Mwimburijany Yesu —Lejanany Ni Rukat

“Pikil muntu walondap kal mudi chikat kulonday muntu mwinou.”—YOH. 7:46.

1. Mutapu ik wadingau nikusal antu pateshau malejan ma Yesu?

TONGIJOKIN mutapu chikutwisha kwikal chisangareshina anch wamutesh Yesu chilejenay! Bibil utulejin yibudikin ya malejan mend padiau antu amutesha. Chilakej, Luka mwin kufund Rusangu Ruwamp ulondil anch antu adinga mu ul umwing ni Yesu “ashimoka mulong wa mazu ma ranaken mabudika mukan mwend.” Mateu ufundil anch antu amutesha Yesu padingay ni kulejan Malejan ma pa Mukandu “[ashimoka] ku malejan mend.” Yohan niyend ulondil anch amakurump a amasalay atumau chakwel amukwata Yesu achirika pakad Yesu, ni alonda anch: “Pikil muntu walondap kal mudi chikat kulonday muntu mwinou.”—Luka 4:22; Mat. 7:28; Yoh. 7:46.

2. Mitapu ik ya kulejan nich yasadilay Yesu?

² Amakurump a amasalay inay kidimbap. Yesu wadinga chakin kamu Mulej mujim wa yirung yawonsu. Wadinga ni kulejan yom zwang, yiswapela, ni yovikena. Wasadila nich manangu yilakej ni yipul. Wambatanisha malejan mend ni antu adingay ni kulej, ikalap atumbila ap bwat. Uyakin wadingay ni kulejan wadinga uswapel kutesh ni ukurikina. Pakwez, yom yiney kusu kiyamwikadishap Yesu Mulej mujim mudi mwadingay.

Rukat—Ngikadil ya Usey

3. Mudi mulej, mutapu ik ushalijadijanay Yesu ni antakel a relijon adingaku pa chirung chend?

³ Mukach mwa in kufund nau Afarise, mwadinga amakundj in manangu adinga nich ronganyin ni ukaliweny wa kurilejan. Chom ik chasala anch mutapu wa kulejan wa Yesu wikala ushalijadina ni wa Afarise? Antakel a relijon a pa chirung chinicha kadingap ayikatina antu adinga amekena mudi a chamwamu. Pakwez, adinga ni kuyipipesh, ayimananga mudi “ayishingil kal.” (Yoh. 7:49) Pakwez, Yesu wayovila riy, mulong adinga “ni kutambitamb ni kupalangan mudi amikoku akad kafung.” (Mat. 9:36) Wadinga mwin chirungul, mwin riy ni mwin ranaken. Chikwau, antakel a relijon kadingap amukatina Nzamb chakin kamu. (Yoh. 5:42) Pakwez, Yesu, wamukata Tatukwend ni wasangera kusal rusot rend. Antakel a relijon adinga ni kurumbangesh mazu ma Nzamb mulong wa kuwanyish maswir mau pakwez Yesu wadinga ukatin “dizu dia Nzamb”—wadilejana, wadirumburila, wadichidija ni washakama kukwatijan nich. (Luka 11:28) Inge, Kristu wamekesha rukat rijim mu mwom wend wawonsu, rawiy ratakela yom yafundishay, mu mutapu wayisadilay antu ni mutapu wayilejay.

4, 5. (a) Ov, mulong wak chidi cha usey kulejan nich rukat? (b) Mulong wak ronganyin ni ukaliweny yidi ya usey pa chisu tulejena?

⁴ Ov, chidi nchik ku mutambu wetu? Chitudia in kwilej a Kristu, tuswirikedin kumwimburij mu mudimu ni mu mwom wetu. (1 Pita 2:21) Chawiy lel, rutong retu kiridiap ching kusu kulejan ronganyin ra Bibil pakwez kand ridi ra kumekesh ngikadil ya Yehova, pakampwil rukat rend. Twikala nich ronganyin rijim ap rikemp, ukaliweny uvud wa kulejan nich ap ukemp, rukat tukumekesha rikez kutukwash kupukun ku michim ya antu tulejina. Chakwel anch tusala nawamp mudimu wa kwikadish in kwilej, tufanyidin tumwimburija Yesu kusutil ku kulejan nich rukat.

⁵ Chakin kamu, chakwel kwikal alej awamp, tuswiridin twijika nawamp mutu wetu wa mulong ni tuswiridin kand ukaliweny wa kulejan nich ronganyin riner. Yesu wayikwasha in kwilej end chakwel ikala nich ronganyin ni ukaliweny, ni Yehova, kusutil ku dirijek diend, utukwashin twaka yom yiney yaad ilel unou. (Tang Isay 54:13; Luka 12:42.) Chikalap nchik mwamu, tufanyidin twikala nich rutong ra kulejan kichidiap ching kusu nich manangu metu pakwez nich michim yetu. Pakata ronganyin, ukaliweny ni rukat kusal pamwing, kukutwish kwikal chibudikin chisangareshina nakash. Mu jinjil ik jikwau mutukutwisha kumekeshin rukat pa chisu tulejena? Mutapu ik wasalay Yesu ni in kwilejend? El tushinshikinany.

Tufanyidin Tumukata Yehova

6. Mutapu ik tulondininga piur pa muntu utukatina?

⁶ Tukat kusanger kulond yom yitukatina. Pa chisu tulondila piur pa chom kanang chitukatina mu muchim wetu, tukwikal tusangera ni chifu chetu chikumekesh kuzangam ni chirungul. Mwamu chidinga pakampwil anch tukat kwisambin piur pa muntu utukatina. Chisu ni chisu, tusadiling usu wa kuyilej antu akwau yom yitwija piur pa muntu winou. Tukat kumutumbish, kumushiman ni kumuchidij. Tusadiling mwamu mulong tusotin anch antu akwau niyawiy eza kudi muntu winou ni asangera ngikadil yend.

7. Rukat ra Yesu mulong wa Nzamb ramumbachika asala ik?

⁷ Kurutu tukudisha rukat ra Yehova mu michim ya antu akwau, tufanyidin tumwijika ni tumukata bil ayinetu. Chikalap nchik mwamu, difukwil diakin diengamidin pa kumukat Nzamb. (Mat. 22:36-38) Yesu washa chilakej chiwamp. Ndiy wamukata Yehova ni muchim wend wawonsu, manangu mend mawonsu, mupim wend wawonsu ni usu wend wawonsu. Pamwingap wasutisha tutikit twa mivu mwiur pamwing ni Tatukwend wa mwiur, Yesu wadinga umwij nawamp. Kwikala chibudikin ik? Yesu walonda anch: “Am nimukatil Tatuku.” (Yoh. 14:31) Rukat riner ramekana mu yom yawonsu yalonday ni yasalay Yesu. Ramubachika chisu chawonsu asala yom yimusangareshina Nzamb. (Yoh. 8:29) Ramubachika ayisaula patok antakel a relijon adinga ni kulond nich rubabek anch adi antimesh a Nzamb. Ramubachika kand alonda piur pa Yehova ni ayikwasha antu akwau amwijika ni amukata Nzamb.

8. Rukat ra Nzamb rayibachika in kwilej a Yesu asala chom ik?

⁸ Mudi Yesu, in kwilejend a mu mivu chitot ya kusambish amukata Yehova, ni rukat riner rayibachika alejana rusangu ruwamp nich kutakaman ni mushiku. Izwisha Yerusalem nich malejan mau, ap anch antakel a relijon adinga nich usu ayipompata nakash. In kwilej kalikap kulond piur pa yom yamanau ni yateshau. (Mid. 4:20; 5:28) Awiy adinga ij anch Yehova wadinga pamwing nau ni ukuyiyukish—ni wayiyukisha! Chakin, kupwa kwa mivu 30 kusut kudiosh pafilay Yesu, kambuy Paul wafunda anch rusangu ruwamp arilejen kal “kudi awonsu atangilau mwishin mwa diur.”—Kol. 1:23.

9. Mutapu ik tukutwisha kukasikesh rukat retu mulong wa Nzamb?

⁹ Anch tusotil chakin kamu twikala alej awamp, niyetu tuswiridin twikala nich kashinsh anch tudandamedin kukasikesh rukat retu mulong wa Nzamb. Ov, mutapu ik tukutwisha kusal mwamu? Kusutil ku kwambamb nakash ni Nzamb mu malembil. Tukat kand niyetu kukasikesh rukat retu mulong wa Nzamb kusutil ku kwilej Dizu diend, ku kutang mikand yengamidina pa Bibil, ni ku kukumangan ku yikumangan ya Ukristu. Anch twikal nich ronganyin rijim ra Nzamb, tukez kumukat nakash nich michim yetu yawonsu. Ni, anch twamekesh rukat retu mulong wa Nzamb mu mazu ni mu yisal, antu akwau akez kuchiman ni akez kushejin kudiay Yehova.—Tang Kuseng 104:33, 34.

Tufanyidina Tukata Yom Yitulejena

10. Chisu chijingidij chijim cha mulej muwamp?

¹⁰ Chijingidij chijim cha mulej muwamp chidi kukat yom yilejenay. Ndiy ufanyidin itiyija anch yilejenay yidi yakin ni anch yidi ya usey. Anch mulej ukat kubangin yom yilejenay, musangar wend ukumekan patok, ukusadil usu pa antu alejinay. Chikwau, anch mulej kasangaredinap yom yilejenay, ov, mutapu ik ukuchingejinay anch antu alejinay ayikwata nich usey yom yiteshinau? Kangal wapipesh chilakej chey cha kwikal mulej wa Dizu dia Nzamb. Yesu walonda anch: “Nsand mwawonsu, pakupwishay malejan mend, ukez kwikal mudi mulej wend.”—Luka 6:40, MM.

11. Mulong wak Yesu wakata yom yadingay ni kulejan?

¹¹ Yesu wadinga ukatin yom yadingay ni kulejan. Ndiy wadinga wij anch ukwet chom chimwing cha usey nakash chifanyidinay kulejan—uyakin piur pa Tatukwend wa mwiur, “mazu ma Nzamb” ni “mazu ma mwom wa chikupu.” (Yoh. 3:34; 6:68) Mudi chimunyik cha kutok, uyakin wadingay ni kulejan Yesu wasaula yom yiyimp ni wakasikeshina yom yiwamp. Ayinkisha ruchingej ni rongoj antu ikepishina adingau ni kudimb kudiau antakel a relijon wa makasu ni adingau ni kumesh mar kudiay Djabul. (Mid. 10:38) Rukat radingay nich Yesu piur pa uyakin rimekedin mu malejan mend ni mu yisal yend yawonsu.

12. Mutapu ik wadingay ni kwiyov kambuy Paul mulong wa rusangu ruwamp?

¹² Mudi Yesu, in kwilejend adinga akatina ni akwata uyakin nich usey nakash piur pa Yehova ni Kristu mu chilik chakwel anch in kuyipompat akanganya kuyilikish kuyilej antu akwau. Paul wayifundina akwau in Kristu adinga ku Rome anch: “Chawiy chipandikena kudi am kwirijek kulej katumb kawamp . . . Mulong am kinikwovip usany wa katumb kawamp, mulong kadi usu wa Nzamb ku dipandish dia muntu wawonsu ukwitiya.” (Rome 1:15, 16) Kudi Paul kadinga katumb ka kulejan uyakin. Chawiy chafunday anch: “Kudi am, . . . aringinka ranaken riner ra kulejan kudi in mangand mapit makad kuchind ma Kristu.” (Efes 3:8) Chikasikenap kutongin anch Paul wadinga nich musangar padingay ni kuyilej antu akwau piur pa Yehova ni piur pa jintong Jend.

13. Mayingishin ik mitukweta chakwel tukata rusangu ruwamp?

¹³ Rusangu ruwamp ridia mu Dizu dia Nzamb ritutwishishin kumwijik Sakatang ni kuta nend urund wa rukat. Rusangu ruwamp riner ritwinkishin yakul yisangareshina piur pa yipul ya usey ya mwom ni rikwet usu wa kukarumun mwom wetu, kutwinkish ruchingej, ni kutukasikesh mu yisu ya mar. Chikwau, ritulejin mutapu wa kushiken mu mwom urumburikina wakad kwez kupwa. Kwikil ronganyin rikwau ra usey nakash ap ripandakenamu rusangu ruwamp. Ridi chipan cha usey nakash chatwinkishinau kal, ni kutuletin musangar uvud. Ni kutuwejin kand musangar pitukata kuyilej antu akwau piur pa chipan chinech.—Mid. 20:35.

14. Mutapu ik tukutwisha kukasikesh rukat retu mulong wa yom yitulejena?

¹⁴ Ov, chom ik uswirikedina kusal chakwel ukasikesha rukat rey mulong wa rusangu ruwamp mu chilik chipandakena? Piutangina Dizu dia Nzamb, iman pa yisu yimwing chakwel utongijokina pa yom yiutangina. Chilakej, itongina amwiney mudi uyil ni Yesu mu mudimu wend wasalay pa divu ap mudi uyil mu weny pamwing ni kambuy Paul. Itongina anch udi mu mangand masu, ni tal mutapu muudia mwom ushalijadina. Tongijokin pa yiyukish yiwatambwila kal kusutil ku kuziyil kwey ku rusangu ruwamp. Anch wakasikesh rukat rey mulong wa rusangu ruwamp, antu ukuleja akuman rukat riner. Chawiy lel, mulong wa diyingishin diwamp, tufanyidin kutongijokin nawamp piur pa yom yitwilejina kal ni kuta muchim pa yom yitulejena.—Tang 1 Timote 4:15, 16.

Tufanyidin Tuyikata Antu

15. Ov, mulong wak mulej ufanyidin kuyikat in kwilejend?

¹⁵ Mulej muwamp ukat kuyongoj ansand end a shikol chakwel niyawiy iyandjika ayinau mu yom yilejinau ni akweting musangar wa kulond yidia mu michim yau. Mulej mukarukat ulejening ronganyin mulong uyibangidin nakash in kwilejend. Ukat kwambatanish malejan mend ni maswir mau ni kulondulijan nich mutapu wau wa kutesh. Ukat kushinshikin ukaliweny ni mikadil ya in kwilejend. Anch alej akwet rukat mudi riner, in kwilej akez kuriman, ni kulejan ni kwilej kuletining musangar.

16. Mu jinjil ik mwamekeshinay Yesu rukat mulong wa antu?

¹⁶ Yesu wamekesha rukat ra mutapu winou. Chisal chend chijim cha rukat rend chadinga kuladik mwom wend wa chiuntu uwanyidina chakwel akwau atwisha kupand. (Yoh. 15:13) Pasalay mudimu wend, pakad kuziy Yesu wayibangina antu ku mujimbu ni pakampwil muspiritu. Pa ndond pa kuyichingel antu eza kudiay ndiy, ndiy wenda yitot ya makilometre ra pansh mulong wa kuyilej antu akwau rusangu ruwamp. (Mat. 4:23-25; Luka 8:1) Wadinga mwin kwishimpish ni mwin kutesh. Pa chisu chaswirikena kuyipup in kwilejend, wayipupa nich rukat. (Marko 9:33-37) Ndiy wayikasikesha nich kuyimekeshin anch uyichingejidin anch akez kwikal in kulejan ayifuvu a rusangu ruwamp. Kwikil muntu wikadilap kal mulej ukweta rukat kumusutamu Yesu. Rukat rayimekeshinay in kwilejend rayibachika ni awiy ku kumukat ni alama yijdik yend.—Tang Yohan 14:15.

17. Mutapu ik wamekeshau in kwilej a Yesu anch ayikatin antu akwau?

¹⁷ Mudi Yesu, in kwilejend ayikata nakash muntu umwing ni umwing adingau ni kulej. Kujijamen kuzengol ni mu chilik cha kusot kuyijip, ayisadila antu akwau ni apandakana mu kulejan rusangu ruwamp. Ova rukat mudi ik piur pa antu akwashau muspiritu! Mazu manam ma kambuy Paul makwatin nakash ku muchim, ndiy wafunda anch: “etu twading twitudishish mukach mwen, mudi nvaj walama anend amwinend. Chawiy kand twanikata en, twadi ni musangar wa kupan kudi en, kadip kusu rusangu ruwamp ra Nzamb, pakwez ni kupand kwetu kand, mulong en wikadilany kal akwetu akarukat kamu.”—1 Tes. 2:7, 8.

18, 19. (a) Ov, mulong wak tudinga tayad kwipan pa kusal mudimu wa kulejan? (b) Let chilakej chimekeshina anch antu akwau amen rukat ritumekeshina.

¹⁸ Chawiy chimwing, mu yisu ya katat, Atuman a Yehova alejen mu mangand mawonsu mulong wa kuyikimb antu akweta impu ya kwijik ni kumusadil Nzamb. Chakin kamu, mu mivu 17 yasuta kal ey, tukat kusutish pa muvu ni muvu masaa miliyar umwing ni kusut mu mudimu wa kulejan ni wa kuyikadish in kwilej—ni tuchidandamedin nich mudimu winou. Tusadiling mwamu nich muchim wa kwikatin, ap anch mudimu wa kulejan witining tusadila chisu, usu, ni mapit ma ku mujimbu. Mudi Yesu, tuteshin kurumburik anch Tatukwetu wa mwiur uswirikedin anch antu ikala ni ronganyin ritwadila ku mwom wa chikupu. (Yoh. 17:3; 1 Tim. 2:3, 4) Rukat rikat kutubachik tuyikwasha antu akweta michim yiwamp chakwel amwijika ni amukata Yehova mudi mutumwija ni kumukat.

¹⁹ Antu akwau amening rukat ritumekeshina. Chilakej, nambaz umwing chibol udinga mu États-Unis wafunda mikand ya kuyongoj nich antu afishina. Mudi chakul, ikundj umwing wamufundila anch: “Chisal cham cha kusambish chadinga cha kushimok anch mutapu ik ukutwishay muntu kusal usu winou wawonsu chakwel amufundila muntu wakadiay ndiy kwijik ap dimwing chakwel amukwasha kujijamen yisu yikash. Nikutwish kwam nalond anch, ukwet chakin rukat mulong wa antu akwau ni umukatin Nzamb umutakedila mu mwom wend wawonsu.”

20. Chikwet usey kulejan nich rukat?

²⁰ Achilonda kal anch, ang rukat ni ukaliweny yasadil pamwing, ukutwish wachingejin chibudikin chiwamp. Mu kulejan kwetu, tusotining tuyikwasha antu twilejina nau chakwel akudisha mu manangu kumwijik Yehova ni muchim wa kumukat. Mwaning, chakwel anch twikala alej awamp, tuswiridin mitapu yisatu ya rukat—kumukat Nzamb, kukat uyakin, ni kuyikat antu. Anch twakudish mitapu yiney ya rukat ni kurimekesh mu mudimu wetu, kitukutanap ching kusu musangar wa kupan pakwez kand mazang ma kwijik anch tumwimburijin Yesu ni tumusangareshin Yehova.

Ov, Mutapu ik Ukwakula?

• Pitukata kuyilej antu akwau rusangu ruwamp, ov, mulong wak chidi cha usey twikala ni . . .

rukat ra Nzamb?

rukat ra yom yitulejena

rukat ra antu tulejena?

[Chipich chidia pa paj wa 17]

Chom ik chasala anch mutapu wa kulejan wa Yesu wadinga ushalijadin kulemp nau in kufund ni Afarise?

[Chipich chidia pa paj wa 20]

Kulejan nawamp kwitin ronganyin, ukaliweny, chipandakenamu pa yawonsu, rukat