Spiritu Utumbila Usu Uswiridina mu Mwom Wey

“KANGAL wandjibul kulemp ku mes mey, kangal wandioshil [spiritu utumbil].” (Kuseng 51:11) Minam madinga malembil ma usu menday Mwant David parumbukay mu mutapu uyimp nakash.

David wadinga wapana kal mu mivu yivud ukash wa spiritu utumbila. Padingay ni dikum dia mivu, wawiy wamutwishisha kumujip Goliat—isalay umwing wadinga ukwatishena wom. (1 Samwel 17:45-50, NW) Wamwinkisha kand usu chakwel afunda kuseng kumwing kuwamp nakash. David walonda anch: “Spiritu wa Yehova ndiy walondina mudi am, ni dizu diend diadinga pa rudim ram.”—2 Samwel 23:2, NW.

Yesu Kristu niyend wakasikeshina mudimu wasala spiritu utumbila mu mwom wa David. Pa dichuku dimwing, Yesu wayileja antu adinga ni kumutesh anch: “David amwinend walondila ku ukash wa [spiritu utumbila] anch: Mwant walonda kudi Mwant wam anch, Shakam kwey ku chikas cham cha katatuku, Ni kushik pinikuyiteka akankuny ney kwishin kwa yidjatil yey.” (Marko 12:36; Kuseng 110:1) Yesu wadinga wij anch pafunday David kuseng kwend, spiritu utumbila ndiy wamutakela. Ov, spiritu utumbila winou ukutwish watukwash niyetu?

“Itany, Akez Kaninkishany”

Ukutwishap wafund kuseng ap pakemp. Pakwez ukutwish wara nawamp nich yikangesh yikash ya kwidjidjek yikash mudi Goliat. Tushinshikinany chilakej cha Isabel.a Nfumwend wamusha wakandamin mband uchidia changadim. Wamusha mu dibaz dijim, ni kadingap ni kumukwash nich nfalang chakwel jimukwasha kuyilil ayangadim au aad. Isabel ulondil anch: “Niyova anch antungun kal matung ni niyova mudi nich chishoshot. Chikalap nchik mwamu, kudiosh panshilay, niyoviling mudi spiritu utumbila wa Nzamb winkwashining.”

Ov, Isabel wadinga ni kuchingejin anch atambula kamu spiritu utumbila? Bwat, wadinga ni kumwit Nzamb pichuku pichuku chakwel amwinkisha spiritu wend. Wadinga wij anch uswiridin usu wa Nzamb chakwel umukwasha ara nich kujijaman yom yadinga yezina kurutu, atwisha kuyilil nawamp anend ni chakwel asambisha kand kwichingejin amwinend. Wasadila mazu malonday Yesu anch: “Itany, akez kaninkishany; suribany, ukutanany; kokalany, akunanzurilany kwen.”—Mateu 7:7.

Roberto niyend wiyova anch uswiridin spiritu wa Nzamb pakwez chadinga mulong wa mayingishin mindjing. Wadinga wakwachika kal nich kuna ruwand ni damb, yadingay ni kuna chisu ni chisu. Warisha nich mu mivu yivud mulong wa kusot kulik, pakwez wadinga ni kuwilamu chisu ni chisu. Roberto urumburil anch: “Ukwikal wiyakamishina chisu chawonsu anch walik kuna mon yiswan. Ukusambish kwov impu ya kuna kand pichuku ni pichuku.”

Roberto udandamedin anch: “Pakwez nakwata mupak wa kukarumun mashakamin ma mwom wam chakwel anch nitwisha kumusadil Nzamb mu mutapu witiyijinay. Napakisha kwizwish mu muchim ni manangu mam yitongijok yiwamp yidia mu Bibil. Namwilembila nakash Nzamb pichuku ni pichuku, chakwel angikisha usu nishitwisha mwom wam. Nijika anch nikupandakanap ku usu wam amwinam. Ni namana mutapu wangukulay Yehova ku malembil mam, pakampwil pa chisu chinawilamu kand ni nova mu makas likis. Nitiyijin anch spiritu utumbila wa Nzamb wangikisha kand usu; pakad spiritu wend ing kinatwishap kupandakan yom yiney.”—Filipoi 4:6-8.

Kutwik “Mudi Ambur”

Mudi Isabel nenday Roberto, mamiliyon ma Atuman a Yehova imedin kal ayinau usu wa spiritu utumbila mu mwom yau. Usu usadilingay nich Yehova—usu wasalay nich mangand—ukutwish wakwinkishau anch wausot. Nzamb ukatin ni udi tayad kukwinkish spiritu wend anch wamwitay ni muchim utok. Pakwez chakwel anch akwinkisha spiritu winou, uswiridin wileja uyakin piur pend ni tusota chakin kamu kusal rusot rend.—Isay 55:6; Hebereu 11:6.

Anch wikal mwishin mwa usu wa spiritu utumbila, ukutwish watambul usu wa kumusadil Nzamb nawamp ni chakwel ura nich yikokujol yawonsu yikutwisha kukutan mu mwom wey. Kawiy kashinsh katwinkishina Bibil palondilay anch: “[Yehova] ukat kupan usu kudi uziyina, ap kudi muntu mwamupwanga kal nich mudimu. . . . Awonsu akata kumukungamen [Yehova], akupizurish usu akutwik mudi ambur, akubambil mau wakad kuziy, akwend mwakad kuyipwa.”—Isay 40:28-31.

[Mazu madia kwishin kwa paj]

[Tablo wa jinsangu udia pa paj wa 8]

‘Namwilembila nakash Nzamb pichuku ni pichuku, chakwel angikisha usu. Nijika anch nikupandakanap ku usu wam amwinam. Ni namana mutapu wangukulay ku malembil mam’

[Kamushet/​Yipich chidia pa paj wa 7]

Spiritu Utumbila Usadil

Nzamb wasadila spiritu utumbila mulong wa kutang divu ni yom yikwau yidia mu mangand. Nfund a kuseng walonda anch: “A [Yehova, NW], midimu yey yivud yivud, wasadil yawonsu ni chiyul, divu dizwil sens ni rupit rey. Anch watum kand mwiku [wey, NW] apizurik.”—Kuseng 104:24, 30; Disambishil 1:2; Yob 33:4.

Spiritu utumbila wayibachika antu a Nzamb chakwel afunda Bibil. Kambuy Paul wafunda anch: “Mazu mawonsu ma mukand wa Nzamb madiokala ku [spiritu] wa Nzamb.” (2 Timote 3:16) Dizu dia Grek diakarumunau “madiokala ku spiritu” dikutwish diarumburik “kupimin mwiku wa Nzamb.” Mwiku ap anch spiritu wa Yehova, wayitakela yitongijok ya antu afunda Bibil, chawiy chashikenau ku kulejan “dizu dia Nzamb.”—1 Tesalonik 2:13.

Spiritu utumbila wayinkisha atushalapol a Nzamb ukash wa kubwak nich kashinsh yom ya kurutu. Kambuy Pita walonda anch: “Pikil dilejan dia mukand wa Nzamb dikudiokala kudi antu kusu. Mulong kwikiling kulej kwa dizu dia Nzamb kukata kwezang ku rusot ra muntu; pakwez antu anyikeshau kudi Spiritu Utumbila alonda mazu matambulau kudi Nzamb.”—2 Pita 1:20, 21; Yowel 2:28.

Spiritu utumbila wamukwasha Yesu ni amakundj akwau in ritiy chakwel alejana rusangu ruwamp ra Want wa Nzamb ni kusal yilay. Yesu walonda anch: “Spiritu wa Nzamb udi padi am, mulong ndiy wanzizidil kal am many, anch: Yileja atuzwendj jinsangu jiwamp. Ndiy wantuma am kuyilej apitilau ya kuyikol, ni mwakupanyin mes kudi amputames.” —Luka 4:18; Mateu 12:28.

[Kamushet/​Yipich chidia pa paj wa 9]

MU JINJIL MUKATA KUTUKWASH SPIRITU UTUMBILA

Spiritu utumbila ukutwish wakwinkish usu wa kurish nich yoziu ni kupandakan yaku yiyimp. Kambuy Paul walonda anch: “Nzamb udi wakin, ndiy kakwitiyip en anozany kusut usu wen; pakwez yoziu anch yez, ndiy ukunilejany njil ya kukwasinik, chakwel ukwikalany ni usu wa kupandakan.”—1 Korint 10:13.

Spiritu utumbila ukutwish wakukwash ukudisha ngikadil ya Nzamb. “[Dibuj dia spiritu didi] rukat, musangar, chisambu, kushimpish muchim, kudimuk, kuwap, kujijaman, kwitudish, kwishitul.”—Galatia 5:22, 23.

Spiritu utumbila ukutwish wakwinkish usu wa kujijamen yoziu. “Nikutwish kusal yom yawonsu mwi ndiy ukata kwinkasikesh am.”—Filipoi 4:13.