MUTU WA MULONG WA PA CHIBUR | MUTAPU IK UMENINGAY NZAMB NJIT?
Mutapu ik Umeningay Nzamb Njit?
Mutapu ik ukutwisha kwakul ku chipul chinech? Antu avud amening anch Nzamb ukatining njit. Atongining anch wayilejang in kumwifukwil end amwing a pasak kuya mwi njit; Bibil amwinend ndiy ulondina mwamu. Pakwez akwau niyawiy alondin anch Yesu, Mwan a Nzamb wayifundisha in kwilejend kuyikat akankuny nau. (Mateu 5:43, 44) Chawiy lel akat kutong anch yisu yimwing chitongijok cha Nzamb piur pa njit chaswimpin kal ni nlel kakatinap kand njit.
Utongin nchik? Nzamb ukatining ap witiyijining njit? Anch chidi mwamu, udi ku mutambu wa anany mu kupwitijan kusadikina nlel? Kutan yakul ku yipul yiney kukutwish kwikal ni usu pa mutapu wey wa kuman njit. Chilakej, ang wij anch Nzamb kakatiningap njit pakwez ukatin chisak cha njit chiukatina ey, ukutwish kwiyov nawamp piur pa chisak chey pa mulong winou, pa kwikal nich kashinsh anch chisak chey chifanyidin kuwin. Ku mutambu ukwau, mutapu ik ukwiyova anch wilej anch Nzamb ulamatin ku mutambu wa chisak chikurishinanya en? Chakin kamu ukushinshikin nakash piur pa mutambu uudia.
Kudi chom chimwing cha usey nakash chidia ni mulong. Kwijik chitongijok cha Nzamb piur pa njit kukutwish kwikal ni yibudikin pa mutapu ukata kumuman Nzamb. Anch udi pakach pa mamiliyon ma antu arumbukinau kudi njit ja antu, chakin ukwet kuswir kwa kwijik chakul ku chipul: Nzamb ndiy utakedila njit ap kukasikesh mar madiokila kwi njit, ap kabangidinakupu mar makat kuyimeshau antu kudi akwau?
Ukutwish kushimwok anch wilej anch chakul cha Bibil chishalijadin nakash ni yitongijok yiney. Pakwez, kudiosh pasak kushik ni nlel, chitongijok cha Nzamb piur pa njit chiswimpinap. Tushinshikinany amboku yilondinay Bibil piur pa mutapu wamanangay Nzamb njit pasak ni mu mivu chitot ya kusambish, padingay Yesu pa divu. Chinech chikutukwash kuman mutapu umenay Nzamb njit nlel ni ap anch njit jikudandamen kwikalaku.