Lamany Musangar Mu Yisu Ya Kanrumbangesh
“Yilika awiy akata kwikangil [mudiay Yehova, NW] asangar kwau; akez katoy ni musangar chikupu.”—KUS. 5:11.
1, 2. (a) Yom ik yimwing yiletina mar makash nlel? (b) Kuwejin pa mar mayikwatina antu awonsu, chom ik chifanyidinau in Kristu akin kujijamen?
ATUMAN A YEHOVA kadiap akukay pantaliken nich mar mayikwatina antu akwau. Chisum, njit ni kasolikany kakwau kayikwatining antu avud a Nzamb. Yak ya chitangil, uzwendj, mayej ni rufu yiletin mar makash. Kambuy Paul wafunda nawamp win kamu anch: “Twij kal anch yawonsu yatangau yikat kukimuk ni kwakam mu kusansan pamwing ni katat ou.” (Rome 8:22) Tukat kuwil kand mu mar mulong wa kuburen kwetu kuwanyin. Mudi mwadingay Mwant David wa pasak, tukutwish niyetu twalond anch: “Jinshid jam jasutil kal piur pa mutu wam mudi chisend chilimina nakash padi am.”—Kus. 38:4.
2 Kuwejin pa yak yiyikwatina antu awonsu, in Kristu akin asendining mutond wa chifanikesh wa mar. (Luka 14:27) Mwawiy kamu, mudi Yesu, in kwilejend ayikisin ni ayizengodil. (Mat. 10:22, 23; Yoh. 15:20; 16:2) Chawiy lel, kumulondul Kristu kutwitin tusala usu ukash ni tujijamana pa chisu tuchingedina yiyukish yikeza kwez pamwing ni mangand masu.—Mat. 7:13, 14; Luka 13:24.
3. Mutapu ik twija anch in Kristu kaswiridinap kwikal ni mwom wa mar chakwel amusangaresha Nzamb?
3 Ov, chinech chirumburikin anch in Kristu akin akwet mwom wakad musangar ni mazang? Ov, mwom wetu ufanyidin kwikal ching wa ushon ni mar djat ni piyikwezina nsudiel? Chakin kamu, Yehova usotil anch twikala ni musangar pituchingedina kuwanyish kwa yakushilamu yend. Chisu ni chisu, Bibil uyilejen in kwifukwil akin mudi antu in musangar. (Tang Isay 65:13, 14.) Kuseng 5:11 ulondil anch: “Yilika awiy akata kwikangil [mudiay Yehova] asangar kwau; akez katoy ni musangar chikupu.” Mwaning, chitwishikin kwikal nich musangar ujim, chisambu mu muchim ni mazang ap mukach mwa mar makash. El tushinshikinany mutapu ukutwishay Bibil kutukwash kujijamen yoziu ni kudandamen kwikal nich musangar.
Yehova—“Nzamb wa Musangar”
4. Mutapu ik wovilingay Nzamb anch muntu walik kusal rusot rend?
4 Tumushinshikinany Yehova mudi chilakej. Chidiay Nzamb Mwin Dikand Diawonsu, mangand mawonsu madi mwishin wa winyikel wend. Kaburedinap chom ni kaswiridinap muntu ap umwing. Pakwez, chikalap nchik usu wend upandakena, chimeken anch Yehova kovap nawamp pa chisu chamubwambwilau kudi umwing wa anend a muspiritu ni wikala Satan. Nzamb weza kand kwov ushon pa chisu angel amwing inunga niyau mu wintombuj winou. Tongany kand, kuswan kwovay Nzamb pa chisu chamulikau kudiay Adam ni Eve, yitang yend yamushena ya manangu yatekay pansh. Kudiosh kamu pinipa, mamiliyon ma anau alikining kwau winyikel wa Yehova.—Rome 3:23.
5. Chom ik cha pakampwil chamwovisha Yehova kuyimp?
5 Wintombuj wa Satan udandamedin kamu nakash. Mu mivu 6000, Yehova umen yisal ya kwifukwil akish, ya chisum, ya kujipijan ni ya masandj mapandakena. (Dis. 6:5, 6, 11, 12) Chikwau kand, wateshin kal makasu ni masaal mayimp nakash. Ap ni in kumwifukwil Nzamb akin pa yisu yimwing oviling kusansan. Bibil wisambidin piur pa mwikadil umwing mudi winou mu mazu manam: “Tupamp [twinch] amulankina mwi mpay? Tupamp [twinch] amwovisha kuyip mu muchim mu chan? Amutenta Nzamb wau kapamp ni kapamp, amupaka Utumbila wa Isarel.” (Kus. 78:40, 41) Kuyip kwovay Yehova pamulikau kudi antwend kwadinga chakin kamu kujim nakash. (Yer. 3:1-10) Choviken patok, yom yiyimp yikat kusadik, ni Yehova woviling kuyip nakash piyisadikina.—Tang Isay 63:9, 10.
6. Mutapu ik warishay Nzamb nich mikadil yikash?
6 Pakwez, Yehova kakatap kufa mukenk mulong wa kuswan ni kumurumbukin. Pa chisu kwikala kupwitijan, kapamp kamwing Yehova wakwata mupak wa kukepish yibudikin yiyimp ya yom yasadikaku. Wakwata kand mipak yikezay kusadil kurutu chakwel kwinsudiel ching rusot rend reza riwanyina. Pa kuman yom yiney yawonsu yiwamp, Yehova watala kurutu nich musangar mulong wa kutokish ukaleng wend ni ku yibudikin ya yiyukish mulong wa in kumwifukwil end ashinshamena. (Kus. 104:31) Mwaning, kwikalap nchik mutapu wamushingau kal majir, Yehova udi ching “Nzamb wa musangar.”—1 Tim. 1:11; Kus. 16:11.
7, 8. Anch yom yisadikin mu mutapu uyimp, mutapu ik tukutwisha kumwimburij Yehova?
7 Chakin, tukutwishap twiyilikej ni Yehova pa mulong wa usu wetu wa kupwish milong. Chikalap nchik mwamu, tukutwish twamwimburij Yehova pa chisu turishina nich yikokujol. Chidi chovikena kwov runeng anch yom yiyipin, pakwez tuswiridinap tushala ching mu mwikadil winou. Mulong atutanga mu chifu cha Yehova, tukwet ukaliweny wa kutong ni kusadil manangu, makutwisha kutukwash tushinshikina milong yetu ni kukwat mipak yiwamp pichitwishikina.
8 Chom chimwing chijim nakash chikutwisha kutukwash kura nich milong ya mu mwom chidi kwijik anch kudi yom yimwing yitupandakenamu. Kura tutaku pa milong mudi yiney kukutwish kwatushikij ku kukwachik usany ni ku kutukangesh kwikal nich musangar udiokilinga ku difukwil diakin. Kupwa kwa kukwat mipak yifanyidina mulong wa kupwish mulong, chidi cha usey kuyisadil ni kusal usu chakwel kuyiwanyish. Rusangu rilondwilaku er ridia mu Bibil rikwisambin pa mulong winou.
Kwitudish Kudi kwa Usey
9. Mutapu ik wamekeshay Hana kwitudish kwend?
9 Tushinshikinany chilakej cha Hana, wamuvala muprofet Samwel. Wadinga ni ushon nakash mulong kadingap ni an. Amusipanga ni kumuses mulong wa umb wend. Pa yisu yimwing, Hana wova ushon nakash ni wadinga ni kudil ni kadingap ni kudia. (1 Sam. 1:2-7, NW) Payay dichuku dikwau ku dizang dia Yehova, Hana wova “kusansan ku muchim, ni wasambisha kumwilembil Yehova ni kudil nakash.” (1 Sam. 1:10, NW) Kupwa kwa Hana kumulej Yehova yovil yend, Eli mwin kupesh wa pa mutu wamushejina ni wamwela anch: “Yang mu chisambu, ni Nzamb wa Isarel asala kukwatijan ni kwit kwey mudi muumwitina.” (1 Sam. 1:17, NW) Pa chisu chinicha, Hana wiyova anch wasal kal yawonsu yadia yifanyidinay kusal. Ndiy kadingap ni cha kusal pa umb wend. Hana wasadila kwitudish. Kupwa “waya kwend ni wadia, ni chifu chend chamekanap kand kwikal cha ushon.”—1 Sam. 1:18, NW.
10. Paul wamekesha ngikadil ik yiwamp parishay nich mulong wakadiay ndiy kutwish kuupwish?
10 Kambuy Paul niyend wamekesha ngikadil yawiy yimwing padingay mu yikokujol. Wadinga ni mayej mamuletina kusansan kuvud. Wamatazuka anch: “Muy mu mujimbu.” (2 Kor. 12:7) Chikalap nchik mutapu wadinga muy winou, Paul wasala yatwishay kusal chakwel mayej minam mamudiokala, wamwilembila Yehova chakwel amwoka. Paul wamwilembila Yehova tupamp twinch pa mulong winou? Tupamp tusatu. Kupwa kwa kapamp ka kasatu, Nzamb wamuleja Paul anch kakusalap chilay mulong wa kumudiosh “muy [winou] mu mujimbu.” Paul witiyija chom chinech ni wipana nakash mu kumusadil Yehova.—Tang 2 Korint 12:8-10.
11. Kulembil ni kujikitish kukwet usey ik mu kura kwetu nich mar?
11 Yilakej yiney kiyilejenap anch tufanyidin tulika kumwilembil Yehova piur pa milong yitwakamishina nakash. (Kus. 86:7) Pakwez, Dizu dia Nzamb ditukasikeshin anch: “Kangal wanengananany; pakwez lembilany mu yom yawonsu, ni kujikitish ni kumwijikish Nzamb yom yawonsu yiusotilany.” Mutapu ik ukwakulay Yehova ku malembil ni ku kujikitish kwinoku kwawonsu? Bibil uwejidinaku anch: “Ni chisambu cha Nzamb chisutila ronganyin rawonsu chikwez kulam michim yen ni yitongijok yen mu Yesu Kristu.” (Filip. 4:6, 7) Inge, pamwingap Yehova katupwishidinap milong yetu, pakwez ukutwish wakul ku malembil metu kusutil ku kulam usu wetu wa manangu. Kupwa kwa kulembil piur pa mulong kanang, tukutwish twijik ubaj udiokilinga ku minan.
Sangerany mu Kusal Rusot ra Nzamb
12. Mulong wak chidia chiyimp kwov ushon chisu chilemp?
12 Jinswir 24:10 ulondil anch: “Anch walengumwok pa dichuku dia yakamish, usu wey ukepil.” Ruswir rukwau rulondil anch: “Ushon wa mu muchim ukat kujip mupim.” (Jinsw. 15:13) In Kristu amwing akwachika ushon aya djat ni mu chilik cha kulik kudandame kutang kwau Bibil ni kutongijokin kwau pa Dizu dia Nzamb. Malembil mau mikala kal ma piur-piur, ni iyaurila ayinau ni ambay nau in kwifukwil. Chakin kamu, kwikal mu mwikadil wa ushon chisu chilemp kukutwish kwalet chak.—Jinsw. 18:1, 14.
13. Midimu ik yimwing yikutwisha kutukwash kudiosh ushon ni yikutwisha kutuletin musangar?
13 Ku mutambu ukwau, kuman yom mu mutapu uwamp kukez kutukwash chakwel tushinshikina pa mitapu ya mwom wetu mutukutwisha kutan mazang ni musangar. David wafunda anch: “[Nasangara] kusadil rusot rey, A Nzamb wam.” (Kus. 40:8) Pa yisu tukweta milong mu mwom wetu, chakin kamu kitufanyidinap kulik chaku chetu chiwamp cha kwifukwil. Chakin kamu, njil yiwamp ya kura nich ushon yidi kusadil midimu yiletininga musangar. Yehova utulejin anch tukutwish twatan musangar ni mazang mu kutangang Dizu diend ni kuditongijokin pichuku pichuku. (Kus. 1:1, 2; Yak. 1:25) Kusutil ku Mifund Yitumbila ni ku yikumangan ya Ukristu, kwawiy tukata kutambwil “mazu mawamp” makutwisha kutukasikesh ni kusangaresh michim yetu.—Jinsw. 12:25; 16:24.
14. Kashinsh ik kadiokila kudiay Yehova katusangareshina katat?
14 Nzamb utwinkishin mayingishin mavud chakwel twikala ni musangar. Kushilamu kwend dipandish kudi chakin kamu musul ujim wa musangar. (Kus. 13:5) Twij anch chikalap nchik yom yikutwisha kutushiken katat, kwinsudiel Nzamb ukez kuyifut antu amukimbina chakin kamu. (Tang Mulej 8:12.) Muprofet Abakuk wamekesha nawamp ritiy mudi riner pafunday anch: “Anch mitond ya nfung yalik kusong mabuj, ap anch mitond ya nviny yalik kusong mabuj, ap anch mitond ya mpach yarukumwok, ap anch yir yalik kusong yakudia, ap anch amikoku awonsu afa, ap anch kwaburen angomb, ap mwamwap nchik nikez kasangar ni kuzangijal, mulong [Yehova, NW] Nzamb udi Mupandish wam.”—Abak. 3:17, 18.
“Ayuk Kwau Antu Amukweta [Yehova mudi, NW], Nzamb Wau!”
15, 16. Jimbul yipan yimwing ya Nzamb yitukutwisha kusanger pituchingedina yiyukish ya kurutu.
15 Pituchingedina machuku ma kurutu mamushena, rusot ra Yehova ridi anch tusangera yom yiwamp yitwinkishinay. Bibil ulondil anch: “Nij anch, chifanyidin muntu kusangar ni kusal nawamp pa chisu pachidiay mwom. Muntu mwawonsu anch wadia, ni kuna, ni kusanger mu mapit ma midimu yend, kwawiy kupan kwa riy kwa Nzamb.” (Mul. 3:12, 13) Mu “kusal nawamp” mudi ni kuyisadil kand antu akwau yom yiwamp. Yesu walonda anch kuding musangar nakash ku kupan kupandakanamu ku kutambul. Yisal yiwamp yitukutwisha kuyisal in nkwetu, anetu, anvajetu ni anamakwetu akwau yiletining musangar nakash. (Jinsw. 3:27) Kwikal muntu muwamp, mwin kuyak akwau ni mwin kuyilikishin akadivar ni anambaz netu a muspiritu ni kwawiy kuletining musangar ujim, ni kumusangareshining Yehova. (Gal. 6:10; Kol. 3:12-14; 1 Pita 4:8, 9) Kuwanyish mudimu wetu nich spiritu wa kwipan kuletining yiyukish chakin kamu.
16 Mazu majimbwilau kwiur oku madia mu Mulej malejen kwau kusu musangar udingaku mu mwom, mudi wa kudia ni kuna. Mwaning, ap pa chisu tudia mu yoziu yikash, tukutwish twatan musangar chikalap nchik yom ya ku mujimbu yikutwishay Yehova kutwinkish. Chikwau, kwandam kwa muten kusangareshina, ngand ya ufun, masengan ma an a annam, ni yom yikwau yamushena yidia mu yom yatangau kwikil chitukata kuland ni nfalang, pakwez yikutwish yatukwatish wom ni yatuletin musangar. Anch twatongijokin pa yom yiney, tukujimb mu rukat retu mulong wa Yehova, mulong Ndiy utwinkishininga yom yiney yawonsu yiwamp.
17. Chom ik chikeza kutupandish mu mar mawonsu, ni pa chisu chawiy chimwing, chom ik chikata kutwongoj?
17 Chakin kamu, rukat retu mulong wa Nzamb, kuziyil kwetu ku yijidik yend ni ritiy retu mu yakupesh ya difut yikez kutushikish ku dipandish dietu kudiokal mu mar ni mu mwom wakad kuwanyin ni kukez kutuletin musangar wa chikupu. (1 Yoh. 5:3) Pa chisu chawiy chimwing, tukat kutan rongoj pa kwijik anch Yehova wij nawamp win kamu yom yawonsu yitumeshina mar. David wafunda anch: “Nikal ni musangar ni kuzangam mulong wa rukat rey rudimukina, mulong Ey wamana kal mar mam, wijika mar ma mupim wam.” (Kus. 31:7) Yehova ukez kutupandish mu mar mulong utukatining nakash.—Kus. 34:19.
18. Mulong wak musangar ufanyidin kupandakan mukach mwa antu a Nzamb?
18 Pituchingedina kuwanyin kwa yakushilamu yend, el tumwimburijany Yehova, Nzamb wa musangar. Kangal twafany mukenk wa muspiritu mulong wa yovil yiyimp. Anch kwikal milong, el ukaliweny wetu wa kutong ni manangu mawamp matutakela. Yehova ukutukwash chakwel tuyikela yovil yetu ni tusala yawonsu yitukutwisha kusal mulong wa kukempishaku yibudikin ya yinship yiyimp. El tusangerany mu yom yiwamp yidiokila kudiay ndiy, ya ku mujimbu ni ya muspiritu. Kusutil ku kushakam piswimp ni Nzamb, tukez kutwish kusangar mulong “ayuk kwau antu amukweta [Yehova mudi, NW], Nzamb wau!”—Kus. 144:15.
Ik Wileja Kal?
• Pa chisu turishina nich mar, mutapu ik tukutwisha kumwimburij Yehova?
• Kwitudish kukutwish kwatukwash mutapu ik kurish nich mar?
• Pa yisu ya mar, mutapu ik tukutwisha kutan musangar mu kusal rusot ra Nzamb?
[Chipich chidia pa paj wa 16]
Yeh ova unenganen pa kuman yom yiyimp yisadikina
[Dizu dirumburila]
© G.M.B. Akash/Panos Pictures
[Chipich chidia pa paj wa 18]
Yehova watwinkishakal mitapu ya kulam musangar