“Musadilany [Yehova, NW] Nich Musangar”
1. Wisu musul wa musangar ujim wa atushalapol a Yehova?
1 “Sangarany machuku mawonsu mwi Nsalejetu,” mwamu mwafunday kambuy Paul. “Nilondil kand anch: Sangarany!” (Fil. 4:4) Ntumb ya kulejan rusangu ruwamp ni kuyikwash antu afanakena nau amikoku chakwel amwifukwila Yehova udi musul wa musangar ujim. (Luka 10:17; Midimu 15:3; 1Tes. 2:19) Pakwez, chikwikal nchik, ang mu yisu kanang twaman anch tuburedin musangar mu mujikit yom ik tukutwisha kusal?
2. Mutapu ik kushinshikin nakash musul wa mudimu wetu kutuletidin musangar?
2 Mudimu Witinay Nzamb Kusal: Vurikany anch mudimu wetu wa kulejan udiokil kud Yehova. Mwaning, tukwet ntumb mud ik kwikal “in mudimu nend Nzamb” mu kulejan uruu wa Want ni kwikadish in kwilej! (1Kor. 3:9, TMK) Kristu Yesu udi pamwing ni yetwetu mu mudimu winou wakad kwez kuchirikin kand kusal. (Mat. 28:18-20) Angel niyawiy akat kuusal ni akat kusal pamwing ni yetwetu mu mudimu ujim wa kwangul kwa muspiritu kusadikina katat. (Midimu 8:26; Kuj. 14:6) Mifund, pamwing ni yimenau antu a Nzamb, yikat kupan uman umwing wakin anch Yehova ndiy ukwashina mudimu winou. Chawiy lel, pitukata kulejan, tukat kuya mud “antimesh a Nzamb, ku mes kwa Nzamb, pamwing nenday Kristu.” (2 Kor. 2:17, NW) Didi diyingishil dikash dia musangar mud ik!
3. Malembil makwet usu ik mu kulam musangar wetu mu mudimu wa Nzamb?
3 Malembil madi ma ukwash chakwel kulam musangar wetu mu mudimu wa Nzamb. (Gal. 5:22) Tukutwish kusal mudimu wa Nzamb ching kamu nich usu wend, tufanyidin kumwit spiritu wend, ukatay kupan nich chikas chonikina kud akata kumwit ndiy. (Luka 11:13; 2Kor. 4:1, 7; Ef. 6:18-20) Kulembil piur pa mudimu wetu kukez kutukwash kulam chitong chiwamp pitukata kusankan yakul ya yichiril. Kukez kutukwash kudandamen kulejan nich mushiku ni musangar ujim.—Midimu 4:29-31; 5:40-42; 13:50-52.
4. Ov mutapu ik kwirijek kuwamp kukata kujimbish musangar wetu mu kulejan, ni yisu mitapu yimwing yiwamp tukutwisha kwirijekin?
4 Irijekany Nawamp: Mutapu uwamp wa kujimbish musangar wetu pitudia mu mudimu udi kwirijek nawamp. (1 Pi. 3:15) Kwirijek kwinoku kwitinap kwau chisu chilemp. Kwitin kwau minit yikemp ya kuchirikin yiyul ya mazu ma kusambish nich mulong wa magazet ma katat ap mazu ma kusambish nich mafanyidina mulong wa mukand wa kupan. Chakwel kutan mazu ma kusambish nich mafanyidina, ukutwish kutal buku Comment raisonner ap manimero makur ma Mudimu Wetu wa Want. In kulejan amwing a Want amen kwikal cha ukwash kufund pa kadipaper mazu miswimp ma kusambish nich. Chisu ni chisu akat kuzuy dis pa kadipaper kinak chakwel kuvurik mu manangu. Chinech chikat kuyikwash kupandikan wom ni chikat kuyinkish usu wa kulejan nich mushiku.
5. Mutapu ik musangar ukata kutukwash ni kuyikwash antu akwau?
5 Musangar ukat kulet yiyukish yivud. Mwikadil wa musangar ukat kuwejin ku kuyipwitin antu ku kusanger uruu wetu. Musangar ukat kutukasikesh chakwel kujijaman. (Neh. 8:10, NW; Heb. 12:2) Chipandikenamu, mudimu wetu wa musangar ukat kumushiman Yehova. Chawiy lel, el ‘tumusadilany Yehova nich musangar.’—Kus. 100:2.
[Caption on page 1]
[Study Questions]