Mutapu Ukatau Amakurump Kuyikwash Antu Akwau Chakwel Ikala Nich Ukaliweny
“Yom yiwileja kudi am . . . , yilejana kudi amakundj akin.”—2 TIM. 2:2.
1. (a) Ov, chom ik chajinguninau atushalapol a Nzamb kudiosh pakuru piur pa kufumb, ni mutapu ik usadidinau chom chinech nlel? (b) Ov, chom ik tukwambambina mu mutu wa mulong winou?
ATUSHALAPOL a Nzamb ijing kwawonsu oku anch kufumb kutwadining mudimu kurutu. Nshankur Aburaham ‘wayitonda antu ading afumbinay kal nawamp’ mulong wa kuya kumukwol Lot—ni antu inay awina. (Dis. 14:14-16) Pa chirungu cha Mwant David, in kuwang miminy mu chikumbu cha Nzamb ‘ading antu afumbau mulong wa kumuwangil Yehova’ ni ading kumushiman kamu Nzamb. (1 Jnsg. 25:7) Nlel, tufanyidin kurish njit ja muspiritu nenday Satan ni mangand mend. (Efes 6:11-13) Chikwau kand, tusadin mudimu ukash mulong wa kumushiman Yehova pa kulond piur pa dijin diend kudi antu akwau. (Heb. 13:15, 16) Chawiy lel, mudi atushapol a pasak, mulong wa kutwish, tufanyidin kwikal afumbinau. Mu chikumangen, Yehova uyinkishin amakurump chisend cha kuyifumb akwau. (2 Tim. 2:2) Ov, mitapu ik yimwing yikatau amakurump kusadil mulong wa kuyifumb antu akwau chakwel ikala nich ukaliweny wa kulam amikoku?
YIKASIKESHA MUSPIRITU ANTU UFUMBINA
2. Kurutu kwa kumufumb muntu ukweta ukaliweny ukemp, ov, chom ik chikutwishay mukurump kusal, ni mulong wak?
2 Chiudia mukurump ukutwish kwikal mudi ndim. Kurutu kwa kukun mbut, ndim ufanyidin kuwejaku yom yakufukish nich divu chakwel angula yom yivud. Chilik chimwing, kurutu kwa kumufumb mukadivar ukweta ukaliweny ukemp, ufanyidin kwijik maswir ma muspiritu makwetay nich kuswir chakwel ashikena ku kusadin yilejinay.—1 Tim. 4:6.
3. (a) Ov, mutapu ik ukutwisha kusadin mazu ma Yesu madia mu Marko 12:29, 30 mu mambamb mey ni muntu ufumbina? (b) Ov, usu ik ukutwisha kwikal nich malembil ma mukurump padiay muntu ufumbinay?
3 Chakwel anch ujingunina yitongijok ni yisal ya muntu ufumbina piur pa uyakin wa Want, ukutwish kumwipul anch, ‘Ov, kwipan kwey kudiay Yehova kwaswimpa nchik mutapu wey wa kusadin mwom wey?’ Chipul chinech chikutwish kushikish ku mambamb malondina piur pa mutapu ukutwishay kumusadin Yehova nich muchim wend wawonsu. (Tang Marko 12:29, 30.) Pamwing ap kwinsudiel kwa mambamb men, ukutwish kulembil nend mulong wa kumwit Yehova chakwel amukwasha mukadivar nich mwiku utumbila chakwel asangera kufumb kwinoku. Pakuteshay mukadivar mutapu ulembila mulong wendendiy, chikumukasikesh mudi ik!
4. (a) Pan yilakej ya jinsangu ja mu Bibil yikutwisha kumukwash muntu ufumbinau kuya kurutu. (b) Ov, rutong ik rufanyidinau amakurump kwikal nich payifumbinau antu akwau?
4 Anch wasambish kumufumb mukadivar, chiwapin kwambamb nend jinsangu ja mu Bibil jikutwisha kumukwash nakash chakwel ikala muntu wa kuchingejin ni witudishina. (1 Ant 19:19-21; Neh. 7:2; 13:13; Mid. 18:24-26) Mikadil mudi yiney yidi ya usey kudi muntu ufumbina mudi muding yom yifukishiningau nich divu. Yom yiney yikumukwash chakwel akula muspiritu. Jean-Claude, mukurump wa mu France walonda anch: “Rutong ram ra pakampwil ridi ra kuyikwash antu nifumbina chakwel akula muspiritu. Nikat kukimbang yisu tukutwisha kutang nend verse wovikena nawamp mulong wa ‘kuburil mes’ mend chakwel ‘ijika nawamp yom yishimokishina’ ya mu Dizu dia Nzamb.” (Kus. 119:18) Ov, mitapu ik yikwau yidiaku ya kumukasikesh nich muntu ufumbinau?
MULEJA CHIFANYIDINAY KUSALNI MAYINGISH
5. (a) Ov, kwambamb ni muntu ufumbina kukwet usey ik piur pa jintong jend ja muspiritu? (b) Ov, mulong wak amakurump afanyidin kuyifumb akadivar pachidiau kal ansand? (Tal mazu ma kwinshin.)
5 Mwipula muntu ufumbina anch, ‘Mukadivar, ov, jisu jitong jey ja muspiritu?’ Anch kakwetap jintong mu manangu mend, mukwasha chakwel itekinap rutong rumwing ni asala usu wa kuriwanyish. Muleja piur pa rutong rumwing ra pakampwil ra muspiritu riwitekina ey, ni muleja nich musangar mutapu wiyova pawaruwanyisha. Mutapu winou wa kusal uswapel, ni uwapin. Victor, mukurump umwing udia kand chibol wa mu Afrik, ulondin anch: “Pinading nsand, mukurump umwing wangipula yipul ya manangu piur pa jitong jam. Yipul yiney yankwasha kusambish kutongijokin nakash piur pa mudimu wam wa kulejan.” Amakurump amwing akweta ukaliweny uvud niyawiy alondin kand anch chifanyidin kusambish kuyifumb akadivar padichau ansand—mu mivu yau ya usand—pa kuyinkish yisend mu chikumangen kukwatijan ni mivu yau. Anch ayifumb akadivar pachidau kal ansand, kusal mwamu kukuyikwash kushinshikin pa jintong jau ja muspiritu kushik kamu ni ku ukurump pakad kwikal ni kampuw.—Tang Kuseng 71:5, 17.a
6. Ov, mutapu ik uwamp wasadilay Yesu mulong wa kuyifumb antu akwau?
6 Mulong wa kukasikesh rusot ra muntu ufumbina ufanyidinap kumulej ching yifanyidinay kusal pakwez ufanyidin kumulej mulong wak ufanyidin kusal mwamu. Anch wamwinkish mayingish ukumwimburij Yesu Mulej Mujim. Chilakej, kurutu kwa kuyinkish atwimbuy end mudimu wa kuyikadish antu in kwilej, Yesu wayileja mulong wak afanyina kuziyil. Walonda anch: “Anginkishin kal ulabu wawonsu wa mwiur ni wa pansh.” Wawejaku kand anch: “Yangany kudi antu a michid yawonsu.” (Mat. 28:18, 19) Ov, mutapu ik ukutwisha kwimburij mutapu wa kufumb wa Yesu?
7, 8. (a) Ov, mutapu ik ukutwishau amakurump a nlel kwimburij mutapu wa kufumb wa Yesu? (b) Ov, mulong wak chidi cha usey kumujikitish muntu ufumbina? (c) Ov, yom ik yikutwisha kuyikwash amakurump chakwel ayifumba antu akwau? (Tal mushet “Mutapu wa Kuyifumb Antu Akwau.”)
7 Muleja muntu ufumbina mayingish ma mu Bibil mamekeshina usey wa kusal yiumwitina, ni muleja kand mutapu wa kuyisal. Mu mutapu winou umufundishin kusadil yany ya mu Bibil. Chilakej, tong bil anch umulejin mukadivar kutenchik mu Chot cha Want chakwel chikala chinangina. Ukutwish kushinshikin nend pamwing mukand wa Titus 2:10 ni kumurumburil mutapu ukutwisha kwinang kwa Chot cha Want ‘kumekesh katumb ka malejan ma Nzamb, Mupandish wetu.’ Chikwau kand, muleja muntu ufumbina chakwel atongina piur pa mutapu ukutwisha kusal kwinoku kuyikwash amapal a mu chikumangen ni mutapu ukezau kutaninamu mu mudimu winou usadinau. Kwikal ni mambamb mudi minam ni muntu ufumbina kukumukwash kushinshikin nakash piur pa antu kulik piur pa yisend. Mwamu ukez kusanger musangar udiokila ku mutapu ukatau akadivar ni anambaz kutaninamu mu mudimu usadinay.
8 Kupwa, sal usu wa kumujikitish muntu ufumbina piur pa mutapu usadidinay yiumulejina. Ov, mulong wak chidi cha usey kusal mwamu? Kujikitish kwakin kukweting yibudikin mudi yikwetinga mem makatau kwichil kwi mutond—chakwel upamba nawamp.—Ilikej ni Mateu 3:17.
CHIKOKUJOL CHIKWAU
9. (a) Piur pa kufumb, ov, yikokujol ik yikatau amakurump amwing kurish nich mu jingand ja mapit mavud? (b) Ov, mulong wak ansand avud katekiningap kumusadil Nzamb pa ndond ya kusambish mu mwom wau?
9 Amakurump a mu jingand ja mapit mavud akutwish kurish kand ni chikokujol chikwau: mutapu wa kuyikasikesh akadivar abatishinau kal ni akweta mivu 20 ap 30 chakwel ipana nakash mu midimu ya chikumangen. Twayipwil amakurump a mu jingand piswimp ni 20 ja mwi mputu chakwel atuleja mulong wak akadivar ansand kitiyinap yisend mu chikumangen. Amakurump avud pakach pau akula anch: Payilau ansand ni kukul, anvajau kakatap kuyikasikesh chakwel itekina jintong ja muspiritu. Pakwez, yisu yimwing, ansand itekina jintong jinej, anvajau ayikasikesha chakwel ileja ma shikol ma piur nakash ap chakwel akimba mudimu wa nfalang jivud mu mangand minam! Chawiy lel, kumusadin Nzamb kudingap pa ndond ya kusambish mu mwom wau.—Mat. 10:24.
10, 11. (a) Ov, mutapu ik ukutwishay mukurump kumukwash pakemp pakemp mukadivar chakwel aswimpa yitongijok yend? (b) Ov, yitongijok ik yimedina pa Bibil yikutwishay mukurump kusadin mulong wa kumukasikesh mukadivar, ni mulong wak? (Tal mazu ma kwinshin.)
10 Anch mukadivar umeken anch kasangaredinap kusal yom yivud mu chikumangen, chitin kusal usu uvud nakash ni kushimpish muchim, pakwez chikutwish kusadik. Mudi mukatay ndim kusal chakwel mutond upama utentamina, ukutwish niyey kumukwash pakemp pakemp mukadivar chakwel amana anch ufanyidin kuswimp mutapu wend wa kuman chakwel itiya yisend. Ov, mutapu ik?
11 Itekina chisu cha kuta urund ni mukadivar winou. Muleja patok anch akwet ney kuswir mu chikumangen. Chisu ni chisu, shakam nend mulong wa kwambamb nend piur pa maverse mamwing ma usey makutwisha kumukwash kutongin piur pa mutapu wa kwipan kwend kudi Yehova. (Mul. 5:4; Isay 6:8; Mat. 6:24, 33; Luka 9:57-62; 1 Kor. 15:58; 2 Kor. 5:15; 13:5) Ukutwish kumwipul anch: ‘Ov, yom ik washilamu kudi Yehova chisu wipan kudi ndiy?’ Sal usu wa kumushik ku michim pa kumwipul anch: ‘Ov, utongin nchik piur pa mutapu wiyovay Yehova chisu watambula dibatish?’ (Jinsw. 27:11) ‘Ov, mutapu ik wiyovay Satan?’ (1 Pita 5:8) Kangal wapipej mutapu ukutwishay kwiyov mukadivar chisu ukutanga nend maverse mawamp nakash ma mu Bibil.—Tang Hebereu 4:12.b
ANTU AFUMBINAU, AFANYIDIN KUMEKESH KUSHINSHAMAN
12, 13. (a) Ov, mwikadil ik wamekeshay Elisha padingau kumufumb? (b) Ov, mutapu ik wamufutau Elisha kudiay Yehova mulong wa kushinshaman kwend?
12 Akadivar ansand, ov, chikumangen chikwet kuswir nich ukwash wen? Ov, mwikadil ik ukutwisha kukukwash chakwel utwisha kuya kurutu mu mudimu wa Yehova? Mulong wa kutan chakul, el tushinshikin yom yimwing ya pakur yashikena mu mwom wa antu afumbau.
13 Pasutin kal mivu piswimp 3 000, muprofet Elija wamutazuka nsand Elisha chakwel ikala kashalapol wend. Kapamp kamwing, Elisha witiya ni wamusadila ipal winou ni kushinshaman nich kwikepish. (2 Ant 3:11) Kwinyim kwa mivu musamban ya kumufumb, Elisha wijika anch mudimu wa Elija mu Isarel wading kwinsudiel. Chisu chinicha, Elija wamuleja muntu wafumbay nawamp tupamp tusatu chakwel alika kumulondul, pakwez Elisha wamwakula Elija tupamp tusatu anch: “Am kinikukushap.” Wading nich kashinsh ka kwikal ching ni mwin kumufumb. Chad, Yehova , wamufuta Elisha mulong wa kushinshaman kwend pa kusal anch amana mutapu wafanyinay Elija kuya mu chinzwizu.—2 Ant 2:1-12.
14. (a) Ov, mutapu ik ukutwishau antu afumbinau kumwimburij Elisha? (b) Ov, mulong wak muntu ufumbinau ufanyidin kwikal ushinshamena?
14 Ov, mutapu ik ukutwisha kumwimburij Elisha nlel? Sanger kwitiy yisend, ap anch yimeken anch yidi yakad usey. Mumana muntu ukufumbina mudi murund ney, ni muleja anch ukat kusanger nakash usu wend usadinay mulong wa kukufumb. Mutapu usadina ukumekan mudi umulejin anch: “Am kinikukushap.” Cha usey nakash, send nich usey nakash chisend chawonsu chikwinkinau. Ov, mulong wak chidi cha usey kusal mwamu? Mulong anch wamekesh anch ushinshamen ni usadin mudimu wey nawamp, amakurump akutwish kwikal nich kashinsh anch Yehova usotil anch wikala ni yisend yikwau mu chikumangen.—Kus. 101:6; tang 2 Timote 2:2.
YILIMISHA AMAKURUMP
15, 16. (a) Ov, mu mitapu ik mwamekeshay Elisha kalimish kudi muntu wamufumba? (Tal chipich cha kwinsambishil.) (b) Ov, chilakej chinech cha Elisha chayikasikesha nchik aprofet akwau?
15 Rusangu ra Elisha, mwin kumuswinkan Elija, rimekeshin kand mutapu ukutwishau akadivar kuyilimish amakurump aswila. Kupwa kwa Elija nenday Elisha kuman chisak cha aprofet ading ku Yeriko, antu aad inay aya ku Wit wa Yordan. Kwinikwa, “Elija watambula nkandj wend mulemp, wamuvung, wamubul pa mem, chad mem maurika.” Kupwa kwa kwauk pansh paumina, amakundj inay ‘adandamena kwisamb payangangau.’ Chimeken patok anch, Elisha katongap anch pinap wijik kal yom yawonsu. Kushik ni chisu chamushau kudi Elija, Elisha wamuteshanga muntu wading kumufumb. Kapamp kamwing, Elija waya mu chinzwizu. Kupwa, kwa kuchirik ku Yordan, Elisha wabula pa mem nich nkandj wamwinkau kudi Elija, ni walonda anch: “Kwisu kudiay [Yehova, NWT] Nzamb wa Elija?” Mem maurika kand.—2 Ant 2:8-14.
16 Ov, umenap anch Elisha wamwimburija chakin kamu Elija mu chilay chend chakusambish? Ov, chom ik twilejina ku chilakej chinech? Chimeken anch, Elisha katongap anch mulong ndiy wikal kal ni chisend, ufanyidin katat kusal mudi mumenay. Pakwez, mulong wadandamena kusal mudi mwasadinay Elija chisend chend, Elisha wamekesha kalimish kudi muntu wamufumba, ni chinech chayikasikesha aprofet nend. (2 Ant 2:15) Kwinyim kwa mivu 60 ya mudimu wa uprofet wa Elisha, Yehova wamwinka usu wa kusal yilay yivud kumusutamu Elija. Ov, dilejan ik wilejina ey muntu ufumbinau nlel?
17. (a) Ov, mutapu ik ukutwishau nlel antu afumbinau kwimburij mwikadil wa Elisha? (b) Mu machuku ma kurutu, ov, mutapu ik ukutwishay Yehova kuyisadin antu ashinshamena afumbinau?
17 Anch wikal nich yisend yimwing mu chikumangen, ufanyidinap kuswimp mutapu wa kusal yom—kusal mu mutapu ushalijadina ni wadingau ni kusal kwinsambishil. Ijik anch chifanyidin kuswimp yom, chidiap anch mulong ey ukatin kuswimp, pakwez chifanyidin kuswimp yom mulong chikumangen chikwet nich kuswir ap mulong wa kulondul yany tutambwila ku dirijek dia Yehova. Ching mudi mwayikasikeshay Elisha aprofet nend kusutil yisal yend ni mwamekeshay kalimish kudi muntu wamufumba pa kudandamen kusadin yadingay Elija kusal, niyey ukutwish kuyikasikesh akaritiy ni ukuyilimish amakurump pa kudandamen kusadil mitapu ya kusal yakulejau yimedina pa Bibil. (Tang 1 Korint 4:17.) Pakwez, anch wikal nich ukaliweny uvud, ukez kusadil kuswimp kwinoku kutwisha kukwash chikumangen chakwel chilondula umutakel wa dirijek dia Yehova mutapu didandamedina kuya kurutu. Chad, mudi mulondinau piur pa Elisha, Yehova ukutwish machuku ma kurutu kuyikwash antu ashinshamena afumbinau chakwel asala midimu yijim mudi yisadinau antu ayifumbina.—Yoh. 14:12.
18. Ov, mulong wak kuyifumb akadivar a mu chikumangen kudi kwa usey nakash nlel?
18 Tuchingejin anch yom yilondinau mu mutu wa mulong winou ni wasutina ou anch yikuyibachik amakurump avud chakwel itekina chisu cha kuyifumb antu akwau. Akadivar akwau akutwish kand niyawiy kwitiy kwa kwisotil kufumb kwinoku ni akusadil nich manangu ukwash winou mulong wa kulam amikoku a Yehova. Kusal mwamu kukukasikesh yikumangen ya pa mangand mawonsu ni kukumukwash muntu ni muntu pakach petu kushal ushinshamena mu yirung yikash yezina kurutu oku.
a Anch nsand wamekesh kukul kwend kwa muspiritu, anch udi mwin kwikepish, ni anch uwanyishin kand yom yikwau yitinau mu Bibil, amakurump akutwish kumutond mudi nkwash a mudimu ap anch kandikal awanyisha mivu 20.—1 Tim. 3:8-10, 12; tal Chinong cha Kalam cha Kafunfut 1, 1989, paj 29, mu Français.
b Ukutwish kwambamb nend kusutil yom yidia mu Chinong cha Kalam cha Ndol 1, 2012, paj 20-22, paragraf 8-13; ni mu buku “Ilamany Ayinen mu Rukat ra Nzamb,” shapitre 16, paragraf 1-3.