Mwimburija Muntu Washilamu Kupan Mwom wa Chikupu

1. Ukaliweny ik ukutwisha kutukwash kumwimburij Yehova?

YEHOVA watutanga nich ukaliweny wa kutesh yovil ya antu akwau, ap anch tukwetap nau mashakamin mamwing. Yisu yimwing, tukutwish kwikal mu mashakamin makad kal kutushikenangap. (Tang Efes 5:1, 2.) Mutapu ik ukutwisha ukaliweny winou kutukwash kumwimburij Yehova? Mulong wak tufanyidin kubabal piur pa mutapu tusadidina ukaliweny winou?

2. Ov, mutapu ik ukata mar metu kumunenganesh Yehova?

² Tukwet musangar mulong Nzamb washilamu kuyinkish azizidilau many ashinshamena mwom wa chikupu mwiur ni kuyinkish “amikoku akwau” a Yesu mwom wa chikupu pa divu. (Yoh. 10:16; 17:3; 1 Kor. 15:53) Pakwez, ap anch tukwet ruchingej ra kutambul mwom wakad kufang mwiur ap kwikal ni mwom wa chikupu panap pansh, nlel unou etu awonsu tukat kuman mar. Yehova woviling ushon chisu chikata kutushiken yom yiyimp. Pasak Yehova wanenganana nakash chisu chamanay padingau ni kuyimesh antwend mar kudi in Idjibit. “Ndiy wamana nau mar” pamwing (Isay 63:9) Chikwasuta mivu, ayovisha in Yuda wom kudi akankuny ayikangesha kutungiril tempel wau, pakwez Nzamb wayileja anch: “Muntu mwawonsu ukukupukunanyaku en ukwet mulong ni yamam.” (Zak. 2:8) Mudi mukatay maku kumukat mwanend, Yehova niyend uyikatining atushalapol end ni ukat kuyikwash. (Isay 49:15) Chilik chimwing, Yehova ukutwish kwitek pa ndond ya antu akwau, chawiy lel watwinkisha ukaliweny winou.​—Kus. 103:13, 14.

MUTAPU WIMBURIJAY YESU RUKAT RA NZAMB

3. Chom ik chimekeshina anch Yesu wading mwin ranaken?

³ Yesu wova kusansan kwa antu akwau, ap anch ndiy kadingap ni mashakamin ma mutapu winou. Chilakej, wading wij anch antu avud ading mu mashakamin mayimp, mulong antakel a ma relijon ayidimba ni ayitekina yijil ya antu. (Mat. 23:4; Mar. 7:1-5; Yoh. 7:13) Ap anch Yesu kayovap antakel inay wom ni kitiyap makasu mau, wijika mutapu wadingau antu kuman mar. Chawiy lel, “chamanay yisak ya antu, ndiy wayovila riy, mulong awiy ading aziyil ni kujilijil mudi amikoku akad kafung.” (Mat. 9:36) Mudi Tatukwend, Yesu wading ni rukat ni ranaken.​—Kus. 103:8.

4. Chom ik chasalay Yesu payimanay antu amena mar?

⁴ Chisu chayimanay Yesu antu amena mar, wasota kuyimekeshin rukat. Chawiy lel, wimburija kamu rukat ra Tatukwend. Kupwa kwa kusal weny ulemp mu mudimu wa kulejan, Yesu ni in kwilejend aya ndond yijingamina mulong wa kwiswedish. Pakwez, mulong wayovila antu avud ading amuchingedina riy, Yesu “wasambisha kuyilej yom yivud.”​—Mar. 6:30, 31, 34.

MUTAPU TUKUTWISHA KWIMBURIJ RUKAT RA YEHOVA

5, 6. Chakwel twimburija rukat ra Nzamb, ov, mutapu ik tufanyidina kuyisadil amutej netu? Pan chilakej. (Tal chipich cha kwinsambishil.)

⁵ Tukutwish kwimburij rukat ra Nzamb mutapu tukata kuyisadin amutej netu. Chilakej: Alan mukadivar uchidia nsand utongin piur pa akadivar ananapina kal akweta mar ma kutang mulong kamenap kand nawamp. Watongina kand piur pa mar ma kusal mudimu wa kulejan ku chikumbu ni chikumbu. Alan wavurika mazu ma Yesu malonday anch: “Sal yom kudi antu akwau, mudi muukatila ing niyau akusadilang ey.” (Luka 6:31) Alan wiyipula anch: ‘Ov, chom ik nikatina ing akwetu ansadila?’ Ni wakula anch, ‘Nikatining anch antu abula ndundu ni yamam!’ Pakwez antu ananapina kal katwishiningap kubul ndundu! Mazu ma Yesu minam matwitin twiyipula anch: ‘ang nading mukadivar wananapa kal ou, ov, chom ik nikusota anch antu ansadila?’

⁶ Ap anch Alan uchid nsand, pakwez watonga piur pa mutapu ukwikalay pakunanapay. Washakamanga nau amapal yisu yivud ni wayiteshang nawamp palondangau. Alan wasambisha kwijik pakemp pakemp anch chiyikasikedin amapal kutang Bibil kusal mudimu wa kulejan ku chikumbu ni chikumbu. Pamanangay mar mamenau antu apamina kal, watonga chad mutapu ufanyidina kuyikwash ni wayinkisha ukwash wading uswirikedinau. Tukutwish niyetu kusal mwamu. Chakwel twimburija rukat ra Nzamb, tufanyidin kwitek pa ndond ya antu akwau.​—1 Kor. 12:26.

7. Ov, mutapu ik tukutwisha kushiken ku kwijik mutapu umenau akadivar netu mar?

⁷ Chiswapelingap kutesh nawamp mutapu ukatau antu akwau kwov chisu chimeningau mar. Antu avud akat kurish ni mar mitwakad etu kwijik. Amwing pakach pau arishin nich ukash wa mujimbu mulong adi ayibid, ayej, ap amapal. Akwau amen mar nlel mu yitongijok mulong wa yom yiyimp yayishikena pasak. Akwau niyawiy amen mar mulong kadiap awonsu mu relijon umwing ap mulong ayilidin an ayinau. Muntu ni muntu ukweting milong yend, ni milong yiney yishalijadin kudi muntu ni mukwau. Pa chinech, ov, mutapu ik tukutwisha kwimburij rukat ra Nzamb? Pa kutesh nawamp chakwel twijika mutapu wovilau antu akwau, mulong wa kuyikwash. Chinech chikutubachik kwimburij rukat ra Yehova ni kusal kukwatijan ni maswir mau. Maswir mashalijadin kukwatijan muntu ni mukwau, pakwez tukutwish kuyinkish ukwash wa muspiritu ni wa yom ya kumujimbu.​—Tang Rom 12:15; 1 Pita 3:8.

IMBURIJ MUCHIM UWAMP WA YEHOVA

8. Ov, chom ik chamukwasha Yesu kumekesh muchim uwamp?

⁸ Mwan a Nzamb walonda anch: “[Nzamb] ukat kumekesh kuwap kwend kudi antu akad kumujikitish, ni kudi antu ayimp.” (Luka 6:35) Chawiy lel, Yesu wimburija muchim uwamp wa Nzamb. Ov, chom ik chamukwasha Yesu kusal mwamu? Wayisadina antu ni kuwamp kwa muchim kusutil mu mazu ni yisal yend yayishikang antu ku michim. Chilakej, mband wading wijau anch udi mukayitil, weza kudiay ni washakam ku mend yend ukat kudil ni mansoj mend mamudjil lel Yesu pa yidjatil. Yesu wajingunina anch mband winou wakarumuk kal, ni wamana anch, ang walik kumumekeshin muchim uwamp ukwov nayimp nakash. Pakwez, wamujikitisha ni wamulikishina. Chisu chovay Mufaris umwing kuyip mulong wa yom yasadika, Yesu wamuleja kand niyend ni muchim uwamp.​—Luka 7:36-48.

9. Ov, chom ik chikutwisha kutukwash kwimburij muchim uwamp wa Nzamb? Pan chilakej.

⁹ Mutapu ik tukutwisha kwimburij muchim uwamp wa Nzamb? Kambuy Paul wafunda anch: “Kashalapol wa Nsalejetu kafanyidinap kwikal mwin matend. Pakwez ufanyidin kwikal muntu udimukidina kudi antu awonsu, [ap ubabela].” (2 Tim. 2:24) Muntu ubabela ukat kujingunin mutapu ukutwishay kuman yom ni kuman kand mutapu ukutwishay kwiyep yom yikutwisha kuyovish antu akwau nayimp. Tong bil mutapu tukutwisha kwikal antu akweta muchim uwamp mu yom yilondwilaku ey: Ku mudimu, anch mukurump wetu kasadinap mudimu wend nawamp. Ov, chom ik tufanyidina kusal? Anch mukadivar netu walikina kal kwez ku yikumangan kwasutin kal angond avud wez, ov, mutapu ik tufanyidina kwambamb nend. Mu mudimu wa kulejan, anch muntu walond anch, “nikwetap chisu cha kwambamb ney mulong niziyin.” Ov, mutapu ik tukutwisha kumumekeshin muchim uwamp? Ku chikumbu, anch mukajey wakwipul anch “mulong wak wanlejangap yom yiwatenchikang kusal, ov, ukumwakul mu mutapu uwamp?” Anch twitek pa ndond ya antu akwau ni anch twaman mutapu ukwikala mazu metu ni usu padi antu akwau, tukutwish chad kujingunin mutapu tukutwisha kulond ni kusal yom mu mutapu wa kwimburij muchim uwamp wa Yehova.​—Tang Jinswir 15:28.

IMBURIJ MANANGU MA NZAMB

10, 11. Ov, chom ik chikutukwasha kwimburij manangu ma Nzamb? Pan chilakej.

¹⁰ Yehova uding kamu mwin manangu, ni ukutwish kuman yom yikusadika machuku ma kurutu. Ap anch tukutwishap kwijik yom yikusadika machuku ma kurutu, niyetu tukutwish kwikal ni manangu. Manangu udi niwawiy mwikadil ujim pakach pa mikadil ya Yehova, ni anch wakatish kusal mwamu, ukutwish kuman kurutu yom yimwing yikutwisha kushiken. Tukutwishap kwikal ni manangu ma chilik chimwing ni ma Yehova, pakwez tukutwish kusal nawamp anch twatong mutapu ukutwisha yom kusadik mudi mutwadia tutongina kusal. In Isarel akanganya kwijik yom yafanyina kuyishiken anch amubwambwil Nzamb. Chikalap nchik yayisadinay Nzamb, Moses wijika anch awiy asala yom yiyimp ku mes ma Yehova. Mu kulond kuwamp, chikumangen chawonsu cha in Isarel, chachirikinang muminy wading ni mazu malondina anch: “Mulong wawiy muchid wakad manangu, ni mu awiy mwikil kand ronganyin. Anch awiy akwet manangu, chakin ing chayirumburikinang, ing ijikang chom chikuyitana kwisudiel kwau.”​—Kuv. 31:29, 30; 32:28, 29.

¹¹ Mulong wa kwimburij manangu ma Nzamb, tufanyidin kutongin mutapu ufanyidina kwikal yom yikushikena mulong wa yisal yetu. Chilakej, anch watondijadinany kal mulong wa kwatijan, ufanyidin kwijikany anch chikasikening nakash kuyikel yovil ni maswir men ma kumanijan. Chawiy lel, tufanyidinap kutenchik ap kusal chom chikutwisha kuyipish urund wetu ni Yehova! Pakwez, tusalany amboku kukwatijan ni chiyul chinech cha mu Bibil chilondina anch: “Muntu wa manangu anch waman yom yikash, ukat kujingam, pakwez antu amwamu akat kuya kurutu ni kwimesh mar.”​—Jinsw. 22:3.

LIKANY KUTAL YOM YIYIMP

12. Ov, mutapu ik ukutwisha yom tutadina ni tutongina kutusal nayimp?

¹² Muntu ukweta manangu ukat kutonginang piur pa yom yikimbinay kusal. Yitongijok yetu yikutwish kutukwash ap kutusal nayimp, mudi mukata kand kutukwash kasu ap kututemish. Pakwez anch twababel kasu, tukutwish kukasadil nawamp mulong wa kwisukinap yakudia. Chad, anch tubabelap, kasu kakutwish kwosh chikumbu chetu ni kakutwish kand kujip antu. Chilik chimwing, kutal ni kutong kuding kuwamp anch chidi mulong wa kumwimburij Yehova. Pakwez, kutal kukutwish kwikal kuyimp anch kukat kulangwish maku mayimp. Chilakej, anch twadandamen kutongijokin piur pa masandj ni mutapu utusadina yom yiyimp yiney mu manangu metu, yitongijok yiney yikutushikij ku kusal mwamu. Kusal mwamu kukuyipish urund wetu ni Yehova!​—Tang Jakobu 1:14, 15.

13. Ov, chom ik chatongay Ev piur pa mwom wend?

¹³ Shinshikin mutapu wakudishay Ev mband wa kusambish maswir ma kudia dibuj dia mutond wajidikau, “mutond [...] wa ronganyin ra kuwap ni kuyip.” (Dis. 2:16, 17) Nnak wamuleja anch: “Kiukufanyap kwen, bwat. Mulong Nzamb wij anch dichuku diukez kudiany mabuj minima, mes men makez kuburik, niyen ukez kwikalany mudi Nzamb, in kwijik kuwap ni kuyip.” Ev “[wamana] anch mutond wadi uwamp wa kudia, wadi kand uwamp pa kuutal ku mes.” Ov, chom ik chamushikena? “Mband wapola dibuj diau, wadidia. Chad wamwinkishaku kand nfumwend wadingay nend, niyend wadia.” (Dis. 3:1-6) Kudiay Ev, kwading yom yimwing yapwita yitongijok yend ku yom yalonday Satan. Mulong ading amuleja kal piur pa yom yiwamp ni yiyimp, wafanyina amwinend kutond chafanyinay kusal. Ev kafanyinap kutongin pa yom yiyimp yamulejau! Kusutil ku chitil cha Adam nfumwend a Ev, “chitil chandama mu mangand mulong wa muntu umwing, ni rufu randama mulong wa chitil.”​—Rom 5:12, TMK.

14. Ov, mutapu ik ukutwishay Bibil kutukwash kwiyep mwikadil uyimp?

¹⁴ Chitil cha Ev mu chir cha Eden chadingap kwau cha masandj. Pakwez, Bibil utubabeshin patok mulong wa kulik kutongin piur pa masandj, mulong Yesu walonda anch: “Muntu mwawonsu ukumutala mband wamwovil ris ra kulal nend, muntu mwinou wasal kal chitil cha kulal nend mu muchim wend.” (Mat. 5:28) Chikwau kand, Paul utubabeshin anch: “Kangal wisangarishany nich maku mayimp ma mijimbu yen.”​—Rom 13:14.

15. Ov, mapit ma mutapu ik tufanyidina kukumangej, ni mulong wak?

¹⁵ Bibil ulondin kand anch tufanyidin kushinshikin pa kumusangaresh Nzamb kulik kutongin ching pa kwikal ampich. Chakin kamu, ap anch muntu udi mpich, chidi “kand mudi mpwembu yilemp mu yitongijok yend.” (Jinsw. 18:11) Yesu walonda mu chilakej rusangu ra muntu chisup wasambisha ‘kwikumangejin mapit amwinend, pakwez uburedin mapit makin ku mes kwa Nzamb.’ (Luka 12:16-21) Yehova ukat kusangarang anch twasal yom yimusangareshina. (Jinsw. 27:11) Musangar mudi ik patukweta dilau diend mulong tukumangejin ‘mapit metu mwiur’! (Mat. 6:20) Urund uwamp nend Yehova uwapin kusutamu mapit ma usey mawonsu tukutwisha kwikal nich.

KANGAL WADANDAMEN KWINAN

16. Ov, chom ik chikutwisha kutukwash chisu turishina nich yakamish ap minan?

¹⁶ Anch twakimb anch twikala ampich mu mangand minam, chikutwish kutuletin yakamish yivud. (Mat. 6:19) Yesu wasadina chilakej chimekeshina anch “yakamish ya mwom wa mangand ni rukat ra mapit” yikutwish yamukangesh muntu kutek Want wa Nzamb pa ndond ya kusambish mu mwom wend. (Mat. 13:18, 19, 22) Ap anch tukat kwinan piur pa nfalang, tufanyidin kwijik anch antu akwau akat kwinanang piur pa yom yiyimp yayishikena. Chad anch tukat kwinan mutapu mudi winou, tukutwish kuyel ap kusambish kushadish ritiy mudiay Yehova. Pakwez, kwinan mu mutapu uyimp kukutwish kwayipish yitongijok yetu ni kusal nayimp ku mujimbu ap muspiritu. Tufanyidin kumuchingejin Yehova ni kuvurik anch “kwakam mu muchim kukat kumuziyish muntu, pakwez dizu diwamp dikat kumuletin musangar.” (Jinsw. 12:25) Mazu mawamp ma dikasikesh ma muntu kanang ututeshina makutwish kusangaresh muchim wetu. Chawiy lel, anch ukat kwinan piur pa yom kanang, mulejamu Kaman wa Yehova umwing ukwija ey nawamp; ukutwish kwikal nvaj wey, mukajey ap nfumwey, ap murund ney akukwasha chakwel umuchingejina Yehova ni ulika kwinan.

17. Ov, mutapu ik ukatay Yehova kutukwash chakwel turisha nich yakamish ap minan?

¹⁷ Kwikil muntu ap umwing wija yakamish ni minan yetu kumusutamu Yehova. Paul walonda anch: “Kangal wiyakamishany mulong wa chom. Pakwez mu yisu yawonsu mu kulembil kwen, ap pa kuyilembidil antu akwau nich kujikitish, mwijikishany Nzamb yom yawonsu umwitilanya. Chad chisambu cha Nzamb chisutila ronganyin ra antu chikulam michim yen ni yitongijok yen mu Kristu Yesu.” (Fil. 4:6, 7) Chisu ukata kwinan ap kwiyakamish, tongin pa ukwash ukwinkishinau kudi Yehova chakwel ukasikesha urund wey ni ndiy, kusutil kudi akadivar ni anambaz ney, amakurump, kashalapol ushinshamena, angel ni Yesu.

18. Ov, mutapu ik ukutwisha kutukwash ukaliweny wetu wa kutong?

¹⁸ Mudi mutwileja kal, tukutwish kumwimburij Yehova anch twasadin ukaliweny wetu wa kutesh mutapu uteshinau antu akwau. (1 Tim. 1:11; 1 Yoh. 4:8) Tukwikal ni musangar anch twamekesh rukat rakin, twatongin pa yom yikushikena piur pa yisalijok yetu, ni kwiyep yakamish yikutwisha yayipish musangar. Tusadinany amboku nawamp chipan chatwinkay Nzamb cha ukaliweny wa kutongin pa ruchingej ra machuku ma kurutu ni kwimburij rukat ra Nzamb, muchim uwamp, manangu, ni musangar.​—Rom 12:12.