Tulejanany rusangu ruwamp nich kushinshik kukash
1 Kwisambishil ya mivu chitot ya kusambish, Yesu Kristu wayinkisha in kwilej end mudimu wa kulejan rusangu ruwamp ra Want ni wa ‘kuyikarumun antu a michid yawonsu kwikal in kwilej.’ (Mat. 24:14; 28:19, 20) Atuman’a Yehova akwatin chiyul chinech nich makas maad, mu chilik cha kwel anch kwisudiel kwa mivu chitot ya 20 ey, chisak cha Ukristu chajimbidinaku nich kuvul kwa akadivar nau anambaz 5 900 000 mwi ngand 234 ni materitwar. Dined didi dipumb dijim mudi ik dia kumushiman Tatukwetu wa mwiur!
2 Twandam kal katat mu mivu chitot ya 21. Mukankuny netu ukat kupakish nich kubabal kukangesh mujikit wetu wa kusambish, mujikit wa kulejan Want ni kwikalish in kwilej. Ukat kusadin yipwichik ya ditenchik dia yom dined ni miril ya mijikit yikwau chakwel kutupuwej, kutusheshin chisu chetu, ni kupwit usu wetu. Pa ndond pa kulikidil ditenchik dined ditakela yom yidia ya usey mu mwom, tulikidil Dizu dia Nzamb dituleja chom chipandakena usey— kusal rusot ra Yehova. (Rom 12:2) Chinech chirumburikin kuziyil ku dikasikesh dia Baibel dia ‘kulejan dizu mu chirung chiwamp ap mu chirung chiyimp ni kuwanyish sens mudimu wa ukashalapol.’—2 Tim. 4:2, 5.
3 Tukulishany kushinshik kukash: In Kristu akwet kuswir kwa ‘kwiman awanyidina nich kushinshik kukash mu rusot rawonsu ra Nzamb.’ (Kol. 4:12) Dizu “kushinshik” dikutwish kurumburik “mwikadil wa kwitiyish ap kwitiy.” Chitudia in Kristu, ov chom ik tufanyidina kwitiyijish ap kwitiyin? Anch dizu dia uprofet dia Nzamb didi diakin ni anch twashikedin kal katat kulemp mu chirung cha kwisudiel. Tufanyidin kwikal ni ritiyij rikash mud radinga ni mupostol Paul, walonda anch rusangu ruwamp “ridi ukash wa Nzamb wa kuyipandish antu awonsu amwitiyijina.”—Rom 1:16.
4 Djabul ukat kusadil antu ayimp ni in makasu, ashadikina kal ayinau, mulong wa kuyibachik ni kuyishadish akwau. (2 Tim. 3:13) Chitwija kal chinech, tukakwirijek mulong wa kukasikesh kushinshik kwetu anch tukwet uyakin. Pa ndond pa kushil minan ya mwom yichirisha kwinyim mushiku wetu, tudandamedin kutek yisakin ya Want pa ndond ya kusambish. (Mat. 6:33, 34) Tusotinap kuvuramen anch tushich pa chirung chimwing chikash, ni kutong anch disudiel dia ditenchik dined dichidi kulemp. Didi kamu piswimp nakash. (1 Pita 4:7) Ap anch twashiken mu kutong anch kulejan kwa rusangu ruwamp kukwet kusu mabuj makemp mwi ngand jimwing pa kuman uman wapanau kal, mudimu wa kubabesh ufanyidin kudandamen.—Eze. 33:7-9, NW.
5 Pa chirung chinech cha kwisudiel, yipul yawiy ey: ‘Ov nikwatin nich makas maad chijil cha Yesu cha kwikalish in kwilej? Pinikata kulejan rusangu ruwamp, ov nimekeshining kushinshik kukash anch Want udi wa kashinsh? Ov nijijamen kwinungin mu mutapu ujim mu mudimu winou wa dipandish?’ Pa kuman mutapu twashikedina kal palemp mu chirung cha kwisudiel, tufanyidin kubabal ayinetu ni kubabal kand ku mudimu wa kulejan ni kufundish, ni kwijik anch kusal mwamu kukutupandish etu ayinetu pamwing ni antu atuteshila. (1 Tim. 4:16) Ov mutapu ik tukutwisha etu awonsu kukasikesh kushinshik kwetu mud atushalapol?
6 Tulondulany chilikej cha in Tesalonik: Mupostol Paul, pavurikay mudimu ukash wa akadivar a mu Tesalonik, wayileja anch: ‘Etu twakulejanya rusangu ruwamp, kitwalondap mazu mamwamu, bwat, pakwez twalonda nich ukash wa mwiku utumbila, ni kushinshik kukash. Wijany mutapu twashakama nawamp ni yenen mulong wa kukukwashany. En watwilakejanya etu, wamwilakejanya kand Nsalejetu. Ap anch wamananyap nchik mar mavud, en wakanya dizu dia Nzamb nich musangar upanyinay mwiku utumbila.’ (1 Tes. 1:5, 6) Mwaning, Paul wabazina chikumangen cha Tesalonik mulong kwikalap nchik mar mavud adinga ni kulejan nich mushiku ni kushinshik kukash. Ov chom ik chayikwasha kusal mwamu? Nakash kamu, mushiku ni kushinshik kwamanau kwa mupostol Paul ni ambayend a midimu yikala ni chibudikin chiwamp padi awiy. Mulong wak?
7 Mwom wa Paul ni wa ambayend adingay ni kwend nau wamekesha anch adinga ni spiritu wa Nzamb ni kumekesh anch ading itiyidin kamu nich muchim wau wawonsu yadingau ni kulejan. Kurutu kwa kushik ku Tesalonik, Paul nend Silas ayizengola nakash ku Filip. Pakad ap kuyirumburish, ayibula, ayiteka mu rukan, ni kuyikasin mend mwi mpompu. Pakwez chom chinech chiyimp chamanau, chakepishap mushiku wau wa kulejan rusangu ruwamp. Nzamb amwinend watenchikap chikas ni ayilikishaku, ni kushikij ku kukarumuk kwa kalam ni dijuku diend, ni chayifungwila akadivar inay njil ya kudandamen nich mudimu wau. —Mid. 16:19-34.
8 Nich usu wa spiritu wa Nzamb, Paul nend Silas aya ku Tesalonik. Kwinikwa Paul wadinga ni kwisadil midimu chakwel kudimukin nswir jend ni kwipan sens mu kufundish uyakin kud in Tesalonik. Kachirikinap kwinyim mu kulejan rusangu ruwamp chisu chawonsu. (1 Tes. 2:9) Kulejan kwa Paul nich kushinshik kukash kwadinga ni ukash nakash padi antu iningand mu chilik cha kwel anch alika kusadil akish awu adingau ni kwifukwil ni ikala atushalapol a Nzamb wakin, Yehova. —1 Tes. 1:8-10.
9 Kuzengol kwayichirishap in kwilej asu kwinyim mulong wa kulejan rusangu ruwamp. Chadingau abachikinau nich ritiy rau risu ni itiyina chakin kamu anch akutambul yiyukish ya chikupu, in Tesalonik ading akasikeshinau kulejan uyakin watambulau nich musangar ujim. Chikumangen chinech chakasikana nakash chakwel rusangu ra ritiy rau ni mushiku wau rapalangana ku mitambu yikwau ya Masedon ni kushik ap ku Akey. Chawiy lel, Paul pafunday mukand wend wa kusambish kud in Tesalonik, midimu yau yiwamp yading yijikena kal nawamp. (1 Tes. 1:7) Chinech chidi chilikej chiwamp mudi ik!
10 Abachikinau nich rukat mulong wa Nzamb ni mulong wa antu: Ov mutapu ik tukutwisha kulam muntu ni muntu kushinshik kukash, mud in Tesalonik, pitulejena rusangu ruwamp nlel? Piur pau, Paul wafunda anch: “Tukat kuvurik mudimu wa ritiy ren, ni yom yiwasalanya mu rukat.” (1 Tes. 1:3, note) Chimeken anch adinga ni rukat rumwing rujim, ra kashinsh mulong wa Yehova Nzamb ni mulong wa antu adingau ni kulej (rusangu ruwamp). Radinga rukat ra chilik chimwing ramubachika Paul nau ambayend kuyinkish in Tesalonik “kadip kusu rusangu ruwamp, pakwez ni kupand [kwau] kand.”—1 Tes. 2:8.
11 Chilik chimwing, rukat retu rijim mulong wa Yehova ni mulong wa mukwetu muntu ritubachikin kusot kusal sens mudimu wa kulejan utwinkishinay Nzamb. Nich rukat mud riner, tujingunin anch chisend chetu ayinetu, chitwinkishinay Nzamb chidi cha kupalangesh rusangu ruwamp. Anch tukat kutongin nich kujikitish yawonsu yatusadidinay Yehova chakwel atushikija ku “mwom wakin,” tudi akasikeshinau kuyilejamu antu akwau uyakin upandakena kuwap wa chilik chimwing utwitiyina nich muchim wetu wawonsu. —1 Tim. 6:19.
12 Anch twashal akwatikena nich mudimu wa kulejan, rukat retu mulong wa Yehova ni mulong wa antu rifanyidin kudandamen kukul. Anch mwamu chidia, tukwikal akasikeshinau kuwejin kwinungin kwetu mu mudimu wa ku chikumbu ni chikumbu ni kusal milad yikwau yawonsu ya kupan uman yikwikala kurutu kwetu. Tukwisakin yisu yawonsu chakwel kupan uman mu mutapu wa kukashimun kud anamakwetu, antu tushichinga nau, ni antu itwija. Ap anch antu avud adiwul rusangu ruwamp tuyilejina ni ap anch amwing akusal usu wa kukangesh kulejan kwa Want, tukwikal ni musangar wa mukach (mu muchim). Mulong wak? Mulong twij anch twasal kal yawonsu tukutwisha mulong wa kupan uman wa Want ni kuyikwash antu kutambul dipandish. Ni Yehova ukuyukish usu tusadina mulong wa kuman antu a michim yitentamina. Ap pitukweta yipwichik ya mwom, ap pakimbinay Satan kutuzamun musangar wetu, tukutwish kulam kushinshik kukash ni mushiku wetu wa kupan uman kud akwau. Anch muntu ni muntu wasal yifanyidinay, chinech chikubudish yikumangen yimwing yikash, ni yikweta mushiku, mud kamu chikumangen cha Tesalonik.
13 Kangal twachirikin kwinyim mu chisu cha Yoziu: Kushinshik kudi kand kwa usey pitusankena yoziu kushalijan. (1 Pita 1:6, 7) Yesu wayileja in kwilej end patok anch, anch amulondul ndiy, akez ‘kuyikis kudi michid yawonsu.’ (Mat. 24:9) Paul nend Silas amana chinech mu Filip. Rusangu ridia mu Midimu shapitre 16 rilondil anch Paul nend Silas ayandjika mu kapalakany ka mukach ka rukan ni kuyikasin mend mwi mpompu. Chisu chivud, kapalakany ka kusambish ka rukan kadinga mud mulad umwing wa dibur, ap kapalakany kamwing kajim kadinga kuns kuns ni yikumbu yikemp yikemp nich tupend padinga ni kwandamin chimunyik ni chipepil. Pakwez, mu rukan ra mukach mwadingap chimunyik ni mwadinga kusu chipepil chikemp. Paul nend Silas afanyidina kushakam mu mididim, marungil, ni didjimb dimwing diyimp dia ndond yiney yiyimp ya kuyisakin antu. Ov ukutwish kutongin mar mafanyidinau kuman chayikasinau mend mwi mpompu mu asaa kanang ni nyim jau jadinga ni kuswan ni mash mabudika mulong wa diland diayibulau nich?
14 Yikalap nchik yoziu yiney, Paul nend Silas ashala ashishamena. Amekesha kushinshik kumwing kukash, kwayikasikesha kumusadil Yehova kwikalap nchik choziu. Kushinshik kwau akulejen mu verse 25 wa shapitre 16, mulondinau anch Paul nend Silas adinga “ni kulembil ni kuwang miminy ya kumutumbish nich Nzamb.” Chakin, ap anch ading mu kapalakany ka mukach ka rukan, michim yau yading yizwil too nich ruchingej chakwel amakundj inay awanga nakash nich dizu piur mulong ayitesha kud antu a rukan akwau. Tufanyidin kwikal ni kushinshik kwa chilik chimwing nlel pitusankena yoziu ya ritiy retu.
15 Yoziu yitusarumwidinay Djabul yidi yivud nakash. Kud amwing chikutwish kwikal kuzengol kudiokila mu dijuku. Akadivar netu avud arishining nich chijil. Kuzengol kwa in kupumbwok ni kwawiy tukutwish kukuchindinamu. Kudi yisend ya chinfalang ni minan ya mutapu wa kudimukin nswir ja mwom. Ansand akwet yipwichik ya arund nau ku shikol. Ov mutapu ik tukutwisha kupandakan yoziu yiney? Ov chom ik chifanyidina chakwel kumekesh kushinshik?
16 Chakusambish ni chipandakena usey, tuswiridin kulam urund wa piswimp nakash ni Yehova. Paul nend Silas padingau mu kapalakany ka mukach ka rukan, kasadinap chisu chinech mulong wa kwinan mulong wa mwom wau ap kwov ushon. Akarumukina kapamp kamwing kud Nzamb mu malembil ni kumushiman nich miminy. Mulong wak? Mulong adinga ni urund wa piswimp nakash ni Tatukwau wa mwiur. Ading ij anch adinga ni kuman mar mulong wa kutentam ni dipandish diawu diadinga mu makas ma Yehova.—Kus. 3:8.
17 Pitusankena yoziu nlel, niyetu tufanyidin kukimb dipandish didiokila mwiur. Chitudia in Kristu, Paul utukasikeshin ‘kumwijikish Nzamb yom yawonsu yitusotila. Ni chisambu cha Nzamb chisutila ronganyin rawonsu chikulam michim yetu ni yitongijok yetu.’ (Filp. 4:6, 7) Chikasikeshin mudi ik kwijik anch Yehova kakutulikap ayinetu tupwitijana ni yoziu! (Isa. 41:10, NW ) Uding pichuku pichuku ni yetwetu pitumusadidina machuku mawonsu nich kushinshik kwa kashinsh. —Kus. 46:7.
18 Ukwash ukwau wa usey utukweta mu kumekesh kushinshik kudi kwikal ni ya kusal yivud mu mudimu wa Yehova. (1 Kor. 15:58) Paul nend Silas ayandjika mu rukan mulong ading ni kulejan chisu chawonsu rusangu ruwamp. Ov alika kulejan mulong wa matat madingau nich? Bwat, adandamena kulejan ap padingau mu rukan, ni kupwa payilikishau, aya ku Tesalonik ni kushik ku sinagog wa in Yuda chakwel ‘kutongin pamwing yom ya mukand wa Nzamb.’ (Mid. 17:1-3) Anch tukwet ruchingej rijim mudiay Yehova ni anch twitiyin chakin anch tukwet uyakin, kwikil chom ap chimwing “chikutwisha kutwauril etu ku rukat ra Nzamb rutukweta mulong wa Kristu Yesu Nsalejetu.” —Rom 8:35-39.
19 Yilikej ya katat ya kushinshik kukash: Nlel kudi yilikej yivud yifanyidina ya antu amekeshina kushinshik kukash mud Paul nend Silas. Nambaz umwing wapanda mu kompony wa antu a rukan wa Auschwitz utulejin ya ritiy rikash ni kushinshik yamekeshau akadivar nau anambaz padingau mu rukan. Ulondil anch: “Dichuku dimwing pa chisu cha kuyipul antu, isalay umwing weza kud am nich makas ma kuvung. Walonda anch: ‘Ov yom ik tukusala nen?’ ‘Anch twakukwatany, ukakusalany mud kwikil chom. Anch twakutekany mu rukan, ubanginanap ap pakemp. Anch twakutumany mu kompony wa antu a rukan, chikwakamishinanap. Pitukufishinany nich mulong wa rufu, wimenany kwen mud yikutadilanyap. Ov yom ik tukusala nen?’ “ Chikasikeshin ritiy mud ik kuman ritiy ra akadivar netu adinga mu yisu yikash mud yiney! Adinga ni kutal chisu chawonsu kud Yehova chakwel ayikwasha kujijaman.
20 Chakin anch tuvurikin ruchingej ra akadivar netu avud kurutu kwa kuzengol kwa michid kwamekena mu mivu ya kwinyim ey. Ikalap nchik ayinau mukach mwa mikadil yiney ya chak, akadivar in kutakel atat kutalang nawamp anch akadivar nau anambaz awu ikala adishinau muspiritu. Awonsu adandamedin kushishaman nich kushinshik kukash anch ‘ut wawonsu ukwimikau mulong wa kuyisal nayimp ukutwishap bwat.’ —Isa. 54:17, NW.
21 Akadivar nau anambaz etu avud akwet ambay a uruu akad kwikal nau mu ritiy ni yawiy kand amekeshin ritiy rikash ni kujijaman. Mukadivar umwing mu Guadelup wasankana rupompat rumwing rukash ra mukajend wakad kwikal nend mu ritiy. Mulong wa kumuchirish kwinyim ni kumukangesh kuya ni kukumangan, mukajend kadingap ni kwisuk yakudia ap kutut, kukom ni kuchim maswin ma mukadivar. Machuku mavud, kadingap ni kwisamb ni mfumwend ap pakemp. Pakwez nich kumusadil Yehova nich kushinshik kwa muchim utok ni kukimb ukwash wend mu malembil, mukadivar watwisha kujijaman mu yikangesh yiney yawonsu. Mivu yinch? Piswimp mivu 20—kupwa mukajend wasambisha kukarumun pakemp pakemp muchim wend. Kupwa, mukadivar wasangara chakin mulong mukajend witiya ruchingej ra Want wa Nzamb.
22 Kupwa, tufanyidinap kuvuramen kushinshik kukash kwa akadivar nau anambaz etu ansand ni ayangadim akata kuya ku shikol dichuku ni dichuku ni akata kurish nich yibachikin ya akwau ni yom yikwau yikwau. Chiswapelap kwikal ushalijadin ni antu akwau ku shikol, nambaz wetu umwing walonda anch: “Ku shikol, muntu mwawonsu ukakukukasikesh pichuku pichuku kwikal mbwambol. Ansand akwau akat kutulimish nakash anch wasal chom chimwing chidia chinyim ni chisotinau.” Yidi yipwichik yikatau kusankan ansand nau ayangadim etu! Afanyidin kwikal ajijamena mu manangu mau ni mu muchim wau kurish nich choziu.
23 Ansand avud alamining nawamp kushishaman kwau kwikalap nchik yoziu. Chilikej chimwing chidi cha nambaz umwing changadim ushicha mu France. Dichuku dimwing kupwa kwa yakudia, ansand amwing apakisha kumushindil anch abwikatijana nau, pakwez walembila ni kurish nich usu, chad lel ansand amusha amwinend. Mu kusut machuku, umwing pakach pau wachirika wamulej anch wadinga ni kubazin nakash kukankaman kwend. Wamwinkisha uman uwamp piur pa Want, ni kumurumburil yijidik ya piur yitinay Yehova kud awonsu asotina kutambul yiyukish yend. Mu chirung cha shikol, warumburila kand yitiyij yend ku kalas kawonsu.
24 Didi dilau dipandakena kuwap mudi ik ditukweta dia kwikal pakach pa antu asadidinay Yehova mulong wa kulejan nich kushinshik kukash rusot rend! (Kol. 4:12) Chikwau kand, tukwet chisu chipandakena kuwap cha kumekesh kushishaman kwetu piturishina ni mukankuny netu udia mud ntambu, Satan Djabul. (1 Pita 5:8, 9) Kangal twavuramen anch Yehova usadidil uruu wa Want mulong wa kulet dipandish kud etu antu akat kuulejan ni kud antu ateshila. Tulikany yiyul yitukata kukwat dichuku ni dichuku mu mwom wetu yimekesha anch tutekin Want pa ndond ya kusambish. Tudandamenany kulejan rusangu ruwamp nich kushinshik kukash.