Yesu Kristu Usu wa Rusangu Rend

“Chakin kamu uman ujim wa kujijamana kwa ikundj mwin manangu ku kapernaum udi kudandamen kuyishik ku michim ni mu manangu mu kutesh kwau kuwamp.”a—MWIN KUFUND GREGG EASTERBROOK.

MAZU makweta usu. Mazu mawamp ma manangu makutwish kubachik michim, kulet ruchingej, ni kukarumun mwom wa antu. Kwikil muntu wikala ni mazu makash mudi ma Yesu Kristu. Muntu umwing wamutesha Yesu padingay ni kulond yitazukinau nlel unou anch Malejan ma pa Mukandu wafunda anch: “Yesu chapwishay kulond mazu mend minam, yisak ya antu yashimoka ku malejan mend.”—Mateu 7:28.

Nlel unou, mazu mavud ma Yesu mwoviken nawamp kudi antu adia mu mangand mawonsu. Shinshikin yilakej yikemp ya mazu makweta usey nakash.

“En kiukutwishanyip kumusadil Nzamb ni kusadil dipit pamwing.”—Mateu 6:24.

“Sal yom kudi antu akwau mudi muukatila ing niyau akusadilang ey.”—Mateu 7:12, MN.

“Chawiy panany kudi Kaisar yom ya Kaisar; ni kudi Nzamb yom yidia ya Nzamb.”—Mateu 22:21.

“Chiyukish chijim kudi mwin kupan chamupandakan mwin kutambul.”—Midimu 20:35.

Pakwez Yesu wasala yom yivud kupandakanamu mazu mavurikinau ni nlel unou. Uruu walejanay wadinga ni usu mulong wading ukwatijadin nich uyakin piur pa Nzamb, wayifundisha antu mutapu wa kutan kurumburik kwakin kwa mwom, ni wayileja patok chom chikeza kupwish mar mawonsu ma antu—Want wa Nzamb. Pitutangina uruu winou mu ma paj mambakedina, tukez kaman mulong wak Yesu udandamedin kuyishik ma miliyon ma antu ku “michim ni mu manangu pakatau kumutesh nawamp.”

[Dizu didia kwishin kwa paj]