3 Ukwash Mulong wa Kujijamen Milong

MAYEJ MAKAD KUYERIKANG

Rose ukweta mivu 20, ulondin anch: “Nikwet mayej ma mu dijuku dietu makata kwinletin runeng nakash. Mwom wam wayipa.” Umwing pakach pa milong yend yijim wading anch katwishangap yisu yimwing kushinshikin manangu mend pa dilejan dia Bibil ni pa yom yitadina difukwil diend. Pakwez wikala ukwashinau nakash nich mazu ma Yesu madia mu Mateu 19:26: ‘Kudi Nzamb yom yawonsu yikasikenap.’ Rose wamana anch kudi mitapu yivud ya kwilej. Mulong runeng rend rasalang anch chimukasikena kutang yisu yimwing, wasambisha kutesh yom ya mu Bibil ni mikand yimedina pa Bibil yakwatau kal.a Ulondin anch: “Pakad yom yiney, nijap mutapu ik nafanyina kusal mulong wa kulam urund wam ni Nzamb.”

Povangay Rose runeng nakash mulong wakanganyang kusal yom yasalangay pakur, watana rongoj mu mazu madia mu 2 Korint 8:12: ‘Mulong anch kudi bil rusot, akat kuritiyij kukwatijan ni chom chikwetay muntu, kadiap kukwatijan ni chakadiay nich.’ Mazu minam mamuvurisha Rose anch Nzamb ukat kusanger yom yisadinay, mulong ukat kusal yawonsu yikutwishay kusal kukwatijan ni usu wend.

RUNENG

Delphine, wajimbulangau kwiur ulondin anch: “Kupwa kwa rufu ra mwanam changadim wa mivu 18, ushon wanpandakena nakash chawiy nashadisha ruchingej anch nikutwishap kudandamen kwikal mwom. Kwikil chom chafanyina kumuswinkan mwanam.” Watana rongoj rijim mu mazu madia mu Kuseng 94:19, mulondinay nfund a kuseng kudi Nzamb anch: ‘Anch yakamish yanpandaken, ey ukat kwingongoj ni kwinlembijek.’ Ulondin anch: “Namulembila Yehova chakwel ankwasha kutan yom ya kusal yikutwisha kwinkwasha kudutish runeng ram.”

Wipana amwinend mu kusal mudimu wa kwikatin. Mu kusut kwa chisu, wasambisha kwifanikesh ni kapent wa mwan mukemp—ap anch wabukukin kal pakwez ukat kudandamen kupent. Chilik chimwing, ap anch wading uziyin, wamana anch ukutwish kudandamen kuyikwash antu akwau. Ulondin anch: “Namana kapamp kamwing anch chisu nikata kusadin mbil ja Bibil ni mitapu ya kutong ya Mifund mulong wa kuyikasikesh in kwilejam a Bibil, winou wading mutapu wasadinangay Yehova mulong wa kwinlembijek ni kwingongoj.” Wasala list wa antu ajimbwilau mu Bibil asutisha yisu yimwing ya runeng rikash. Wajingunina anch: “Pakad kudioshap ap umwing, antu inay awonsu ading antu alembilang nakash.” Wajingunina kand anch “kukutwishap kwikal chakul ap chimwing anch Bibil wey udi wa kubwik.”

Kwilej Bibil kwamufundisha Delphine chom chikwau—kushinshikin pa yom ya kurutu, kadiap yom ya kwinyim. Ruchingej rilejenau mu Midimu 24:15 ramukasikesha: ‘Kukwikal divumbuk dia antu atentamina nau akad kutentam.’ Mutapu ik wikalay nich kashinsh anch Yehova ukez kumuvumbul mwanend mband? Delphine wakwil anch: “Nimumen mwanam mband mu machuku ma kurutu. Nikwet kamu kashinsh anch nikuman kand mwanam mband pa chisu chatekay kal Yehova. Nimen mudi etu awonsu ni mwanam tudi mu chir chetu mudi munamumana ni kumukat dichuku diavadikay.”