Yakul ku Yipul ya Bibil
Mwom winou yawiy, yawonsu yidiaku?
Utongining yisu yimwing anch mwom udi kwau wiswip?
Watonginap kal anch mu mwom mudi yom yivud kulik ching kusengan, kusal mudimu, kwatijan, kulil dijuku, kukul ni kunanap? (Job 14:1, 2) Bibil ulejen anch ap antu akweta manangu nakash atongina piur pa mulong winou.—Tang Mulej 2:11.
Mwom ukweting rutong kanang? Chakusambish, tufanyidin kwiyipul piur pa mutapu wasambisha mwom. Kupwa kwa kushinshikin mutapu ushimokishena wasalau wong ni mujimbu wetu wawonsu, antu avud ashikena kwitiyij anch Sakatang wa manangu mapandikena ndiy watutanga. (Tang Kuseng 139:14.) Anch chidi mwamu, komb watutanga ni rutong kanang! Anch twijik rutong riner tukutwish kushiken ku kwijik kurumburik kukweta mwom wetu.
Mulong wak ayitanga antu?
Nzamb wayiyukisha antu akusambish ni wayinka chisend chiwamp. Rutong rend rading anch antu izwisha divu, kudisal chakwel dikala paradis, ni kushakamap chikupu.—Tang Disambishil 1:28, 31.
Rutong ra Nzamb rakanganya kuwanyin pabwambwilau antu ku umutakel wend. Pakwez Nzamb katulikinap, ni kakuswimpap rutong rend. Bibil utwinkin kashinsh anch Nzamb ukuyipandish antu ashinshamena ni rutong rend piur pa divu rikuwanyin! Chawiy lel, Nzamb usotin anch umana mwom mu mutapu uumenay ndiy! (Tang Kuseng 37:29.) Ileja kusutin Bibil mutapu ukutwisha kutaninamu mu kushilamu kwa Nzamb.