Mutapu Utupandishinau Kudi Difut
“Ukwitiyila padiay Mwan ukwet kal mwom wa chikupu; pakwez ukulika kuziyil kudi Mwan kakez kamanip mwom, pakwez ujim wa Nzamb udi padiay ndiy.”—YOHAN 3:36.
1, 2. Ov, diyingish ik dimwing diapalangeshinau gazet Chinong cha Kalam cha Zion kapamp ka kusambish?
NIMERO wa kanying wa Gazet wa Mwinkind 1879 walonda anch: “Kwikil mwin kwilej Bibil ap umwing ubabela ukutwisha kuburen kuman usey wa yipwichik yashikena ku rufu ra Kristu.” Mutu winou wa mulong wapwil ni mazu minam makash anch: “Shinshikinany nawamp amboku pa yom yawonsu ya chamwamu, ap tekany kuns rufu ra Kristu, mudi chipan ni chakupesh mulong wa chitil.”—Tang 1 Yohan 2:1, 2.
2 Diyingish dimwing diapalangeshau mu Chinong cha Kalam cha Zion cha kapamp ka kusambish mu Kafumpul 1879 diading dia kukasikeshin dilejan dia Bibil piur pa difut. Mu gazet winou mwading “yakudia pa chisu chau,” mulong kwisudiel kwa mivu 1800, uvud upandakena wa antu alondanga anch adi in Kristu asambisha kwidjidjek anch rufu ra Kristu rikutwish kwikal difut dia yitil yetu. (Mat. 24:45) Pa chisu chinicha, antu avud asambish kwitiyij ku alejen anch muntu ukat kukarumukang amwinend kwinsambishil ni kaswiridinap difut. Chawiy lel, kambuy Paul wamuyula Timote anch: “Iyepa ku yilondilond ni mazu ma ntad ja antu idimbil anch ronganyin rakin; mulong mu kulondul yiney antu amwing arumbuka kal mwi njil ya ritiy.”—1 Tim. 6:20, 21.
3. Ov, tukez kushishikin katat pa yipul ik?
3 Usotinap chakin kamu ‘kupumbuk mwi njil ya ritiy.’ Chakwel ritiy rey ridandamena kwikal rikash, chiwapidil kushinshikin pa yipul yiney: Ov, mulong wa niswiridin difut? Ov, chadinga cha usey ik? Ov, mutapu ik nikutwisha kutaninamu mu ditenchik dined dia usey dikutwisha kwimpandish ku ujim wa Nzamb?
Kupand ku Ujim wa Nzamb
4, 5. Ov, chom ik chimekeshina anch ujim wa Nzamb udi pa ditenchik dined diyimp dia yom?
4 Bibil ni jinsangu jikash japasak ja antu jimekeshin anch kudiosh pasalay Adam chitil, ujim wa Nzamb ‘udi padiau’ antu. (Yoh. 3:36) Chinench chimeken patok anch kwikil muntu ap umwing ukutwisha kwiyep ku rufu rikutwisha kumushiken. Ukaleng wa Satan wakangeny kal patok kuyilam antu ku mar, ni kwikil winyikel wa antu ap umwing watwisha kuwanyish maswir ma antwend awonsu. (1 Yoh. 5:19) Chawiy lel, antu adandamedin kuman mar ma njit, chisum, ni uzwendj.
5 Chakin kamu, Yehova kakatap kuyukish ditenchik dined diyimp dia yom. Paul walonda anch “Ujim wa Nzamb wamekana mwiur kudi antu awonsu akad Nzamb ni akad kutentam.” (Rom 1:18-20) Chawiy lel, antu ashakamina pakad kukarumuk akweta yaku yiyimp kakezap kwipuk yibudikin ya yisal yau. Nlel unou, ujim wa Nzamb aumekeshin mu uruu wa dirumburish wichilau mud yipupu pa mangand ma Satan, ni jinsangu jinej jidi mu jindond jivud ja mikand yetu yimedina pa Bibil.—Kuj. 16:1.
6, 7. Ov, mudimu ik utakedinau kudi in Kristu azizidilau many, ni chisu ik chiyinkishinau antu adia mu mangand ma Satan?
6 Ov, chinech chirumburikin anch kwikil kand chisu chakwel anch antu adiokala mu winyikel wa Satan ni kwez chakwel atambula yiyukish ya Nzamb? Bwat, mutapu udiaku kand wa kuchirish urund ni Yehova. In Kristu azizidilau many, adia “antimesh a Kristu,” akat kutakel mudimu wa kulejan patok usadidinau mulong wa kuyitazuk antu a michid yawonsu anch: “Chakulany ni Nzamb.”—2 Kor. 5:20, 21.
7 Kambuy Paul walonda anch Yesu “watukamunina ku ujim usotila kwez.” (1 Tes. 1:10) Kumekesh kwinoku kwa nsudiel kwa ujim wa Yehova kukez kushiken ku kusheshik kwa chikupu kwa akayitil akad kukarumuk. (2 Tes. 1:6-9) Ov, nany ukeza kupand? Bibil ulondin anch: “Ukwitiyila padiay mwan ukwet kal mwom wa chikupu, pakwez ukulika kuziyil kudi mwan kakez kamanip mwom, pakwez ujim wa Nzamb udi padiay ndiy.” (Yoh. 3:36) Mwawiy, antu awonsu adia aom ni itiyijina mudiay Yesu ni difut, pa chisu chikeza kusheshik ditenchik dined, akez kupand ku yibudikin ya ujim wa dichuku dia nsudiel dia Nzamb.
Mudimu wa Difut
8. (a) Ov, ruchingej ik rijim radingau nich Adam ni Ev? (b) Ov, mutapu ik mwamekeshay Yehova anch udi Nzamb wa kutentam kuwanyidina?
8 Adam nenday Ev ading awayidina payitangau. Anch adandamena kumuziyil Nzamb, divu diela kwizul ni anau akweta musangar ashakamina nau pamwing mu Paradis. Pakwez, cha ushon, anvajetu ambwambwila kwa kwisotil ku chijil cha Nzamb. Mudi chibudikin, ayirumburisha nich rufu ra chikupu ni ayopata mu Paradis wa kusambish. Pasuta mivu, Adam ni Ev avala an, chitil chandama mu mangand, ikundj ni mband wa kusambish ananapa ni kufa. Chinech chimekeshin anch dizu dia Yehova didi diakin. Chikwau kand, ndiy udi Nzamb wa kutentam kuwanyidina. Yehova wamubabesha Adam anch kudia dibuj dikojinau kukez kulet rufu—ni chawiy chashikena.
9, 10. (a) Ov, mulong wak anenday Adam akat kufang? (b) Ov, mutapu ik tukutwisha kupand ku rufu ra chikupu?
9 Pitudia anend a Adam, twaswana mujimbu wakad kuwanyin wa chitil ni ukeza kufa. Tukutwish kulond anch pasalay Adam chitil, etu twading mwi mbund yend. Chawiy lel, niyetu twawila mu dirumburish dia kufa. Anch Yehova wadiosha rufu pakad difut, chela kwikal kuburen kwa uyakin kwa dizu diend. Pa chinech, Paul wisambina mulong wetwetu awansu palonday anch: “Twij nawamp anch, yijil yikwet mudimu ku mwiku wa antu, pakwez am nidi muntu mwin kufa anlandisha kal mu uswik wa yitil. Yow, nayindam! Ov, nany ukeza kwinkamunin ku mujimbu winou ukata kwintwal ku rufu?”—Rom 7:14, 24, MN.
10 Kudi ching Yehova Nzamb amwinend kusu ukutwisha kulet mufulandal utentamina pa kutwishay kutulikishin yitil yetu ni kutupandish ku dirumburish dia rufu ra chikupu. Chawiy chasalay pamutumay mwanend mukatish kudiokal mwiur kwez kuvadikin mudi muntu uwanyidina, chakwel apana mwom wend mudi difut mulong wetwetu. Chinyim ni Adam, Yesu washala utentamina. Chikwau kand, “ndiy kasalap chitil.” (1 Pita 2:22) Chawiy lel, Yesu wadinga nich ukaliweny wa kuval antu awanyidina. Pakwez, ndiy wayilikidila akankuny a Nzamb amujipa chakwel ayisenda an akayitil a Adam ni kusal anch antu akeza kwitiyij mudiay ndiy atambula mwom wa chikupu. Mukand wa Nzamb urumburil anch: “Mulong kudi kusu nching Nzamb umwing, ni mwin kutusankesh etu nend Nzamb udi kusu ching umwing, ndiy kamu Kristu Yesu wikala muntu. Ndiy wipana amwinend mulong wa kuyikwol antu awonsu.”—1 Tim. 2:5, 6, MN.
11. (a) Ov, mutapu ik tukutwisha kutaninamu mu difut dilejenau mu chilakej? (b) Ov, mutapu ik chidia cha usey kutambul yiyukish ya difut?
11 Chitwishikin kwilikej midimu ya difut ni mwikadil wa antu iyau nfalang jau jawonsu kudi banque muyimp ni ashal mu mabaz. In banque ayiteka mu rukan mu mivu yivud. Pakwez chikwikal nchik kudi antu iyau nfalang jau? Pawilau kal mu uzwendj, katwishinap kudiokal mu mwikadil winou djat ni pakezay muntu umwing muwamp udia mpich kusambish kutakel banque winou ni kuyichirishin nfalang jau jiyau, ni kuyidiosh mu mabaz. Chilik chimwing, Yehova Nzamb ni Mwanend mukatish ayilandin anend a Adam ni kupwish mabaz mau ma chitil kusutil ku mash mamwangay Yesu Kristu. Chawiy lel Yohan Mubabatish walonda piur pa Yesu anch: “Talany Mwan a mukoku wa Nzamb, ukat kusend yitil ya mangand!” (Yoh. 1:29) Mangand ma antu masendinau yitil madiap ching ma aom pakwez madi kand ma afu.
Usey wa Difut
12, 13. Ov, chom ik tukutwisha kwilej piur pa rusot ra Aburaham ra kumupan Isak?
12 Chitukasikedin kwijik nawamp usey udiadinga nich difut kudi Tatukwetu wa mwiur ni kudi Mwanend mukatish. Pakwez Bibil ulejen yom yashikena yikutwisha kutukwash kutongijokin pa mulong winou. Chilakej, tongin bil pa mutapu mwovay Aburaham pakasay weny wa machuku masatu payay ku Moriya mulong wa kuziyil ku yamulejay Nzamb anch: “Mutambula mwaney ikundj kapwokal ukatila, ndiy kamu Isak, chad yang nend kwingand ya Moriya, ukamupeshila kwinikwa kwikal yakupesh ya kwosh pa mukandu unikakulejaku.”—Dis. 22:2-4.
13 Chawiy lel, Aburaham washika pa ndond pamulejau. Tongin bil pa mutapu wovay kusansan ku muchim pasambishay kumukas Isak ku makas ni ku mend ni kumutek pa chintamb chatungay Aburaham amwinend. Ov, kusansan mudi ik kwovay Aburaham pa kuzambul mpak chakwel amujipa mwanend! Tongin bil pa mutapu wovay Isak pa mutekau pa chintamb, ni kuchingejin kwambuk kwa mpak, kuswan kwa mpak kwela kumushikij ku rufu. Pa chisu chinicha Mwangel wa Yehova wamwimika Aburaham. Chasalau Aburuham ni Isak pa chisu chinicha chitukwashin kwov nawamp mutapu ik wovay Yehova payilikidilay antu a Satan chakwel amujipa Mwanend. Kwovijan kwa Isak ni Aburaham kwilikejin nawamp rusot ra Yesu ra kuman mar ni kufa mulong wetwetu.—Heb. 11:17-19.
14. Ov, chom ik chashikena mu mwom wa Jakob chitukwashin kusanger usey wa difut?
14 Chitwishikin kwilikej kand usey wa difut nich yom yashikena mu mwom wa Jakob. Pakach pa anend awonsu, mwan umwing wading ukatinay Jakob nakash wading Josef. Cha ushon, anamakwend a Josef amwovila ris, ni kumukis. Chikwau kand, Josef wasota anch amutuma kudi tatukwend chakwel aya akamana mutapu mwadingau mwikadil wa anamakwend. Pa chisu chinicha, ading asadina mudimu wa ukafung wa chisak cha anam a Jakob ku a kilometre 100 kwindum kwa kwol kwau ku Heberon. Tongin pa mutapu wovay Jakob pachirikau anend nich maswin ma Josef makweta mash! Ndiy walond anch: “Udi kamu kabwik wa mwanam Josef! Padi nnam wachidiany wamudila kal kwend, chakin, Josef amuzanodin kwend yizanizan!” Yiney yawonsu yading yikash kudi Jakob, ndiy wamudila Josef mu machuku mavud. (Dis. 37:33, 34) Yehova kakutwishap kusal yom mudi mukatau antu akad kuwanyin kusal. Chikwau kand, kutongijokin pa milong yiney yashikena mu mwom wa Jakob kukutwish kutukwash kwijik nawamp, mutapu wateshay Nzamb pamumeshau Mwanend mukatish mar ni kumujip rufu ruyimp padingay muntu pa divu.
Kutaninamu mu Difut
15, 16. (a) Ov, mutapu ik wamekeshay Yehova anch witiyijin difut? (b) Ov, mutapu ik utanidinamu mu difut?
15 Yehova Nzamb wamuvumbula Mwanend ushinshamena nich mujimbu wa muspiritu wa uyaj. (1 Pita 3:18) Mu machuku 40, Yesu wavumbuka wamekana kudi in kwilej end, wakasikesha ritiy rau ni wayirijeka chakwel akasala mudimu ukash wa kulejan mu machuku ma kurutu. Kupwa wakandama mwiur. Mwinimwa ndiy wapana kudi Nzamb usey wa mash mend mamwangay, ni wamasadila mulong wa in kumulondul akin, itiyijina mu usey wa yakupesh ya difut. Yehova Nzamb wamekesha anch witiyija difut dia Kristu kusutil ku kumwinkish Yesu uyaj wa kuyizizil in kwilej end spiritu utumbila pakumanganau pamwing mu Yerusalem pa dichuku dia Pantekot mu muvu wa 33 C.C.—Mid. 2:33.
16 In kwilej a Kristu inay azizidilau many asambisha kuyikasikesh antu akwau chakwel ipuka ujim wa Nzamb kusutil ku kutambul dibatish mu dijin dia Yesu Kristu mulong wa dilikishin dia yitil yau. (Tang Midimu 2:38-40.) Kudiosh pa dichuku dinidia diamushena djat ni katat, mamiliyon ma antu a michid yawonsu ayitazuka chakwel ikala arund nend Nzamb kusutil ku ritiy mu yakupesh ya difut dia Yesu. (Yoh. 6:44) Pinap, tufanyidin kushinshikin pa yipul yiney yaad: Ov, kwisu kwatambulay muntu ap umwing pakach petu ruchingej ra mwom wa chikupu mulong wa midimu yend amwineny yiwamp? Kupwa kwa kutambul ruchingej riner ramushena, ov, tukutwish kurishadish kand?
17. Ov, mutapu ik ukutwisha kuman chiyukish chamushena cha kwikal murund wa Nzamb?
17 Difut didi kamu ranaken rikash. Pakwez kusutil ku kwijidish ritiy mu difut dined, mamiliyon ma antu nlel unou ikala kal arund nend Nzamb, nich ruchingej ra mwom wa chikupu mu paradis pa divu. Pakwez, kwikal murund nend a Yehova, kumekeshinap anch tukez kudandamen mu urund winou pamwing nend. Chakwel twipuka dichuku dia kurutu dia ujim wa Nzamb, tufanyidin kudandamen kumekesh kusanger kwetu kukash kwa “[difut] mu kwikodil kwa mu Yesu Kristu.”—Rom 3:24; Tang Filip 2:12.
Dandamen Kwitiyij mu Ritiy
18. Ov, mu kwiyijidish ritiy mu difut mudi yom ik?
18 Verse udia ku mutu wa mulong winou, Yohan 3:36, umekeshin mutapu kwitina kwijidish ritiy mudiay Mwant Yesu Kristu kumuziyil ndiy. Kusanger difut kufanyidin kutubachik kushakam kwambatan nich malejan ma Yesu, kuwejinaku ni yafundishay piur pa yisal yiwamp. (Mar. 7:21-23) “Ujim wa Nzamb ukez kamekan kudi” antu awonsu akad kukurumuk ipanina mu yisal mudi masandj, maswimbu ma masaal, ni ‘kwijond kwawonsu,’ kuwejinaku ni kudandamen kutal mafilm ma masandj.—Efes 5:3-6, MN.
19. Ov, mu mutapu ik uwamp tukutwisha kwijidish ritiy retu mu difut?
19 Kusanger kwetu mulong wa difut kufanyidin kutusal tudandamena kusal chisu chawonsu “yom yawonsu yitumbila.” (2 Pita 3:11) Itekinany chisu chiwanyidina mulong wa malembil makash ni makad kujing, dilejan dia Bibil dia muntu ipend, kukumangan, kutenchik difukwil dia dijuku, ni mujikit wa kuleja Want nich mushiku. Ni “kangal [twavuramenay] kusal nawamp ni kukwashijan, mulong yakupesh yiniya yawiy yikata kumusangaresh Nzamb.”—Heb. 13:15, 16.
20. Ov, chiyukish ik chikutwishau kuchingejin kudi antu awonsu adandamedina kwijidish ritiy mu difut?
20 Pakezay Yehova kumekesh ujim wend pa ditenchik dined dia yom, tukez kwikal nich musangar mudi ik mulong twijidisha ritiy retu mu difut ni twadandamena kumekesh kusanger mu difut dined! Mu mangand masu ma kushilamu kwa Nzamb, tukez kujikitish chikupu mulong wa ditenchik dined diamushena diatupandisha ku ujim wa Nzamb.—Tang Yohan 3:16; Kujingunik 7:9, 10, 13, 14.
Ov, Ukez Kwakul Nchik?
• Ov, mulong wak tuswiridin difut?
• Ov, difut diading ni usey ik?
• Ov, yiyukish ik yidiokila ku difut?
• Ov, mutapu ik tukutwisha kwitiyij mu yakupesh ya difut ya Yesu?
[Chipich chidia pa paj wa 19]
Chis cha kwikal mu urund ni Yehova achifungwil
[Yipich yidia pa paj wa 21]
Kutongijokin pa yom yiney yamushikena piur pa Aburaham, Isak, ni Jakob kukutwish kutukwash tusangera usey ukash wa difut