Mbil ja Bibil Jichikwet Usey ni Nlel?

AMWING AKWILING ANCH BWAT. Dokiter umwing wafanikesha kusadin Bibil mulong wa kukutakel ni kusadin buku wabudishau mu mivu ya 1920 mulong wa kufundish dilejan dia chimie. Muntu wakad kwitiy yom ya relijon ukutwish kukwipul anch ukutwish kusadin buku ulejena mutapu wa kusadin ordinater mukur wafa kal mulong wa kukukwash kusadin nawamp ordinater wa katat. Chikwau kand, antu amwing amening Bibil mudi buku mukur nakash wakad ukwash.

Mulong wak muntu ukutwish kusadin kand buku mukur mudi winou mu mangand ma nlel mudia tekinoloji wa katat? Chikwau kand, Internet ukat kupalangesh yiyul ya katat ni ya ukwash yivud nakash. Maprogram ma matelevizion makat kulejan antu ija nakash milong ya antu, mwom wa antu ni in kufund akweta ukaliweny nakash. Ni ma bibliotek mabudishin mabuku makutwisha kumukwash muntu pakad ukwash wa muntu mukwau ni makat kwandjik mamiliyar mavud nakash ma madolar.

Nich jinsangu jawonsu jidiaku chisu chawonsu, ov, mulong wak kand kusadin Bibil, buku wapwishau kufund kwasutin kal mivu piswimp 2 000? Ov, antu alikina milong ya relijon kayinginap nich palondinau anch kusadin buku mukur mudi winou mulong wa kututakel kudi mudi kusadin buku mukur wa chimie ap ulejena mutapu wa kusadin ordinater mukur? Chakin kamu, kutong mwamu kudi kwa makasu. Yom ya siyans ni ya tekinoloji yikat kuswimp pakad kulab, pakwez, ov, maswir ma pa dishin ma antu makat kuswimp? Antu adandamedin kukimb mwom uwamp ni kwikal nich musangar uwanyidina ni diking, urund wa dijuku uwamp ni arund a kashinsh.

Ap anch udi mukur nakash, Bibil wisambidin piur pa maswir minam ni yom yikwau kand. Ulondin kand anch amupepila kudi Sakatang wetu. Ukutwish kututakel mu milong yawonsu ya mwom ni kututenchik mulong wa chom chin chawonsu chikutwisha kutushiken. (2 Timote 3:16, 17) Chidia cha usey nakash, ukwet yiyul ya chikupu ni yiding ching ya ukwash ap anch kwasutin kal mivu yivud! Bibil amwinend ulondin anch: “Dizu dia Nzamb didi diom.”—Hebereu 4:12, TMK.

Yom yilondinay Bibil yidi kamu yakin? Ov, udi mukur nakash, ap ukwet yiyul yiwamp ni ya ukwash mulong wetwetu nlel—udi buku mwom? Chitongijok cha gazet winou wa Chinong cha Kalam, udia wa kusambish mu mitu ya milong ya ma nimero ma pakampwil, chidi cha kukukwash ey chakwel utan yakul ku yipul yiney.