Muchingejina Yehova Chisu Chawonsu!

1-3. Mutapu ik wakasikana ruchingej ra Paul mudiay Yehova? (Tal chipich chidia kwinsambishil.)

CHADING chirungu cha ubaj kwikal mwin Kristu mu Rom mu mivu chitot ya kusambish. Mu muvu wa 64 C.C. ayipompata nakash in kwilej a Kristu ni ayimesha mar mulong ayela anch uletinany kanvundangesh mu musumb ni anch uyikisinany antu. Anch wading mwin Kristu chisu chinicha, chafanyina kwikal chirung chimwing chiyimp nakash kudi ey. Anamakwey in Kristu, akadivar ni anambaz avud, ayikasa, ayizanona kudi annam, akwau ayipampila pa mitond ni ayosha aom mulong wa kuyisadin mudi nkuny ja kasu mulong wa chitokish uchuku.

² Chawiy chirungu chamukasau kambuy Paul mu rukan kapamp ka kaad. Ov, in Kristu akwau afanyina kwez kumukwash? Paul wading wamanap kal mar mudi minam kwisambishil, mulong wamufundina Timote anch: ‘Ku kwikamunin kwam kwa kusambish, kwikil muntu wankwasha, antu awonsu angomba nyim. Nilembidil anch Nzamb kangal wayichindil kuyip kwinoku!’ Ap mwamu, Paul wading wij anch kaburenap mwin kumukwash. Wafunda anch: ‘Pakwez Nsalejetu ndiy wangimena.’ Mwaning, Mwant Yesu wamwinkisha Paul usu wadingay nich kuswir. Ov, mutapu ik wamekana ukwash winou? Wafunda kand anch: “Mwamu mwankamuninay mu kan mwa ntambu.”​—2 Tim. 4:16, 17.a

³ Kuvurik yom yiney kwafanyina kumukasikesh Paul, chakwel ikala ni ruchingej mudiay Yehova wafanyina kumukwash chakwel ajijamena yakamish yadingay nich ni mar mafanyina kumushiken machuku ma kurutu. Pakwez, walonda kapamp kamwing anch: “Nsalejetu ukez kwinkamunin ku kuyip kwawonsu.” (2 Tim. 4:18) Mwaning, Paul wileja anch, ap anch anamakwend katwishap kumukwash chipandakena, wafanyina kumuchingejin Yehova ni Yesu mulong wa kumukwash!

MITAPU YA ‘KUMUCHINGEJIN YEHOVA’

4, 5. (a) Ov, nany ukutwisha yisu yawonsu kukwinkish ukwash ukweta nich kuswir? (b) Ov, mutapu ik ukutwisha kukasikesh urund wey ni Yehova?

⁴ Ov, wiyovap kal yisu yimwing anch ukwet milong yikash ni umen anch kwikil mwin kukukwash? Chikutwish kwikal kushadish mudimu, yikokujol ya kushikol, mayej, ap milong yikwau yikash. Pamwing ap wita ukwash kudi antu akwau, pakwez akuziyisha mulong kakwinkishap yiwadinga nich kuswir. Ap mwamu, milong yimwing yikupwangap ku ukwash wa antu. Ov, chom ik ufanyidina kusal? Bibil ukwinkishin chiyul anch: ‘muchingejina Yehova.’ (Jinsw. 3:5, 6) Ov, ukutwish kwikal nich kashinsh anch Nzamb ukukukwash? Mwaning! Ukwash wa Nzamb udi wakin, mudi mulejenau mu jinsangu ja mu Bibil.

⁵ Pakwez, kangal wov ushon anch antu kakwinkishinap ukwash uwanyidina, man yom yiney mudi mwayimanay kambuy​—mudi mutapu wa kumuchingejin Yehova ni kusanger ukwash ni rukat rend. Ruchingej ni urund wey mudiay ndiy yikukasikan nakash.

TUFANYIDIN KUMUCHINGEJIN YEHOVA

6. Ov, mulong wak chikutwishap kwikal chiswapela kumuchingejin Yehova pakampwil anch tukwet milong?

⁶ Ov, ukutwish kutwal yakamish yey kudi Yehova mu malembil ni kupwa wikal ni chisambu, ni kwijik anch wasal kal yitwishikina kukwatijan nich usu wey ni kuchingej ukwash wa Yehova? Mwaning, ukutwish! (Tang Kuseng 62:8; 1 Pita 5:7.) Kwilej kusal mwamu udi mutapu wa kukudish urund ni Yehova. Pakwez, kumuchingejin Yehova anch ukez kuwanyish maswir mey chisu chawonsu kuswapelap. Mulong wak? Diyingish dimwing dikutwish kwikal anch Yehova kakatap kwakul ching mutapu uchingejina.​—Kus. 13:1, 2; 74:10; 89:46; 90:13; Aba. 1:2.

7. Mulong wak Yehova kakatap yisu yawonsu kwakulang kapamp kamwing ku malembil metu?

⁷ Ov, mulong wak Yehova kakatap yisu yawonsu kwakulang kapamp kamwing ku malembil metu? Vurik anch Bibil ulondin anch Yehova udi mudi tatuku. (Kus. 103:13) Nvaj kakatap kumwinkishang mwan yawonsu yikatay kumwit kapamp kamwing. Yom kanang yikatau an kwit yikutwish pamwing ap kwikal yakad usey. Akwau afanyidin kuchingel chisu chifanyidina. Nvaj wijing kand yom yiding ya usey kudi mwanend, ni wij mutapu ukutwishau kwiyov an akwau. Chikwau kand, anch nvaj wawanyish chisu chawonsu kapamp kamwing yitinay mwan, nvaj ukwikal mudi muswik wa mwan. Chilik chimwing, Yehova ukutwish kulik anch chisu chisuta kurutu kwendendiy kwakul ku malembil metu mulong wij maswir metu ni chisu chifanyidina kumawanyish mulong wa uwamp wetu. Wawiy mutapu utonginingay Sakatang wetu ukweta manangu, Mwant wa rukat, ni Tatukwetu wa mwiur. Kwakul chisu chawonsu kapamp kamwing ku yom twitina kukutwish kuyipish urund wetu ni ndiy.​—Isikej ni Isay 29:16; 45:9.

8. Ov, chom ik chakanay Yehova piur pa mar tukutwisha kujijamen?

⁸ Chom chikwau chidi anch Yehova ukat kubangin nakash pa mikadil yetu. (Kus. 103:14) Chawiy lel, kachingejinap anch tusala yom ku usu wetu ayinetu, pakwez ukat kutwinkish ukwash wend wa winvaj. Chad yisu yimwing, tukutwish kuman anch tukwetap kand chom cha kusal. Pakwez Yehova utwinkishin kashinsh anch kakezap kuyilik atushalapol end amana mar makutwishau kukangany kujijaman. Mwaning, ndiy “ukukulejany mutapu wa kukwasanik.” (Tang 1 Korint 10:13.) Chawiy lel, tukwet diyingish dia kwikal nich kashinsh anch Yehova wij nawamp mar tukutwisha kujijamen.

9. Ov, chom ik tufanyidina kusal anch tumwitin Yehova ukwash pakwez katwakwilap kapamp kamwing mu mutapu tuchingejina?

⁹ Anch twamulembil Yehova chakwel atukwasha pakwez anch katwakwilap kapamp kamwing mu mutapu tuchingejina, tufanyidin kushimpish muchim. Tufanyidin kuvurik anch ni ndiy ushimpishining muchim, mulong ukwet kuswir kwa kutukwash. “[Yehova] uchingedil kukwovilany riy, ni kukwanakenany mulong ndiy utentamin. Ayuk kwau awonsu amukungamedina [Yehova, NWT]!”​—Isay 30:18.

“MU KAN MWA NTAMBU”

10-12. (a) Chom ik chikutwisha kukasikan chisu umulamina mwanamakwey wa mu dijuku uyedina nakash? (b) Anch wamuchingejin Yehova mu yisu ya mar, ov, urund wey nend ukwikal nchik? Pan chilakej.

¹⁰ Chisu udia mu yakamish yivud, ukutwish kwiyov mudi mwiyovay kand Paul​—anch udi piswimp ni “mu kan mwa ntambu.” Yisu mudi yiney kumuchingejin Yehova kukasikening nakash​—pakwez kuding kwa usey. Chilakej, tong bil anch umulamin muntu wa mu dijuku dien uyedina mayej mamwing makash. Pamwing ap wamulembilang Yehova chakwel akukwasha kukwat mupak uwamp ni kwikal mukash.b Kupwa kwa kusal yawonsu yitwishikina pa mulong winou, ov, umenap anch ukwikal ni chisambu pa kwijik anch Yehova ukumen ni wij nawamp mulong ukweta ni ukukukwash chakwel ujijamana ni ushala ushinshamena kudi ndiy?​—Kus. 32:8.

¹¹ Yisu yimwing chikutwishap kumekan anch Yehova ukukwashin. Pamwing ap amingang akutwish kulik kwitiy yitongijok yey. Ap anch uchingejin anch anamakwey akukukwash, pakwez akutwish akurumbukin. Yisu yawonsu kimb dikasikesh kudi Yehova. Sej piswimp nend. (Tang 1 Samwel 30:3, 6.) Kupwa anch wajingunin mutapu wakukwashay Yehova, urund wey nend ukukasikan.

¹² Lindac wiyova mwamu kamu kwinyim kwa mivu kanang yayikwashay anvajend kurutu kwa awiy kufa. Walonda anch: “Chikalap nchik mulong winou, nfumwam, mwanamakwam ikundj, Niyamam chatukasikena nakash kwijik chifanyidina kusal. Yisu yimwing twikala nich kuswir kwa ukwash. Chad, anch twatongin pa yom yasutina kal, tukuman kamu nawamp anch Yehova utukwashining. Ukat kutukasikesh ni kutwinkish ching yom tukweta nich kuswir, ap anch chimeken mudi anch twakangany kal.”

13. Ov, kumuchingejin Yehova kwamukwasha nchik nambaz umwing chakwel ajijamena mar kushalijan mamushikena?

¹³ Kumuchingejin Yehova ni muchim umwing kukutukwash kand kujijamen mar. Chisu chimwing Rhonda wadinga ni nfumwend wakad kwikal Kaman wa Yehova wajipa uruw, mwanamakwend ikundj amukwata nich mayej ma lupus (mayej mayimp ma pa chikit), mayej mamwing mayimp nakash. Kwinyim kwa angond kanang, mukajend a mwanamakwend wafa. Chisu chinicha Rhonda wasambisha kwov yibudikin ya yom yiney, wasambisha kusal uchibol wa chisu chawonsu. Kupwa kwa machuku makemp, makwend niyend wafa. Ov, chom ik chamukwasha Rhonda kujijaman mu mar minam? Ulondin anch: “Nambambanga ni Yehova dichuku diawonsu, ap anch chading mulong wa kukwat ka mupak kakemp. Kusal mwamu kwamumekesha Yehova mudi muntu wakin kudi am. Chinech chanfundisha kumuchingejin ching ndiy, kulik kwichingejin amwinam ap kumuchingejin muntu mukwau. Ni ukwash wangikishay wading wakin​—maswir mam mawonsu mawanyina. Mudi chibudikin, nasala mudimu pamwing ni Yehova.”

14. Ov, mutapu ukutwishay Yehova kukukwash anch amwopat mwanamakwey mu chikumangen?

¹⁴ Shinshikin kand mar makwau. Tong bil anch amwopat kal mwanamakwey mukatish mu chikumangen. Wij chifundishinay Bibil piur pa mutapu wa kwikal nau antu opatau mu chikumangen. (1 Kor. 5:11; 2 Yoh. 10) Pakwez, mulong umukatin muntu winou, kulimish mupak winou wa mu Bibil kukutwish yisu yimwing kwamekan anch kukasiken nakash. Ov, ukutwish kwikal nich kashinsh anch Tatukwey wa mwiur ukez kukwinkish usu wa kumuziyil nich kushinshaman piur pa muntu wopatinau? Ov, umenap anch winou udi mutapu wa kukasikesh urund wey ni Yehova ni kumusejin piswimp?

15. Ov, mulong wak Adam wabwambwila ku chijil cha Yehova mu Eden?

¹⁵ Pa chinech, tong bil piur pa Adam, muntu wakusambish. Ov, wading wij chakin anch ang wamubwambwil Yehova wela kudandamen kwikal mwom? Bwat, mulong Bibil utulejin anch Adam “kamudimbap.” (1 Tim. 2:14) Chad, wabwambwila mulong wak? Adam wadia dibuj diamwinkishau kudi Ev mulong wading umukatin mukajend. Watesha dizu dia mukajend kulik chijil cha Yehova Nzamb.​—Dis. 3:6, 17.

16. Ov, nany tufanyidina kumekeshin rukat rikash, ni mulong wak?

¹⁶ Ov, chinech chimekeshin anch tufanyidinap kuyikat nakash anamakwetu? Bwat kwau! Pakwez rukat retu rikash rifanyidin kwikal mulong wa Yehova. (Tang Mateu 22:37, 38.) Anch twamukat Yehova chipandakena, tukutwish chad kuyikwash anamakwetu mu mutapu uwamp, ikalap Atuman a Yehova ap bwat. Chawiy lel kasikesh nakash rukat ukweta mulong wa Yehova ni ruchingej rey mudiay ndiy. Anch ukat kwinan piur pa mwanamakwey wopatau kal, mulembila Yehova ni muleja yovil yey yawonsu.d (Rom 12:12; Fil. 4:6, 7) Sadin mar minam chakwel ukasikesha nakash urund wey ni Yehova. Mwamu ukutwish kumuchingejin ndiy ni kwijik anch kumuziyil kukukuletin yibudikin yiwamp nakash.

PITUCHINGEDINA

17. Anch twadandamen kulejan Want nich mushiku, ov, mutapu ik tukumekesha anch tumuchingejidin Yehova?

¹⁷ Ov, mulong wak Yehova ‘wamukamunina Paul mu kan mwa ntambu’? Paul ulondin anch: “Wanginkish ukash wa kurumburil Rusangu Ruwamp patok wakad wom chakwel antu a michid yikwau aritesha.” (2 Tim. 4:17) Chilik chimwing ni Paul, twiyandjikany niyetu nakash mu mudimu wa kulejan, twikalany nich kashinsh anch Yehova wij nawamp anch yom yikwau yawonsu tukweta nich kuswir ‘ukutuwejinanyaku.’ (Mat. 6:33) Yehova utwinkishin kand mudimu wa “kurumburil Rusangu Ruwamp,” ni ututazukin anch “in mudimu nend.” (1 Tes. 2:4; 1 Kor. 3:9,TMK) Anch twalam mushiku wetu mu mudimu wa Nzamb, tukwikal nich kashinsh anch Yehova ukutwinkish yawonsu tumwitina.

18. Mutapu ik tukutwisha kutek ruchingej mudiay Yehova ni kukasikesh urund wetu ni ndiy?

¹⁸ Tusadinany amboku chisu chinech mulong wa kukasikesh urund wetu ni Nzamb. Anch yakamish ya mu mwom yatunenganesh, tuyisadinany mudi mutapu wa kusej piswimp ni Yehova. Mwaning, anch twashinshikin nakash Dizu dia Nzamb, anch twalembil pakad kujing, ni anch twiyandjik nakash mu mijikit ya muspiritu, tukwikal nich kashinsh anch Yehova ukutukwash chakwel tujijamena yakamish yetu ya katat ni ya machuku ma kurutu.