Yakul ku yipul yen
◼ Ov nany ufanyidina kulembil ku yikumangan ya chikumangen?
Dilembil dia chikumangen didi chikunku chimwing cha usey cha difukwil dietu. Kuyitakel akwau kurutu kwa Yehova chidi chisend chimwing cha usey ni chijim nakash. Pa kuman usey wa dilembil, amakurump aswiridin kusadil manangu chisu chitondinau akadivar afanyidina kulembil ku yikumangan. Akadivar abatishau kal atakedila chikumangen mu dilembil afanyidin kwikal atushalapol in Kristu akudila kal (muspiritu) ijikena mud yilikej yiwamp ni alimishinau mu chikumangen. Malembil mau mamekeshina wom ni kalimish mafanyidin kumekesh urund upandakena kuwap nend Yehova Nzamb. Mutu wa mulong “Kulembil Kurutu kwa Akwau Nich Muchim wa Kwikepish” udia mu nimero wa Tour de Garde wa Ndol-Mem 15, 1986, umekeshin yijidik ya usey yidia ya ukwash nakash mulong wa antu akata kulembil kurutu kwa antu avud mulong wa chikumangen.
Amakurump kakutondap mukadivar anch alembila anch wijiken nich milong milong ap ukwet ngikadil yimwing yiyimp. Kawapidilap kutond mukadivar ukwetinga chibachikin cha kujiman ap ukata kusot kusadil dilembil dia antu awonsu mud mutapu wa kumekesh milong yikwetay. (1 Tim. 2:8) Ap anch mukadivar wa dikum dia mivu ukutwish kwikal ubatishinau kal, amakurump akujingunin anch wakudil kal muspiritu chakwel kulembil mulong wa chikumangen.— Midimu 16:1, 2.
Yisu yimwing ku yikumangan ya mudimu wa chingand, chitwishikin kwikal cha usey anch nambaz wabatishau kal atakela chirund mu dilembil anch pikil mukadivar ufanyidina kuchisal. Ufanyidin kudjal chitambal ku mutu. Anch chitwishikin anch mukadivar ufanyidina kakwikalap ku yikumangen yimwing ya mudimu wa kulejan, amakurump akutwish kutond nambaz umwing ufanyidina chakwel atakela.
Chiding chaku anch muntu utakedila Chikumangan cha Antu awonsu asala dilembil dia kusambish. Pakwez, ku yikumangan yikwau ya chikumangen, anch kudi akadivar afanyidina akemp, akutwish kumwit mukadivar mukwau kudioshamu mukadivar wafungulang chikumangan ap wasutishang chikunku cha nsudel kusal dilembil dia kusambish ap dilembil dia nsudel. Chisu chin chawonsu, chiwapidil kumwijikish mukadivar ukusala dilembil ku chikumangan kurutu kwa chisu chakwel amana mutapu wa kutongin yom yikezay kulond. Chad lel ukutwish kusal dilembil diovikena, dilembil dia muchim utok diambatena ni chikumangan kanang.
Malembil ma mutapu winou mafanyidinap kwikal malemp bwat. Anch mukadivar usadil dilembil dia antu awonsu, akutwish kumutesh nawamp yisu yivud anch wiman, anch ukakulondaku nich dizu dimwing dizambukinaku, ni kulond nawamp. Chinech chikutwishish awonsu akumangena kutesh dilembil ni kulond kwisudiel nich muchim utok anch “Amen!”—1 Jins. 16:36, NW; 1 Kor. 14:16.