Yakul ku Yipul ya Bibil
Ov, chom ik chirumburikina Dichuku dia Dirumburish?
Ov, mulong wak dichuku dia dirumburish dikwikal dichuku diwamp?
Chisu chafundau Bibil, Nzamb wayisadina ankalasambu mulong wa kuyipandish antwend ku uyimp. (Ankalasambu 2:18) Bibil ulondin piur pa Dichuku dia Dirumburish diezina kurutu oku anch chikwikal chisu chiwamp chikezay Yehova, nkalansambu mujim wa pa mangand mawonsu, kuyipandish antu ku uyimp.—Tang Kuseng 96:12, 13; Isay 26:9.
Nzamb wamuteka kal Yesu mulong wa kuyirumburish nich kutentam aom ni afu. (Midimu 10:42; 17:31) Kudi antu avud afa pakad kumwijik Nzamb. Pa Dichuku dia Dirumburish, Yesu ukez kayivumbul chakwel ikala ni mwom, mwamu akutwish kumwijik ni kumukat Nzamb wakin.—Tang Midimu 24:15.
Ov, Mulong wak Dichuku dia Dirumburish dikwikal kwisudiel kwa mivu kanan?
Akez kayivumbul afu mu mivu kanan. (Kujingunik 20:4, 12) Akwikal ni chisu cha kwilej yijil ya Nzamb ni kumuziyil. Chinyim ni mutapu utonginingau antu avud, Bibil ulondin anch akez kayirumburish antu kulondwish yom yikusalau kupwa kwa kuyivumbul.—Tang Rom 6:7.
Bibil ulondin kand anch dichuku dia dirumburish dikez kuyikashimwish antu, kurutu kwa mivu kanan kusambish. Dichuku dined aditazukin kand anch disudiel, mudi mulondinau pa mutu wa mulong wa pa chibur wa gazet winou. Dichuku dinidia, Nzamb ukez kayijiyish antu akad kumuziyil, antu ayimp awonsu. (2 Pita 3:7) Pakwez, tufanyidin kubabal mulong wa kulam rukat retu kudi Nzamb.—Tang 2 Pita 3:9, 13.