Ilejina Ku Dizu Dia Nzamb
Ov, Nzamb Udi Nany?
Mutu wa mulong winou ukasikehin yipul ukutwisha kwiyipul ni ulejen anch ukutwish kutan yakul mu Bibil wey. Atuman a Yehova akez kusanger kwisambin ney pa yakul yiney.
1. Ov, Nzamb Udi Nany?
Nzamb wakin udi Sakatang wa yom yawonsu. Bibil umutazukin anch “Mwant wa michid yawonsu,” chirumburikin anch kakwetap disambishil ni kakezap kwikal ni nsudiel. (Kujingunik 15:3, TMK) Mulong Nzamb udi Musul wa mwom, tufanyidin kumwifukwil ching kusu ndiy.—Tang Kujingunik 4:11.
2. Ov, Nzamb ufaniken nich ik?
Kwikil muntu ap umwing wamumanap kal Nzamb, mulong udi Spiritu, chawiy chirumburikin anch ndiy uding piur nakash pa yitang yawonsu yikweta mwom pa divu. (Yohan 1:18; 4:24) Untu wa Nzamb umeken mu yom yawonsu yasalay. Chilakej, pitutadina mitapu kushalijan ya mabuj ni yisalamb tumen rukat ni manangu ma Nzamb. Kujimb kwa mangand kutulejin usu wa Nzamb.—Tang Rom 1:20.
Tukutwish kwilej yom yivud mu Bibil piur pa untu wa Nzamb. Chilakej, Bibil utulejin yikatilay ni yikisinay Nzamb, mutapu ik ukatay kuyisadil antu ni yisadilay mu mikadil kushalijan.—Tang Kuseng 103:7-10.
3. Ov, Nzamb ukwet dijin?
Yesu walonda anch: “Tatukwetu udia mwiur dijin diey aditumbish.” (Mateu 6:9) Ap anch Nzamb ukwet yijiken yivud, ukwet dijin dimwing kusu. Mu jindim kushalijan, adijimbwil mu mitapu kushalijan. Mu uruund tulondining anch “Yehova” ap yisu yimwing “Yahweh.”—Tang Kuseng 83:18.
Dijin dia Nzamb adidioshin kal mu ma Bibil mavud ni kudiswimp nich yijiken mudi Mwant ap Nzamb. Pakwez pafundau Bibil, Dijin dia Nzamb adifunda tupamp 7000. Yesu wijikisha dijin dia Nzamb mu kudisadil parumburilay Dizu dia Nzamb kudi antu. Ndiy wayikwasha chakwel amwijika Nzamb.—Tang Yohan 17:26.
4. Ov, Yehova ukat kutubangin?
Yehova umekeshin anch ukat kutusanger pakatay kwakulang ku malembil metu. (Kuseng 65:2) Ov, kupandakan kwa mar kumekeshin anch Nzamb kakatap kutubangin? Antu amwing alondining anch Nzamb utumeshining mar mulong wa kutupak, pakwez chidiap chakin. Bibil ulondin anch: “Nzamb udi kulemp ni kuyip.”—Job 34:10; tang Jakob 1:13.
Nzamb wamwinkisha muntu want ipau. Ov, tukatap kusanger want ipau tukweta wa kutond mulong wa kumusadil Nzamb? (Joshua 24:15) Mar mapandiken mulong antu avud asotining kuyisal antu akwau uyimp. Yehova ukisining kuman uyimp winou.—Tang Disambishil 6:5, 6.
Piswimp ap, Yehova ukez kumusadil Yesu chakwel adiosha mar ni ayishesha antu asadina uyimp winou. Pakwez, Yehova ukwet diyingish diwamp dia kulikidil mar chisu chikemp. Dilejan dia nsudiel pakach pa mitu ya milong yiney yilondwilaku yikez kurumburil mulong wak ulikidilay Nzamb mar.—Tang Isay 11:4.
5. Ov, Chom ik chisotilay Nzamb etu tusala?
Yehova watutanga nich ukaliweny wa kumwijik ni kumukat. Ndiy usotil anch twileja uyakin piur pend. (1 Timote 2:4) Anch twilej Bibil, tukez kumwijik Nzamb mudi Murund.—Tang Jinswir 2:4, 5.
Mulong Yehova watwinkisha mwom, tufanyidin kumukat nakash kupandakanamu muntu mukwau. Tukutwish kumulej Nzamb anch tumukatil kusutil ku kwisamb nend mu malembil ni mu kusal yom yitwitinay. (Jinswir 15:8) Yehova utulejin anch tufanyidin kuyisadil antu akwau nich rukat.—Tang Marko 12:29, 30; 1 John 5:3.
Anch usotil jinsangu jikwau jivud, tal shapitre wa 1 wa buku winou, wapalangeshau kudi Atuman a Yehova.
Chom ik Chakin Kamu Chifundishinay Bibil?
[Chipich chidia pa paj wa 23]
Ov, kukutwish kwikal diyingish dimwing diwamp dia kulikidil mar mu chisu chikemp?