Ov, Kwiswedish Kwa Nzamb—chom ik?
“Chawiy kwashala sabat wa kwiswedish kudi antu a Nzamb.”—HEB. 4:9, TMK.
1, 2. Ov, chom ik tukutwisha kulond kwambatan nich uyakin ufundilau mu Disambishil 2:3, ni chilangwishin yipul ik?
KUDIOSH ku shapitre wa kusambish wa Disambishil, twileja anch Nzamb warijeka divu mu machuku musamban ma chifanikesh chakwel antu ashakamamu. Nsudiel ya yirung ni yirung yiney ayilejen nich mazu minam anch: “Kwading urel ni pamanch.” (Dis. 1:5, 8, 13, 19, 23, 31) Chawiy lel, mulong wa kulimish dichuku dia sambwad, Bibil ulondin anch: “[Nzamb] wadiyukisha dichuku dia sambwad, waditumbisha kand, mulong dined diawiy diswedishay papwishay kutang yom yawonsu.”—Dis. 2:3.
2 Tal mutapu ulondinau anch “diawiy diswedishay.” Chinech chimekeshin anch dichuku dia sambwad—“Dichuku” dia Nzamb dia kwiswedish—diasambisha mu muvu wa 1513 K.C.C. pafunday Moses mukand wa Disambishil. Ov, dichuku dia kwiswedish dia Nzamb didandamedin? Anch chidi mwamu, ov tukutwish kwandamamu nlel unou? Yakul ku yipul yiney yidi ya usey nakash kud etu.
Ov, Yehova Udandamedin “Kwiswedish”?
3. Ov, mutapu ik mamekeshina mazu ma Yesu mafundau mu Yohan 5:16, 17 anch dichuku dia sambwad diadandamena mu mivu chitot ya kusambish?
3 Kudi mayingish maad matukwashina kushiken ku kulond anch dichuku dia sambwad diading didandamedin mu mivu chitot ya kusambish C.C. Chakusambish, shinshikin yalonday Yesu kudi akankuny nend asambisha kumupompat mulong wokana pa dichuku dia Sabat, awiy amana anch chisal chinech chading chirumburikin kusal mudimu. Mwant wayileja anch: “Tatukwam ukat kusalang mudimu yisu yawonsu, chifanyidin niyam kusal mudimu.” (Yoh. 5:16, 17) Ov, pisu padinga mulong? Yesu amufisha nich mulong wasala mudimu pa dichuku dia Sabat. Palonday anch: “Tatukwam ukat kusalang mudimu yisu yawonsu” ndiy wayakula ku chitongijok chau. Chawiy lel, Yesu wading ukat kuyilej antu amufisha nich anch: ‘Am ni Tatukwam twipanin kal mu mudimu wa chilik chimwing. Mulong Tatukwam udandamedin kusal mu sabat wend wa mivu tunan, ndiy wanginkisha mbil ya kudandamen kusal ap pa dichuku dia Sabat.’ Chawiy lel, Yesu walejana anch piur pa divu, Sabat mujim wa dichuku dia kwiswedish dia Nzamb, dichuku dia sambwad, kapwap mu chirung chend.a
4. Ov, diyingish ik dikwau diletinay Paul piur pa kulejan anch dichuku dia sambwad diadandamena pa chirung chend?
4 Diyingish diakaad adilejen kudi kambuy Paul. Pajimbulay Disambishil 2:2 piur pa kwiswedish kwa Nzamb, Paul wafunda nich spiritu wa Nzamb anch: “Katat etu twitiyina tuyil ni kushik ku chisu cha kwiswedish kwinoku.” (Heb. 4:3, 4, 6, 9) Chawiy lel, dichuku dia sambwad diading dikat kudandamen pa chirung cha Paul. Ov, chirung cha kwiswedish chafanyidina kudandamen mu uvud wa machuku minch?
5. Ov, chom ik chadinga rutong ra dichuku dia sambwad, rutong riner rikez kuwanyin chisu ik?
5 Mulong wa kwakul ku chipul chinech, tufanyidin kuvurik piur pa rutong ra dichuku dia sambwad. Disambishil 2:3 dirumburil anch: “[Nzamb] wadiyukisha dichuku dia sambwad, waditumbisha kand.” Dichuku dined ading akat ‘kuditumbish’—kuditokish ap kuditek kunsu, kudi Yehova—mulong wa kuwanyish rutong rend. Rutong riner piur pa kushakam pa divu kudi amakundj ni amband aziyidila akeza kudilam ni kulam mwom wawonsu udiap. (Dis. 1:28) Chidi mulong wa kuwanyish rutong riner chawiy chidandamedinau Yehova Nzamb ni Yesu Kristu, ‘Mwant wa dichuku dia kwiswedish, kusalang mudimu yisu yawonsu.’ (Mat. 12:8) Dichuku dia kwiswedish kwa Nzamb dikez kudandamen djat ni pakeza kuwanyin rutong rend kwambatan nich yikeza kuwanyin kwinsudiel kwa Mivu Kanan ya Want wa Kristu.
Kangal “Wawa Mudi Mwawau Antu Amwing Mwi Mpay Alika Kumuziyil Nzamb”
6. Ov, yilakej ik yidia mudi chibabesh kud etu, ni dilejan ik tukutwisha kwilejin ku yilakej yiney?
6 Rutong ra Nzamb amulejar Adam nenday Ev patok, pakwez awiy akanganya kuziyil. Mwaning, Adam ni Ev ading antu a kusambish alika kuziyil. Kudiosh pinipa kwikala kand ma miliyon ma antu mayilondula. Ap antu atondau kudi Nzamb, muchid wa in Isarel ni wawiy walika kuziyil. Chawiy lel, Paul wayikasikesha in Kristu a mu mivu chitot ya kusambish anch ap antu amwing pakach pau ela kuwil mu mupit mwawilau in Isarel a pasak. Ndiy wafunda anch: “Tusalany mwamu chakwel kangal muntu umwing wa pakach petu wawa mudi mwawau antu amwing mwi mpay alika kumuziyil Nzamb.” (Heb. 4:11) Tal anch Paul walejana anch kulik kuziyil kurumburikin kukangany kwandam mu kwiswedish kwa Nzamb. Ov, chirumburikin ik kudi etu? Anch twalik kuziyil ku rusot ra Nzamb mu mutapu kanang, ov tukutwish kukangany kwandam mu kwiswedish kwa Nzamb? Chimeken patok anch, chakul ku chipul chinech chidi cha usey nakash kudi etu, ni tukez kuchishinshikin kurutu. Pakwez, pa mulong winou, talany amboku yom yivud tukutwisha kwilej piur pa kwandam mu kwiswedish kwa Nzamb kusutil ku kushinshikin chilakej chiyimp cha in Isarel.
“Awiy Kakez Kandamap Mwin Ngand Yinayirijekina Ing Iswedishinangamu”
7. Ov, chom ik chadingay nich Yehova mu manangu payipandishau in Isarel mu uswik wa in Idjibit, ni chom ik chadinga chiyichingejidinau kusal?
7 Mu muvu wa 1513 K.C.C., Yehova wamekesha rutong rend piur pa in Isarel kudi kashalapol wend Moses. Nzamb walonda anch: “Katat nez kal pansh mulong wa kuyikamunin ku chikas cha in Idjibit. Nikez kayibudish kuyitwal kwi ngand yiwamp yijim, ngand yizwila nich mayel ni woch.” (Kub. 3:8) Mudi mwashilayimu Yehova kudi ngakau Aburaham rusot rend ra kuyikamunin in Isarel “ku chikas cha in Idjibit” rading ra kuyilam mud antwend. (Dis. 22:17) Nzamb wayinkisha in Isarel chijil chasala anch ikala mu urund wa chisambu ni ndiy. (Isay 48:17, 18) Ndiy wayileja in Isarel anch: “Anch en wez waziyilany dizu diam ni kulam manswik mam, [mafundau mu chijil], en ukez kikalany amam pakach pa antu awonsu.” (Kub. 19:5, 6) Chawiy lel, in Isarel ading asangaredina urund ni Nzamb awiy afanyidina kuziyil ku dizu diend.
8. Ov, in Isarel ela kwikal ni mashakamin ma mutapu ik anch amuziyila Nzamb?
8 Tongin bil mutapu mwom wela kwikal anch in Isarel aziyila ku Dizu dia Nzamb! Yehova wela kuyukish yir yau, mitond yau ya nviny, amikoku, ni angomb au. Akankuny nau kelap kudandamen kuyikwat. (Tang 1 Ant 10:23-27.) Pashikay Mesia, ndiy wayitana in Isarel ashich nawamp mudi muchid udia panrend, wakad kwikal mu uswik wa in Rom. Isarel wela kwikal want wa chilakej kudia amutej nend, ni uletina uman wa kwel anch kuziyil kudi Nzamb wakin kuletining yiyukish ya muspiritu ni ya ku mujimbu.
9, 10. (a) Ov, mulong wak rusot ra in Isarel ra kuchirik mu Idjibit rading mulong ukash? (b) Mutapu ik kwela kuchirik mu Idjibit kuyipish difukwil dia in Isarel?
9 Isarel wading ni chiyukish mudi ik—cha kuziyil ku rutong ra Yehova, chayiletina kangal ayinau kusu yiyukish pakwez, kand majuku mawonsu ma pa divu! (Dis. 22:18) Pakwez, dijuku dined diawonsu dia ambwambol dialika kusanger kutenchik want wa chilakej mu wintakel wa uteokras. Chawiy lel, awiy ita ap kuchirik mu Idjibit! (Tang Kuchind Michid 14:2-4.) Katat, ov mutapu ik kuchirik kwau mu Idjibit kwela kukasikesh kuwanyin kwa rutong ra Nzamb ra kusal anch in Isarel ikala want wa chilakej? Chelap kwikal mwamu. Pakwez, anch in Isarel achirika mu uswik wa antu akad kumwijik Nzamb, awiy kelap kutwish kulondul Chijil cha Moses ni kutan yiyukish mu ditenchik dia Yehova dia kuyilikidil yitil yau. Awiy ading—nich chitongijok cha ku mujimbu—ni cha wimputames mud ik! Chidiap cha kushimok anch Yehova wayilonda ambwambol inay anch: “Chawiy chom chinadijimena dijuku dinidia, chad nalonda anch, ‘Michim yau yapumbukanga machuku mawonsu, komb antu ina kadingap kwau ij yom yinachingeja kudi awiy.’ Chawiy mulong wa ujim wam nachipa machip anch, ‘Awiy kakez kandamap mwin ngand yinayirijekina ing iswedishinangamu.’”—Heb. 3:10, 11; Kus. 95:10, 11.
10 Mu kusot kukimb kuchirik mu Idjibit, muchid winou wakad kuziyil wamekesha anch yiyukish ya muspiritu yatambulau yadingap ya usey, pakwez asota, yom mudi sausau, ni sabol wa mutapu ni mutapu, ni sabol wa ay wadinga mu Idjibit. (Kub. 11:5) Mudi Esau wakad kujikitish, ambwambol ading tayad ni kushadish dipit diau dia muspiritu mu kuswimp nich yakudia yitadina.—Dis. 25:30-32; Heb. 12:16.
11. Ov, mutapu ik kuburen kwa ritiy kwa in Isarel mu chirung cha Moses kwikala nich usu pa rutong ra Nzamb?
11 Chikalap nchik kuburen ritiy kwa dijuku dia in Isarel abudika mu Idjibit, Yehova wading “uchikat kusal mudimu” nich kushimpish muchim pantaliken ni kuwanyin kwa rutong rend, ni kushinshikin katat pa dijuku dikwau. Yidi ya dijuku dined disu yading yikat kuziyil kupandakanamu mwadingau atatukwau. Kwambatan nich chijil cha Yehova, awiy andama Mwingand ya Kushilamu ni asambisha kuyitakel. Mu Joshua 24:31, tutangin anch: “in Isarel amusadila [Yehova] mu mivu yawonsu ya mwom wa Joshua, ni mivu yawonsu ya amakurump amulondula Joshua, ni ading ij yisalijok yawonsu yiwamp yasalay [Yehova] kudi in Isarel.”
12. Ov, mutapu ik twija anch chitwishikin kwandam mu kwiswedish kwa Nzamb nlel unou?
12 Pakwez, dijuku dined diading diziyila diasambisha kufa pakemp-pakemp ni adiswikana kudi dijuku dikwau dia antu “akad kumwijik [Yehova] ap midimu yasalay mulong wa in Isarel.” Chawiy lel, “an in Isarel asala yom yiyimp kurutu kwa [Yehova], awiy asadila akish a Bal.” (Ank. 2:10, 11) Ngand ya Kushilamu yamekeshap chakin kamu kwikal “ndond ya kwiswedish” yakin kud awiy. Mulong wa kuburen kwa kuziyil kwau, awiy kelap chisu chawonsu kusanger chisambu pamwing ni Nzamb. Pisambinay piur pa chirung chasuta kal, Paul wafunda anch: “Chawiy anch Joshua wayinkisha antu [in Isarel] chisu cha kwiswedish mudi mwashilayimu Nzamb, ing Nzamb kalondap kand ya dichuku dia dikwau. Antu a Nzamb akutwish kwikal nich chisu cha kwiswedish.” (Heb. 4:8, 9) Palondinay anch “Antu a Nzamb” Paul wisambina piur pa in Kristu. Ov, chinech chirumburikin anch in Kristu akutwish kwandam mu kwiswedish kwa Nzamb? Chakin kamu—in Yuda ni in Kristu akad kwikal in Yuda!
Antu Amwing Akanganya Kwandam mu Kwiswedish Kwa Nzamb
13, 14. Pading kovijan ik pakach pa kulam Chijil cha Moses ni kwandam mu kwiswedish kwa Nzamb (a) mu chirung cha Moses? (b) mu mivu chitot ya kusambish?
13 Pyifundinay Paul in Kristu in Hebereu, ndiy wading wij anch antu amwing pakach pau kadingap ni kusal pamwing nich rutong ra Nzamb riyila kurutu. (Tang Hebreu 4:1.) Ov, mutapu ik? Chimeken anch, ndiy wading wisambidin piur pa kuziyil ku Chijil cha Moses. Mu mivu 1500, mwin Isarel mwawonsu wasota kushakam kwambatan nich rutong ra Nzamb wafanyidina kuziyil ku Chijil. Pakwez, kusutil ku rufu ra Yesu, Chijil achidiosha. In Kristu amwing akanganya kwitiyij chinech, ni adandamena kuziyil ku mikadil yimwing ya Chijil.b
14 Kudi in Kristu ading alondwila Chijil, Paul warumburila anch win kupesh ujim wa Yesu, manswik masu, ni tempel musu yawonsu yadinga yipandakenamu ya ambay nau a kurutu kwa chirung cha in Kristu. (Heb. 7:26-28; 8:7-10; 9:11, 12) Chawiy lel, pamwing ap nich chitongijoku cha kulam Sabat rubing ni rubing mu manangu, Paul warumbula piur pa chisend cha kwandam mu kwiswedish kwa dichuku dia Yehova anch: “Antu a Nzamb akutwish kwikal nich chisu cha kwiswedish, mudi mwiswedishay Nzamb pa dichuku dia sambwad, mulong muntu mwawonsu ukez kashika ku chisu cha kwiswedish kwashilayimu Nzamb, ndiy ukez kiswedish ku mudimu wend mudi mwiswedishay ku mudimu wend amwinend.” (Heb. 4:8-10) In Kristu inay in Hebereu afanyidina kulik kutongijok anch awiy ela kutambul dilau dia Yehova kusutil ku kusal midimu yimedina pa Chijil cha Moses. Kudiosh pa Pentekot wa muvu wa 33 C.C., dilau dia Nzamb adipana nich riy pad antu atekina ritiy mudiay Yesu Kristu.
15. Ov, mulong wak kuziyil kudi kwa usey anch tusotin kwandam mu kwiswedish kwa Nzamb?
15 Ov, chom ik chayikangesha in Isarel kwandam Mwingand ya Kushilamu pa chirung cha Moses? Kuburen kuziyil. Ov, chom ik chayikangesha in Kristu amwing mu chirung cha Paul kwandam mu kwiswedish kwa Nzamb? Chilik chimwing—kuburen kuziyil. Awiy alika kwitiyij anch Chijil chawanyisha rutong rend ni Yehova wading ukat kuyitakel antwend mwin njil yindjing.
Kwandam mu Kwiswedish Kwa Nzamb Nlel Unou
16, 17. (a) Ov, chirumburikin ik kwandam mu kwiswedish kwa Nzamb nlel unou? (b) Ov, chom ik tukeza kwisambin mu mutu wa mulong ulondwilaku?
16 Lel unou in Kristu akemp akutwish kusal usu wa kulam mikadil yimwing ya Chijil cha Moses chakwel atambula dipandish. Mazu mapepidilau ma Paul kudi in Efes malejen patok anch: “Chawiy chidi ku ranaken ra Nzamb kwawiy kuwapandilanya mulong wa ritiy ren. Dipandish dined kidiezap ku usu wen ayinen chidia kwau kupan kwa riy kwa Nzamb. Kichidiap mulong wa yom yiwasalanya, bwat, chad kwikil muntu ukutwisha kwibaz.” (Efes 2:8, 9) Katat, ov, chirumburikin ik kudi in Kristu kwandam mu kwiswedish kwa Nzamb? Yehova wateka kuns dichuku dia sambwad—dichuku diend dia kwiswedish—mulong wa kushikish rusot rend pantaliken ni divu ku kuwanyin kwa katumb. Tukutwish kwandam mu kwiswedish kwa Yehova—ap kwiswedish pamwing nend—kusutil ku kusal nich kuziyil kulondulijan nich rutong rend riyila kurutu mudi murilejenau kudi etu kusutil ku ditenchik diend.
17 Chikwau kand, anch twalik kutesh chiyul chidiokila mu Bibil chitutambwila kusutil ku chisak cha kashalapol ushinshamena ni kubabal, twatond kulondul mwikadil wa want ipau, tukez kwitek ayinetu mu kupwitijan nich rutong rilejenau ra Nzamb. Chinech chikutwish kuyipish urund wetu wa chisambu ni Yehova. Mu mutu wa mulong ulondwilaku, tukez kushinshikin mikadil yikemp yikutwisha kushiken kudi antu a Nzamb ni tukwisambin mutapu ukutwisha mipak tukwatina, ya kuziyil ap ya kulondul njil ya want ipau, kumekesh anch twandamin kal chakin kamu mu kwiswedish kwa Nzamb ap bwat.
[Mazu madia kwishin kwa paj]
a In kupesh ni in Levi ading akat kusal midimu ya ku tempel pa dichuku dia Sabat ni ‘kafap nich.’ Padiay mwin kupesh mujim wa tempel mujim wa muspiritu wa Nzamb, Yesu ukutwish kand kusal mudimu wend wa muspiritu pakad wom wa kujiril chijil cha Sabat.—Mat. 12:5, 6.
b Chijikenap anch in Yuda awonsu ashikena ku kukasikesh ditenchik dia Dichuku dia Kuchakwish kupwa kwa Pentekot wa muvu wa 33 C.C. Kusal mwamu kwela kumekesh chakin kamu kuburen kwa kalimish pantaliken ni yakupesh ya Yesu. Pakwez, in Yuda amwing in Kristu asambisha kulondul yaku yikwau yadinga yambaten nich Chijil.—Gal. 4:9-11.
Yipul ya Kutongijokin
• Ov, dichuku dia sambwad dia kwiswedish dia Nzamb diading nich rutong ik?
• Ov, mutapu ik twija anch dichuku dia sambwad dikat kudandamen djat ni nlel unou?
• Ov, chom ik chayikangesha in Isarel mu chirung cha Moses ni in Kristu amwing a mu mivu chitot ya kusambish kwandam mu kwiswedish kwa Nzamb?
• Ov, chirumburikin ik kwandam mu kwiswedish kwa Nzamb nlel unou?
[Tablo wa jinsangu udia pa paj wa 27]
Tukutwish kwandam mu kwiswedish kwa Yehova kusutil ku kusal nich kuziyil kulondulijan nich rutong rend riyila kurutu mudi murilejenau kusutil ku ditenchik diend
[Yipich chidia pa paj wa 26]
Ov, chom ik chidandamedina kwikal cha usey mulong wa antu a Nzamb kwandam mu kwiswedish kwend?