Chalejanay Yesu Piur pa Nzamb

“Kwikil umwing umwija Mwan mudiay, ching kwend Tatuku; ni kwikil umwija Tatuku mudiay, ching kwend Mwan, ni ndiy mwinau usotilay Mwan kumumekesh kudiay ndiy.”—LUKA 10:22.

KURUTU ikala muntu, Mwan a Nzamb wa kusambish washakama chisu chilemp nakash mu urund wa piswimp ni Tatukwend. (Kolosay 1:15) Chawiy chashikenay Mwan ku kwijik yitongijok, yovil, ni mashakamin ma Tatukwend. Kupwa pezay Mwan winou pa divu mudi ikundj Yesu, ndiy wasangera kulejan uyakin piur pa Tatukwend. Tukutwish kwilej yom yivud piur pa Nzamb kusutil ku kutesh yalonday Mwanend.

Dijin dia Nzamb Dijin dia Nzamb, Yehova diading dia usey nakash kudi Yesu. Mwan winou mukatish wasota anch antu akwau ijika ni asadila dijin dia Tatukwend. Dijin diend Yesu dirumburikin anch “Yehova udi dipandish.” Uchuku kurutu kwa kufa kwend, pamulembilay Yehova, Yesu walonda anch: “Am nadijikish kal dijin diey.” (Yohan 17:26) Chidiap chakushimokish anch Yesu wasadila dijin dia Nzamb ni wadijikisha kudi antu akwau. Chikwau kand, mutapu ik antu amutesha Yesu ela kutesh kurumburik kwa uyakin piur pa Yehova pakad ap kwijik dijin diend ni yitinay kusal?a

Rukat rujim ra Nzamb Yesu walembila kand kudi Nzamb anch: “Tatuku, . . . wankata kal am kurutu kwa disambishish dia mangand kutang.” (Yohan 17:24) Kupwa kwa kuman rukat ra Nzamb mwiur, pezay pa divu, Yesu wasota kumekesh rukat riner mu mitapu yend yiwamp nakash yivud.

Yesu wamekesha anch rukat ra Yehova ridi rijim nakash. Yesu walonda anch: “Nzamb wakata ngand, ndiy wapana Mwanend wa kuval kwend umwing, chakwel mwawonsu ukwitiya kudiay ndiy kakujiyip, pakwez ukwet kal mwom wa chikupu.” (Yohan 3:16) Dizu dia grek diakarumunau anch “ngand” dirumburikinap “divu” bwat. Mudi mudisadidilau pinap disambidin antu—antu awonsu chakin kamu. Chawiy lel, rukat ra Nzamb rakatay dijuku dia antu ridi rijim nakash chawiy chapanay Mwanend wa usey nakash chakwel antu ashinshamena adiokala mu uswik wa chitil ni wa rufu ni ikala nich ruchingej ra mwom wa chikupu. Tukutwishap kusambish kupim chilik cha kujimb ap kulep kwa rukat riner rijim.—Rom 8:38, 39.

Yesu wamekesha patok uyakin ukasikeshina nakash: Yehova uyikatin nakash in kumwifukwil end muntu ni muntu. Yesu walejana anch Yehova udi mudi kafung umumena muntu ni muntu pakach pa amikoku end mu mutapu wa pakampwil ni wa usey. (Mateu 18:12-14) Yesu walonda anch kwikil muswesu ap umwing ukutwisha kuwa pansh wakad Yehova kwijik. Yesu waweja anch: “Nzamb wachindil kal nswich jawonsu jidia ku mitu yen.” (Mateu 10:29-31) Anch Yehova ukwet ukaliweny wa kwijik anch muswesu umwing washadik kal mu chinswal kampand, ov, mu chilik ik chiyimenay ni kulam muntu ni muntu pakach pa antu in kumwifukwil? Anch Yehova ukutwish kuchind ni kushinshikin nswich jidia mu mutu wetu, ov kudi chom ap chisu mu mwom wetu—maswir metu, kurish kwetu, ni kwakam kwetu—yakad ndiy kwijik?

Tatuku wa Mwiur Mudi mutwamena mu mutu wa mulong wasutina, Yesu udi Mwan a Nzamb wa kuval kwend umwing. Chishimokishinap anch, Mwanend mukatish wading ni kumulembil Yehova chisu ni chisu ni wisambina piur pend mudi “Tatukwend.” Chawiy lel, mu mazu ma Yesu mafundau pakusambish, malonday ku tempel padingay ni mivu 12, ndiy wamutazuka Yehova anch “Tatukwam.” (Luka 2:49) Dizu “Tatuku” dimeken tupamp piswimp 190 mu Mateu, Marko, Luka, ni Yohan. Yesu wading ulondin yisu yivud piur pa Yehova anch “Tatukukwey,” “Tatukwetu,” ni “Tatukwam.” (Mateu 5:16; 6:9; 7:21) Kusutil ku kusadil dijin dined patok, Yesu wamekesha anch antu akayitil ni akad kuwanyin akutwish kuta urund ukash ni wa kashinsh nenday Yehova.

Riy ni Kusot kulikishin Yesu wijika anch antu akad kuwanyin aswiridin riy ripandakena ra Yehova. Mu chishimu chend cha mwan washadika, Yesu wamwilikeja Yehova nich tatuku wa riy, mwin kulikishin wazurila makas mend mulong wa kumwak mwan wita dilikishin. (Luka 15:11-32) Chawiy lel, mazu ma Yesu matukasikeshin anch Yehova umen kukarumuk kwawonsu kwa muchim wa muntu mwin chitil kukutwisha kumubachik ndiy amwovila riy. Yehova usotil kumulikishin mwin chitil witina dilikishin. Yesu warumburila anch: “Nakulejany anch, chawiy chimwing kand kukez kikal musangar mwiur pa mukayitil umwing wakarumuka kal, upandakenamu wa antu atentamina makum chidivu ni chidivu akad kwiswir kukarumuk.” (Luka 15:7) Ov, nany ukulika kwiyovu anch udi piswimp nenday Nzamb wa riy?

Ukata Kutesh Kulembil Mwiur kurutu kwa kwez pa divu, Yesu wamana kapamp kamwing anch Yehova ndiy “Ukata kutesh kulembil” ni ukata kusanger malembil ma in kumwifukwil end ashinshamena. (Kuseng 65:2) Chawiy lel, mu mudimu wend wa kulejan, Yesu wayifundisha in kwilej end mutapu wa kulembil ni yikutwishau kulembil. Ndiy wayiyula anch: “Kangal wavudishany mazu mamwamu.” Ndiy wayikasikesha in kumutesh chakwel alembila mulong rusot ra Nzamb “arusala pansh mudi mwiur.” Tukutwish kand kwit yakudia ya dichuku ni dichuku, dilikishin ku yitil yetu, ni kujijaman ku yoziu. (Mateu 6:5-13) Yesu walejana anch Yehova wakwil mudi tatuku ku malembil ma atushalapol end, witiyin ku malembil ma kashinsh masadinau nich ritiy.—Mateu 7:7-11.

Yesu wasota kufundish uyakin piur pa Yehova ni mwikadil wa Winzamb wend. Pakwez kwading chom chikwau chasotay kulejan Yesu piur pa Yehova—ni chikutwishay kusadil Yehova mulong wa kukarumun mangand mawonsu chakwel awanyisha rutong rend piur pa divu dined ni antu. Chawiy lel, mulad winou wa uruu wa Yesu wading mutu wa mulong wa malejan mend.

[Dizu didia kwishin kwa paj]