Sal Mudimu wa Kuwapish Paradis wa Muspiritu

1, 2. Mazu ‘chipwan cha kwanzuk mend,’ mamekeshin chom ik mu mifund ya Hebreu?

YEHOVA NZAMB walonda anch: “Diur didi ditand diam, ni mangand madi chipwan cha kwanzuk mend mam.” (Isay 66:1) Nzamb walonda kand piur pa ‘chipwan cha kwanzuk mend’ palonday anch: “Nikez kutumbish ndond ya kutek mend mam.” (Isay 60:13, NWT) Ov, mutapu ik watumbishay Yehova chipwan cha kwanzuk mend mend, ap kuchiwapish nakash? Ni, chom chinech chirumburikin ik kudi antu adia pa divu, ndond yend ya kutek mend?

² Mu mifund ya Hebreu, mazu ‘chipwan cha kwanzuk mend’ amasadidil kand mulong wa kulond piur pa tempel wa pasak wa in Isarel. (1 Jinsangu 28:2; Kuseng 132:7) Tempel wading wa ufun nakash kudiay Yehova mulong yawiy yading ndond ya difukwil diakin. Yading ndond yasadilangau kand mulong wa kumutumbish Yehova pa divu.

3. Ndond ya difukwil diakin chom ik nlel, ni chisu ik chasambisha ndond yiney kwikalaku?

³ Ndond ik yikatau kusadil difukwil diakin nlel? Ndond yiney yidiap chikumbu mudi tempel. Udi tempel wa muspiritu, ni ukat kumutumbish Yehova kusutamu chikumbu chin chawonsu. Tempel wa muspiritu chom ik? Didi ditenchik dia Nzamb diyikwashina antu kwikal arund nend ni kumwifukwil. Ditenchik dined dikat kuwanyin kusutil ku chakupesh cha Yesu. Ditenchik dined diasambisha chisu chamubatishau Yesu mu muvu wa 29 ni chisu chamuzizilau many mudi Mwin Kupesh Mujim wa mu tempel wa muspiritu wa Yehova.​—Hebereu 9:11, 12.

4, 5. (a) Chom ik chasalau in kwifukwil akin a Yehova isambidinau mu Kuseng 99? (b) Chipul ik tufanyidina kwiyipul?

⁴ Tukwet kujikitish kupandikena mulong wa ditenchik dia Nzamb dia difukwil diakin. Tukat kumekesh kujikitish kwinoku chisu tuyilejina antu akwau piur pa dijin dia Yehova ni piur pa chipan cha mulambu wa difut wa usey. Musangar mud ik mulong wa in Kristu akin ma miliyon chinan ni piur akata kumushiman Yehova dichuku ni dichuku! Ap anch antu avud a mu marelijon akat kutong nayimp anch akez kumushiman Nzamb chisu chikezau kuya mwiur kupwa kwa rufu rau, antu a Yehova ij anch chidi cha usey nakash kumushiman panap pa pansh ni nlel unou.

⁵ Chisu tukata kumushiman Yehova, tukat kwimburij yilakej ya atushalapol ashinshamena a Nzamb alejenau mu Kuseng 99:1-3, 5. (Tang.) Antu ashinshamena mudi Moses, Aron, ni Samwel akwasha nakash ditenchik dia Nzamb mulong wa difukwil diakin pasak. (Kuseng 99:6, 7) Nlel, kurutu kwa azizidilau many panap pansh kusambish kusal mudi in kupesh pamwing ni Yesu mwiur, antu ashinshamena inay akat kumusadil Yehova mu chikunku cha pa divu cha tempel wa muspiritu. Mamiliyon ma “amikoku akwau” makat kuyikwash nich kushinshaman. (Yohan 10:16) Yisak yawonsu yaad yikat kumwifukwil Yehova. Pakwez, tufanyidin kwiyipul ayinetu anch, ‘Ov, nikat kwipan pakampwil mulong wa ditenchik dia Yehova piur pa difukwil diakin?’

KUJINGUNIN ANTU ASADINA MU TEMPEL WA MUSPIRITU WA NZAMB

6, 7. Mulong ik walanka mu chikumangen cha in Kristu cha kusambish, ni chom ik chasadika mu muvu wa 1919?

⁶ Mwinshin mwa mivu 100 kupwa kwa kusambish kwa chikumangen cha win Kristu, kupumbwok kwasambisha mudi mwatakelau kulond. (Midimu 20:28-30; 2 Tesalonik 2:3, 4) Kupwa kwa chisu chinicha, chakasikana nakash kuyijingunin in kwifukwil akin a Nzamb. Yitot ya mivu yasuta kurutu Yehova amusadila Yesu mulong wa kujingunin antu ading kumusadil Nzamb mu tempel wa muspiritu wend.

⁷ Mu muvu wa 1919, antu itiyijau kudi Nzamb ni amusadina mu tempel wend wa muspiritu amekana patok. Aswimpa yom yivud chawiy chasala anch Yehova itiyija difukwil diau. (Isay 4:2, 3; Malakiy 3:1-4) Chawiy lel, chishimushimu chamanay kambuy Paul yitot ya mivu yivud kurutu chasambisha kuwanyin.

8, 9. “Paradis” wamanay Paul mu chishimushimu urumburikin ik?

⁸ Chishimushimu cha Paul achilejen mu 2 Korint 12:1-4, TMK. (Tang.) Mu chishimushimu chinech, Yehova wamuleja Paul yom yafanyina kushiken machuku ma kurutu. Ov, “paradis” wamanay Paul chom ik? Chakusambish, ukutwish kwikal paradis ukeza kwikal pa divu. (Luka 23:43) Chakaad, ukutwish kwikal paradis wishitwila wa muspiritu ukwikala mu mangand masu. Ni chakasatu, ukutwish kumekesh mashakamin mapandikena kuwap ma mwiur mu “paradis wa Nzamb.”​—Kujingunik 2:7.

⁹ Ov, mulong wak lel Paul walonda anch “wova mazu makash makad kutwish kutesh ap kulond kudi muntu”? Mulong chadingap chisu chend cha kurumburil nawamp yom yiwamp yamanay mu chishimushimu. Pakwez, nlel Yehova utulejin tuyileja antu akwau piur pa yiyukish yikatau antwend kusanger katat.

10. Mulong wak paradis wa muspiritu ni tempel wa muspiritu chidiap chom chimwing?

¹⁰ Tukat kulondang nakash piur pa paradis wa muspiritu, pakwez, paradis winou chom ik? Paradis winou madi mashakamin ma chisambu mapaninay Nzamb kudi antwend. Chawiy lel, paradis wa muspiritu ni tempel wa muspiritu chidiap chom chimwing. Tempel wa muspiritu udi ditenchik dia Nzamb piur pa difukwil diakin. Paradis wa muspiritu umekeshin patok antu itiyijinay Nzamb ni amwifukwidila mu tempel wend wa muspiritu.​—Malakiy 3:18.

11. Chisend ik tukweta nlel unou?

¹¹ Chisangareshin kwijik anch kudiosh mu muvu wa 1919, Yehova witiyija chakwel antu akad kuwanyin akudisha, akasikesha, ni ajimbisha paradis wa muspiritu. Ukat kwipan mu mudimu winou upandikena kuwap? Usangaredining chisend cha kusal pamwing ni Yehova mudimu wa kumutumbish pa divu?

YEHOVA UTENCHIKIN DIRIJEK DIEND NAWAMP NAKASH

12. Ov, mutapu ik twija anch Isay 60:17 wawanyidin kal? (Tal chipich chidia kwinsambishil.)

¹² Mu profet Isay watakela kulond piur pa kuswimp kukeza kusadik pa chikunku cha pa divu cha dirijek dia Nzamb. (Tang Isay 60:17.) Ansand ap in Kristu asu atangin kal ap ateshin kal piur pa kuswimp kwinoku. Pakwez akadivar nau anambaz avud akat kuman kuswimp kwinoku kushimokishena! Atushalapol inay ashinshamena akwet kashinsh anch Nzamb ukat kumusadin Mwant wetu, Yesu, chakwel atakela dirijek Diend! Anch twatesh yom yamanau akatish netu in Kristu mu mwom wau, ritiy retu ni ruchingej retu mudiay Yehova rikwikal rikash.

13. Kukwatijan ni Kuseng 48:12-14, ov, tufanyidin kusal ik?

¹³ In Kristu awonsu akin afanyidin kuyilej antu akwau piur pa dirijek dia Yehova. Chishimokishin mud ik ap anch tushich mu mangand mayimp ma Satan, tukwet chisambu ni tushich mu uumwing! Tufanyidin kwikal ni musangar wa kumalej “majuku makeza kez” piur pa dirijek dia Yehova ni piur pa paradis wa muspiritu!​—Tang Kuseng 48:12-14.

14, 15. Kuswimp ik kwasalau kupwa kwa muvu wa 1970, ni dirijek dataninamu mutapu ik?

¹⁴ Amapal amwing adia mu yikumangen amen kal kuswimp kwasadika mu chikunku cha pa divu cha dirijek dia Yehova diwapila nakash. Avurikin chisu chadingay mukurump umwing kutakel chikumangen pa ndond pa chisak cha amakurump, avurikin kand mutapu wadingay mukurump umwing kutakel biro wa mutiy pa ndond pa Komite wa Mutiy, ap kand patondangau muntu umwing kutakel Société Watch Tower pa ndond pa Chisak Chitakedila cha Atuman a Yehova. Ap mwamu, akadivar inay adinga ni antu ashinshamena ayikwashanga, pakwez muntu umwing ndiy wadinga ukweta chisend cha kukwat mipak mu chikumangen, ku biro wa mutiy ni ku biro mujim wa mangand mawonsu. Kupwa kwa muvu wa 1970, aswimpa yom chakwel chisak cha amakurump chikala nich yisend ya kukwat mipak, pa ndond pa muntu umwing kukwat mipak.

¹⁵ Kuswimp kwinoku kukwet usey ik mu dirijek? Kwimedin pa kutesh kuwamp kwa Mifund ya mu Bibil. Pa ndond pa muntu umwing kukwat mipak yawonsu, dirijek dikwez kutaninamu ku mikadil yiwamp ya amakurump awonsu, adia ‘yipan,’ yaletau kudi Yehova.​—Efes 4:8; Jinswir 24:6.

16, 17. Kuswimp ik kwa katat kukusangareshina, ni mulong Ik?

¹⁶ Tong bil piur pa kuswimp kumwing kusadikina katat mu mikand yetu. Tukwet musangar wa kupan ukwash ni mikand mu mudimu wetu wa kulejan. Tong kand mutapu tusadidila tekinoloji wa katat mulong wa kulejan rusangu ruwamp. Chilakej, kapend ka Web jw.org kakwashin antu avud nakash, mulong akutwish kutan ukwash uswirikedinau. Mu kuswimp kwinoku kwawonsu, tumen kwipan kwa Yehova mulong wa antwend ni mutapu uyikatilay.

¹⁷ Tukwet musangar mu kuswimp piur pa yikumangan yetu, mulong kutwinkin chisu cha kusal difukwil dia dijuku ap kand dilejan dia muntu panrend. Ni tukat kand kusanger kuswimp kusadinau piur pa yitentam yetu. Kuswimp kwinoku kuwapin mud ik muvu ni muvu! Tujikitishin kand nakash mulong wa kufumb kututambwila ku ma shikol mimedina pa Bibil. Mu kuswimp kwinoku kwawonsu, kumekeshin patok anch Yehova utakedin dirijek diend ni udandamedin kuwapish nakash paradis wa muspiritu!

MUTAPU TUKWASHINA KUWAPISH NAKASH PARADIS WA MUSPIRITU

18, 19. Mutapu ik tukutwisha kuwapish nakash paradis wa muspiritu?

¹⁸ Yehova watwinkishin kal chisend cha kuwapish nakash paradis wetu wa muspiritu. Mutapu ik tukusala mwamu? Mu kulejanang nich mushiku rusangu ruwamp ra Want ni mu kwikadishang in kwilej avud. Chisu chawonsu tumukwashina muntu kwikal kashalapol wa Nzamb, tukwashin kamu ku kujimbish paradis wa muspiritu.​—Isay 26:15; 54:2.

¹⁹ Tukat kuwapish kand paradis wa muspiritu nakash, pitukata kusal usu wa kuwapish untu wetu wa win Kristu. Kusal mwamu kukat kukwash kuyipwit antu akwau kwez ku paradis wa muspiritu. Yisu yivud, chikata kuyipwit antu kwez mu dirijek ni kudi Yehova nend Yesu chidingap ching ronganyin retu ra Bibil, pakwez uding mwikadil wetu wishitwila ni wa chisambu.

20. Kukwatijan ni Jinswir 14:35, ov, tuswirikedin kusal ik?

²⁰ Yehova nend Yesu akwet musangar nakash pamenau nlel paradis wetu muwamp wa muspiritu. Musangar tukweta katat wa kuwapish paradis winou udi kwau ukemp kupandakan utukwikala nich machuku ma kurutu pitukusala mudimu wa kukarumun divu diawonsu kwikal paradis. Tuvurikany chisu chawonsu mukand wa Jinswir 14:35, ulondila anch: “Dilau dia mwant dikat kumuwil kashalapol wend wa manangu.” Komb el lel tusalany mudimu ukash nich manangu wa kuwapish nakash paradis wa muspiritu!