Ilejina Ku Dizu Dia Nzamb

Mulong Wak Ulikidinay Nzamb Uyimp ni Mar?

Mutu wa mulong winou ulangwishin yipul ukutwisha kwiyipul ni ulejen ndond ukutwisha kutang chakul mu Bibil wey. Atuman a Yehova akez kusanger kwisamb ney piur pa yakul yiney.

1. Ov, uyimp wasambisha mutapu ik?

Uyimp wasambisha pa divu pa chisu chalejanay Satan makasu makusambish. Satan kadingap muyimp pa mutangau. Ndiy wadinga mwangel uwanyidina, pakwez ndiy “kadingap ku mutambu wa uyakin.” (Yohan 8:44) Ndiy wakudisha maku ma kumwifukwil chisal chimufanyidina ching kusu Nzamb amwinend. Satan wamudimba mband wakusambish, Ev ni wamubachika chakwel amuziyila ndiy pa ndond pa kumuziyil Nzamb. Adam winunga kudi Ev mu kulik kumuziyil Nzamb. Mupak wa Adam waleta mar ni rufu.​—Tang Disambishil 3:1-6, 17-19.

Pamulejau Ev kudi Satan anch alika kumuziyil Nzamb, ndiy watenchika kubwambwil ku ukaleng wa Nzamb. Antu avud inungin kudi Satan mu kulik anch Nzamb ikala Ntakel. Chawiy lel Satan wikala “mwin kutakel wa ngand.”​—Tang Yohan 14:30; Kujingunik 12:9.

2. Ov, chitang cha Nzamb chading chayipin kal?

Antu ni angel atangau kudi Nzamb ading nich ukaliweny uwanyidina wa kuziyil ku yitiyij ya Nzamb. (Kuvurik Yijil 32:5) Nzamb watutanga nich want ipau wa kutond uwamp ni uyimp. Want ipau winou utwinkishin mutapu wa kumekesh rukat kudi Nzamb.​—Tang Jakob 1:13-15; 1 Yohan 5:3.

3. Ov, mulong wak Nzamb walikidilay mar?

Pa chisu chinicha, Yehova walikidila kubwambul ku ukaleng wend. Mulong wak? Mulong wa kumekesh anch usu ukezau kusal pakad ndiy ukezap kwikal nich ukwash kudi antu. (Jer. 10:23) Kupwa kwa mivu 6000 ya rusangu ra antu, mulong winou aukatula. Antu in kutakel akanganya kupwish njit, chisum, kuburen kutentam, ni mayej.​—Tang Mulej 7:29; 8:9; Rom 9:17.

Chinyim ni chinech, antu akata kumwitiyij Nzamb mudi Ntakel wau akat kutan yiyukish. (Isay 48:17, 18) Piswimp ap, Yehova ukez kushesh winyikel wawonsu wa antu. Ching kusu antu itiyijina kuyitakel kudi Nzamb awiy akeza kushakam pa divu.​—Isay 2:3, 4; 11:9; tang Daniel 2:44.

4. Ov, kushimpish muchim kwa Nzamb kwamekesha chom ik?

Satan walonda anch antu kakutwishap kumuziyil Nzamb mu kutentam. Kushimpish muchim kwa Nzamb kwatwinkishin etwawonsu mutapu wa kumekesh anch tukasikeshin wintakel wa Nzamb ap wa muntu. Tumekeshin kutond kwetu kusutil ku mutapu wetu wa kushakam.​—Tang Job 1:8-11; Jinswir 27:11.

5. Ov, mutapu ik tukutwisha kumutond Nzamb mudi Ntakel?

Tusotin anch Nzamb ikala Ntakel pitukata kukimb ni kusadil difukwil diakin dimedina pa Dizu diend, Bibil. (Yohan 4:23) Tukat kwipuk kand kwiyandjik mu chipolitik ni mwi njit mudi mwasalay Yesu.​—Tang Yohan 17:14.

Satan ukat kusadil usu wend mulong wa kukasikesh masandj, ni yisal yiyimp. Anch twalik yisal yiney, arund netu amwing ni ambay netu akutwish kutusip ap kutupompat. (1 Pita 4:3, 4) Chawiy lel tufanyidin kutong pa chom chimwing. Ov, tukez kwibomb ni antu amukatina Nzamb? Ov, tukez kuziyil ku yijil yend ya manangu ni ya rukat? Anch twasal mwamu, tukumekesh anch Satan udi mwin kudimban palonday anch kwikil muntu ap umwing ukusal yitinay Nzamb.​—Tang 1 Korint 6:9, 10; 15:33.

Chakwel utana jinsangu jivud, tal shapitre wa 11 wa buku winou, wapalangeshau kudi Atuman a Yehova. Chom ik Chakin Kamu Chifundishinay Bibil?

[Chipich chidia pa paj wa 12]

Adam watonda nayimp

[Chipich chidia pa paj wa 13]

Kutond kwetu kumekeshin anch tusotin anch Nzamb ikala Ntakel wetu