Ringany Ra 5: mariy Udi Makwend A Nzamb

Kwisu ku radiokala?

The New Encyclopædia Britannica (1988), Volim wa 16, paj wa 326 ni 327 ulondil anch: “Kumwifukwil makwend a Nzamb kwasambisha pa chisu . . . chandamau apagan avud mu egliz. . . . Kwipan kwau ni yitiyij ya kom kau [ya apagan akarumuka kwikal in Kristu] adinga ayifumba kal mu tunan twa mivu mu difukwil dia nzamb mband ‘maku mujim’ ni dia ‘mujik wa winzamb.’”

Bibil ulondil ik?

“Ey ukez kimish, mwivumu mwey mukez kabudik mwan, ukumupil dijin anch Yesu. . . . Ndiy ukwikal mujim, akez kamutazuk anch Mwan wendendiy Udia Piur. . . . Chawiy kand ni mwan utumbila ukuvala akez kamupil anch Mwan a Nzamb.”—Yetu tutekina kashony; Luka 1:31-35, Traduction officielle de la liturgie.

Chikunku chinech cha Mifund chilondil patok anch Mariy wadinga makwend a “Mwan a Nzamb,” kadingap makwend a Nzamb amwinend. Ov, wela kutwish kumusend mwivumu mwend Muntu wakad ‘kutwish kuwanyin mu maur min’? (1 Ant 8:27, Les Saintes Écritures — Traduction du monde nouveau) Ndiy amwinend kandikal alondangap mwamu. Madi malejan ma usatu mawiy maleta karumbangesh winou mwawonsu piur pa Mariy. Palondau anch akusambish kumutazuk anch: Théotokos (dizu dia Grek dirumburikina anch: “Wamwimisha Nzamb”), ap anch “Makwend a Nzamb,” Chikumangan chasalau mu Efes, mu muvu wa 431 C.C., chawiy charijeka njil ya kumwifukwil Mariy. Musumb wa Efes kwasadilau chikumangan chinech cha egliz wadinga mu yitot ya mivu ndond ya kusambish ya difukwil dia akish ni adinga ni kusalamu musambu wa Artemis nzamb mband mwin kufukish divu ni kulet ruvaj.

Chawiy, yom yivud yadingau ni kusal pa kumwifukwil mukish wa Artemis “wapalika kudiokal mwiur,” mudi kwend karishish, ayandjika niyawiy mu difukwil dia Mariy. (Midimu 19:35) Chisal chikwau chandama pakemp-pakemp mu malejan ma Ukristu chadinga kusadil akish a Mariy ni a antu akwau mu difukwil.

Isikesh maverse manam madia mu Bibil: Mateu 13:53-56; Marko 3:31-35; Luka 11:27, 28