Ov Ukat Kusadil Yiwilejina ku Chikunguril cha Distrik “Alej a Dizu dia Nzamb?”
1 Muntu mwawonsu wakumangena ku chikunguril cha distrik cha muvu unou ukutwish kuman anch antu a Yehova akwet rutong ra kuwanyish mudimu wau wa kwikal alej a Dizu dia Nzamb. (Mat. 28:19, 20) Piwachirikina kwol kwey, ov milong ik ya pakampwil ya mafundish (wateshina) wikwatidina chiyul cha kusadil mu mwom wey ni mu mudimu wa chingand?
2 Mifund Yipepidilau Yidi ya Ukwash Mulong wa Kufundish: Mutu wa mulong wa dichuku dia kusambish wakasikeshina 2 Timote 3:16. Diskur nfungul dialejana anch chakwel kwikal “Awanyishinau Nawamp Mud Alej a Dizu dia Nzamb,” tufanyidin kulimish chipandikena Dizu dia Nzamb, kudilimish kupandakanamu chitongijok chawonsu ap chishankur cha muntu, ni kudisadil chisu chin chawonsu. Tufanyidin kand kulembil dichuku ni dichuku mulong wa kutambul spiritu utumbila chakwel atukwasha mu mudimu wetu ni kusal mudimu wa kukudish dibuj diend dia kusambish—rukat. Tufanyidin kulikidil dirijek dia Yehova dia pa mangand ditufundisha mud atushalapol kusutil ku yikumangan yawonsu ya chikumangen.
3 Diskur dia yikunku yisatu dia Diakatan, “Twifundishany Ayinetu Pituyifundishina Akwau,” diarumburila anch tufanyidin kwikal yilikej mu (1) kushinshamen ku yijil ya Nzamb mu milad yawonsu ya mwikadil uwamp wa Ukristu, (2) kudandamen nich mushiku mu yaku yiwamp ya kwilej, ni (3) kudjibwil kulemp yitongijok ni mikadil ya manangu ni muchim yikutwishay kusadil Djabul. Kupwa, twilejin mitapu ya kusadil chakwel kuchidij majuku metu ku chipupu cha mangand cha pornografi. Anvaj ayikasikeshin kwikal yilikej mu kwipukang ap kuzuy kusu dis pa masengan ma masandj ni kuyibabesh anau piur pa kusadil Internet ni kutalang televizion. Ov manans ik ma program wa Diakatan wasambishina kal kusadil?
4 Diskur dia nsudiel dia dichuku diakasikeshina chiyul chetu cha kusanger chimunyik cha Yehova, cha kushakam piswimp nakash nich chisak cha azizidilau many ashinshamena a Nzamb, ni kuwejin ku kujimbish chisambu cha antu a Yehova. Ov watangin kal buku musu La prophétie d’Isaïe—lumière pour tous les humains II?
5 Awanyishinau Nawamp Kamu Chakwel Kuyifundish Akwau: Mufund wa mutu wa mulong wa dichuku dia kaad wading 2 Timote 2:2. Piwatesha diskur dia yikunku yisatu Diampos pamanch, ov washinshikina nawamp yiyul piur pa mutapu wa (1) kukimb antu afanyidina, (2) kukudish kusanger kwau, ni (3) kuyifundish kulondul yawonsu yalonday Kristu? Ov ukat kusadilang yiwilejina—chakwel kuyishimunin in chikumbu anch chitwishikin mulong ap kusu umwing udia mu Mifund ni kusha dishin dia mambamb mulong wa kuchirik kand mu machuku ma kurutu?
6 Program wa urel wakasikeshina usey wa kumwilikej Mulej Mujim, Yesu. Ov mu mitapu ik wikasikeshina kwikal kamu mud ndiy? Nich yiwilejina mu diskur dia kaad dia yikunku yisatu dichuku dined, ov mutapu ik ukutwisha “Kwisakin Sens Mafundish ma Nzamb”? Ov yiyul ik wasadidina chakwel kuwejinaku mutapu wey wa kutesh pa chisu cha dilejan dia muntu ipend ni cha yikumangan ya chikumangen?
7 Chakin kamu, buku ukeza kubudikin ukweta mutu wa mulong Tirez profit de l’École du ministère théocratique ukutukwash kukul mu ukaliweny wetu mud in kulond ni alej a Dizu dia Nzamb. Akupwitin kamu nakash yitongijok pa ukaliweny wa kulond wadingau nich atushalapol a Nzamb a pa chirung cha Baibel. Difundish dimwing ni dimwing didia mu buku musu winou dikwet kamushet kalejena yitufanyidina kusal, mulong wak yidi ya usey, ni mutapu wa kuyisadil. Mudi kand yijidish ya kusadil. Anambaz akutwish kutond umwing wa maplan 29 chisu chipaninau yikunku yau. Mu kusut kwa chisu, Yikarumun yalejanau yikwikalaku mu program wa dirijek dia shikol. Ov ukweting chaku chiwamp cha kwilej ni kwirijek chakwel kutaninamu sens ukwash udiokila ku Shikol ya Mudimu ya Uteokras rubing ni rubing?
8 Ikalany Alej Pichalepa Kal Chisu: Diarubing mufund wa Hebereu 5:12 warijeka manangu ma in kutesh. Diskur dia yikunku yisatu dia pamanch, “Uprofet wa Malakiy Uturijekin Mulong wa Dichuku dia Yehova,” diatukasikesha kumwinkish Nzamb yom yipandakena kuwap yitukweta ni kukis mulad win wawonsu wa rilemb chakwel kutwish kupand ku dichuku dijim ni diamushena dia Yehova. Dram, “Tulimishany Wintakel wa Yehova,” wamekeshin nich usu mutapu chibud, kwitutul, mukau, ni kusadil kuyimp kwa kushinshaman kwa Kore nau arund nend a pasak kwayishikija ku yisalijok ya kumubwambwil Yehova. Diskur dialondulap disambina nswir ja chirung cha katat ja kuziyil ku wintakel wa Nzamb mu dijuku ni mu chikumangen. Diskur dia pibur, “Anany Akata Kuyifundish Michid Yawonsu Uyakin?,” dialeta kand uman wa kwel anch Atuman’a Yehova awiy akata kuyifundish michid yawonsu uyakin, chinyim ni Kristendom, ukata kufa chamwamu mukan anch ukat kufundish uyakin wa Baibel.
9 Chakin kamu, Yehova ukat kutwijidish kwikal alej awamp nakash a Dizu diend. Tusadilany yitwilejina, nich ‘kubabal ayinetu ni ku malejan metu, chakwel tukutwish kwipandish ayinetu pamwing ni antu atuteshila.’—1 Tim. 4:16.