Yitukwilejina Kudiay Yesu

Piur pa “Disudiel”

Chom ik chikeza kusul?

Yesu amwipula kudi in kwilejend anch: “Chijingidij ik chikeza kulejan chisu cha kushik kwey, ni cha disudiel dia mangand?” (Mateu 24:3, MM) Pakulay ku chipul chinech, Yesu kalondap anch divu dikez kusul. Pa kusambish, wisambina piur pa ditenchik dia “mangand” ni wasadila mazu chakwel isambina piur pa ditenchik dia mafef ni dia relijon diyikedilay Satan. (Mateu 13:22, 40, 49) Diawiy ditenchik diadingay nich mu manangu pa chisu chalonday anch: “Disudiel chidikweza.”—Mateu 24:14.

Yesu warumburila disudiel mutapu ik?

Disudiel dia ditenchik dined diyimp didi “rusangu ruwamp.” Yesu walonda anch: “Chifanyidin Rusangu Ruwamp ra Want wa Nzamb ez arulejan bil ku mangand mawonsu ni kwikal uman kudi antu a michid yawonsu, chad lel disudiel dia mangand dieza.” Yesu warumburila disudiel dia ditenchik dia yom dia katat mu mutapu unou: “Mulong mar ma machuku minima makez kwikal mayimp, kupandakan mar mamanau antu kudiokal ku disambishil dia mangand kushik ni katat. Kukez kwikalap kand mar ma mutapu winou chikupu. Pakwez Nzamb watonda kal kukepish kuvul kwa machuku minam. Anch ndiy kasalap mwamu, ing kwikil muntu wela kupand.”—Mateu 24:14, 21, 22, MM.

Nany ukezau kushesh?

Ching antu amukisina ni akad kumusadil Yehova ni Yesu awiy akezau kushesh. Antu inay kakatap kumuziyil Nzamb. Yesu walonda anch: “Mudi muchadinga pa machuku ma Noa, mwamu muchikeza kikal kwez kwa Mwan a muntu. Mulong mu machuku minima kikwadingap kal mabeb, . . . awiy kijikap ni pimeza mabeb mayijiyish awonsu shutit.” (Mateu 24:36-39) Yesu walonda anch antu avud adi mwinjil yitwadila ku disheshik. Pakwez, wayinkisha kashinsh anch kudi “kajil katentamina yitakedil ku kupand.”—Mateu 7:13, 14.

Chisu ik chikeza kusul ditenchik dined dia yom?

Pamwipulau piur pa chijingidij cha kwikalaku kwend “ni cha disudiel dia mangand,” Yesu wakula anch: “Muchid ukez kurish ni muchid ukwau, want ukez kurish ni want ukwau. Kukez kwikal kamungun ni kunyikek kwa ngand ku jindond jivud . . . kuyip kukez kuvulijan, chad rukat ra antu avud rukez kukep.” (Mateu 24:3-12, MM) Chawiy lel, jinsangu jawonsu jiyimp jidiaku ilel jitukasikeshin mulong jirumburikin anch—piswimpap kamu winyikel wa Want wa Nzamb ukuyiletin chisambu antu in kuziyil. Yesu walonda anch: “Chawiy kand mwamu kudi en, anch wamanany yom yiney yasut, ijikany kamu anch want wa Nzamb udi piswimp.”—Luka 21:31.

Chom ik ufanyidina kusal?

Yesu walonda anch Nzamb “wapana Mwanend wa kuval kwend umwing chakwel mwawonsu ukwitiya kudiay ndiy kakujiyip, pakwez ukwet kal mwom wa chikupu.” (Yohan 3:16) Chakwel umekesha ritiy mudiay Nzamb ni Mwanend, uswirikedin uyijika nawamp. Chawiy chalonday Yesu anch: “Kupand kwin kwa chikupu kwawiy oku, chakwel akwijika ey Nzamb wakin, ni watuma ey, ndiy kamu Yesu Kristu.”—Yohan 17:3.

Dimuk, chakwel yakamish ni milong kangal yikukangesha kwilej mutapu wa kumekesh anch umukatin Nzamb. Yesu walonda anch: “Dimukany en ayinen, palemp michim yen . . . [yez yachinchik ni] yom ya mwom winou, ni dichuku dinidia dikwez kudi en mudi kwoz kwa chilemb.” Anch watesh chiyul chinech cha Yesu, “ukupandakanany ni kurezik mu yom yiney yawonsu yikeza kez.”—Luka 21:34-36.

Mulong wa kutan jinsangu jivud pa rusangu riner, tal shapitre wa 9, ulondila anch: “Ov, Tudi mu ‘Machiku ma Kwisudiel’?,” mu buku Chom Ik Chakin Kamu Chifundishinay Bibil?a

[Dizu didia Kwishin kwa paj]