Chakanying 4
Tond Nich Manangu Arund Ney
OV, CHOM IK CHIFUNDISHINAY BIBIL? “Muntu ukata kwend nau in manangu, niyend ukwikal mwin manangu.”—Jinswir 13:20.
OV, CHISU CHIKOKUJOL? Arund netu akez pamwing ap kuwejinaku ku kusanger kwetu kwa yom yitukweta ap kukukepish. Yaku yau ni minsamb yau yikwikal nich yibachikin pa mutapu wetu wa kuman mwom.—1 Korint 15:33.
Tal, chilakej, cha jinsangu ja Bibil ja antu 12 achirika pa yau mu kutentish mwin ngand ya Kanan. Antu avud pakach pau “ayiletina in Isarel rusangu ruyimp ra ngand yayau ni kutentish.” Ap mwamu, antu aad alonda yom yikasikeshina piur pa ngand ya Kanan, ni alonda anch “yidi ngand yiwamp nakash.” Pakwez yitongijok yiyimp ya in kutentish dikum yapalangana pakach pa antu. Rusangu ridandamen anch: “Chad chisak chawonsu chabaroka, . . . in Isarel awonsu [asambisha kununganijan].”—Kuchind Michid 13:30–14:9.
Chilik chimwing, nlel unou, antu avud akat “kununganijan, akat kufundijan muntu ni mukwau.” (Jud 16) Chikasiken kudandamen kusanger yom tukweta anch tudi ni arund akad kusanger ap dichuku dimwing yom yikwetau.
OV, CHOM IK UKUTWISHA KUSAL? Shinshikin mutapu ukata kwambamb ni arund ney. Ov, arund ney akat kwibaz yisu yivud piur pa yom yikwetau, ap akat kwinan chisu chawonsu piur pa yom yakad awiy kwikal nich? Ov, udi murund wa mutapu ik kudi awiy? Ov, uyibachikin arund ney chakwel akwovila ris, ap uyikasikeshin kusanger yom yikwetau?
Tal chilakej chapanay David, wikala mwant, ni Jonatan, mwan wa Mwant Saul. David wachinina mwi mpay. Mulong mwant Saul wamwova David wom, wasota kumujip. Ap anch Jonatan wadinga ufanyidina kamu kwikal mwant, ndiy wikala murund nend a David wa piswimp nakash. Jonatan witiyija anch Nzamb wamutonda David chakwel ikala mwant ni wasangera kumukwash murund nend.—1 Samwel 19:1, 2; 20:30-33; 23:14-18.
Uswiridin arund a mutapu winou, arund akukasikeshina kusanger yom ukweta ni akusotidila yom yiwamp nakash. (Jinswir 17:17) Chakin kamu, chakwel wikala ni arund a mutapu winou ufanyidin kumekesh ngikadil mudi yiney amwiney.—Filip 2:3, 4.
[Chipich chidia pa paj wa 7]
Ov, arund ney akez kuwejinaku ku kusanger kwey kwa yom ukweta ap kukukepish?