“Chinech Chirumburikin Mwom wa Chikupu”

“Antu akwikal nich mwom wa chikupu anch akwijik ey Nzamb wakin, ni kumwijik Yesu Kristu watuma ey.”—YOHAN 17:3.

RONGANYIN rikutwish kupandish mwom. Povay Nouhou wadinga nich chimbu cha angond dikum kuyel, makwend—wadinga usadila mu chisak cha ukash wa mujimbu mu Niger—wading wij cha kusal. Ndiy wisuka mem ma kuna ma kuchirish nich mem mu mujimbu wa mwanend ikundj kusutil ku kubomb sukad, mungu, ni mem mishitwila. Kulondulijan ni UNICEF, mulong wa “kuswapej [kwend] ni kuya swaa kudi antu atadila milong ya ukash wa kumujimbu, mwanend wayerika.”

Ronganyin ridiokila mu Bibil rikutwish ni rawiy kupandish mwom. Moses nfund wa kusambish wa Bibil wafunda anch: “Kangal wakamapipejany, mulong mawiy madia mwom wen, ku mazu minam kwawiy kuukeza kushakaminany machuku mavud.” (Kuvurik Yijil 32:47) Ov, chakin kamu Bibil ukutwish kulepish machuku metu? Ov, mwom wetu urumburikin ik?

Mitu ya milong yitan yalondulijana kwinsambishil yamekesha anch Bibil udi mukand wakad kwisikej ni mukand ukwau mu uprofet wend wa kuchingejin, mu rusangu rend ra pasak, mu uyakin wend piur pa siyans, mu kwovijan kwa mikand yidia mukach, ni umutakel wa ukwash. Chinech chimekeshin anch Bibil udi wa pakampwil. Chawiy lel, mulong utulejin jinjil ja mwom wakad nsudiel—mwom wa chikupu—ov, tukutwishap ku ukwat nich usey nakash?

Tukukasikeshin kwilej mutapu ronganyin rakin ra Bibil rikutwisha kukutwal ku chisambu cha manangu nlel unou ni musangar mu machuku ma kurutu. Atuman a Yehova akez kusanger kukulej mutapu wa kutambul ronganyin mud riner.

[Kamushet/​Chipich chidia pa paj wa 9]

Bibil udi kand wa pakampwil mulong wawiy kusu mukand umwing upanina yakul yisangareshina pa yipul yijim yitukata kwiyipul:

• Mulong wak tudi panap?

• Mulong wak kudi mar mapandakena mwamu?

• Ov, kudi ruchingej kanang mulong wa akatish nam afila kal?

Ukutwish kutan yakul ya Bibil ku yipul yiney mu buku winou, Chom Ik Chakin Kamu Chifundishinay Bibil?, wapalangeshau kudi Atuman a Yehova.