Yalejanay Yesu Piur pa Amwinend
“Yesu wijika chakin kamu chadingay, kwadiokalay, mulong wak weza mu mangand, ni yikeza kumushiken mu machuku ma kurutu.”—MWIN KUFUND HERBERT LOCKYER.
KURUTU kwa kwitiy ni kutek ritiy mu yom yalejanay Yesu, tufanyidin kwijik chom chimwing piur pendendiy. Ov, Yesu wadinga nany chakin kamu? Kwisu kwadiokalay? Rutong rend rading risu mu mwom? Mu rusangu ruwamp—Mateu, Marko, Luka, ni Yohan—tukutwish kutesh yakul kukan ka Yesu amwinend, mudi twadinga nend pamwing.
Ndiy wading mwom kurutu kwa kuvadik pa divu Yesu walonda kand anch: “Padingay Aburaham kavadikinip kal am nading kal kwaku.” (Yohan 8:58) Aburaham washakama mivu 2000 kurutu kwa Yesu kuvadik. Pakwez Yesu wadingaku kurutu ntakel winou wa muchid ushinshamena ashakama pa divu. Chawiy lel, kwisu kwadingay Yesu? Ndiy warumburila anch: “Mulong am nadiokala mwiur.”—Yohan 6:38.
Mwan a Nzamb Yehova ukwet anend angel avud. Pakwez Yesu udi wa pakampwil. Ndiy witazuka amwinend anch “Mwan umwing wa Nzamb.” (Yohan 3:18) Dizu dined dirumburikin anch Yesu udi chitang chatangau kapamp kamwing kudi Yehova. Mwan umwing wa Nzamb udi umwing kusutil ndiy Yehova watanga yom yikwau yawonsu.—Kolosay 1:16.
“Mwan a Muntu” Yesu wasadila dizu dined kupandakanamu mazu makwau mulong wa kwitazuk amwinend. (Mateu 8:20) Mwawiy mwamekeshay anch ndiy kandingap mwangel udjita mujimbu wa muntu bwat. Pakwez, ndiy wading muntu chakin kamu. Kusutil kuspiritu wend utumbila, Nzamb wadiosha mwom wa mwanend mwiur ni kuulet pa divu, ni kuutek mwivumu mwa changadim mujik Mariy. Mudi chibudikin, Yesu wavadika uwanyidina, muntu wakad chitil.—Mateu 1:18; Luka 1:35; Yohan 8:46.
Mesia wa kushilamu Mband mwin Samaria walonda anch: “Am nij Mesia ukat kwez.” Ndiy wamwakula anch: “Am nilondila ni yeyey yam kamu ndiy.” (Yohan 4:25, 26) Dizu “Mesia,” mudi dizu “Kristu,” dirumburikin “Uzizidilau Many.” Yesu amuzizila many, ap amutonda kudi Nzamb mulong wa kuwanyish mudimu wa pakampwil mu kuwanyin kwa kushilamu kwa Nzamb.
Mudimu wend wa kusambish Yesu walonda kand anch: “Am niwapidil kulejan rusangu ruwamp ra want wa Nzamb ku mal makwau kand, mulong chawiy chantuminau.” (Luka 4:43) Ap anch wayisadina atuzwendj yom yiwamp yivud, kulejan Want wa Nzanb kwading pa ndond ya kusambish mu mwom wend. Yalejanay piur pa Want winou akez kuyisambin kurutu oku.
Chakin kamu, Yesu kadingap muntu wa chamwamu.a Mudi mutukeza kuman, mwom wadingay nich mwiur waweja kurumburik ku mazu malonday pa divu. Ov, chidiap chakushimokish pa kwijik anch ndiy walejana uruu washikena ku kuyibachik ma miliyon ma antu adia mu mangand mawonsu?
[Dizu didia kwishin kwa paj]
a Chakwel wijika jinsangu jivud piur pa Yesu ni mudimu wend mu rutong ra Nzamb, tang chapitre wa 4, “Yesu Kristu Udi Nany?,” udi mu buku Chom ik Chakin Kamu Chifundishinay Bibil? Wafundau kudi Atuman a Yehova.