yitinau chakwel twikala mukach mwa mamiliyon ma antu akeza kusanger kumushiman Nzamb chikupu. Ndiy ufanyidin chom cha usey nakash. “Uyaj wend ushiching chikupu!”—Kus. 111:10.
Yipul ya Kutongijokin
• Ov, mulong wak Yehova ndiy ufanyidina etwawonsu tumushimana?
• Ngikadil ik ya Yehova yimekedina mu midimu yend?
• Ov, mutapu ik umeninga dilau dia kwipil dijin dia Nzamb?
[Chipich chidia pa paj wa 20]
Rutong retu ra kusambish pitukata kukumangan ridi ra kumushiman Yehova
[Chipich chidia pa paj wa 23]
Yijil yawonsu ya Yehova yengamidin pa yijidik yitentamina, ya chikupu