Usey Upandikena Kuwap wa Manangu ma Nzamb
1 Antu avud atongining anch Atuman’a Yehova afanyidin kukung usu wau chakwel kukwash kupwish milong yirishinau nich antu nlel. Antu mud inay aburedin kuman usey uwamp wa mudimu wetu wa malejan ma Baibel. Chidi mud chafunday kambuy Paul: ‘Mulong rusangu ra mutond wa mar ridi usup kud antu ayila ku kujiy, pakwez kud etu tupandila ridi usu wa Nzamb.’ (1 Kor. 1:18) Chakin kamu, twij anch mudimu wa Ukristu udi mudimu umwing upandikena usey usadikina pa divu nlel.
2 Mwom Upandikena Kuwap Katat: Usu wa an a antu wa kupwish milong ya antu uletin yibudikin yikemp nakash. Mbil yijidikena kujipan yitwishinap kukangesh kujipan. Yitenchik ya kwovijan ya chisambu ni amasalay a chisambu katwishinap kupwish njit ap pakemp. Yitenchik ya yisak ya antu ya kulet yom yiwamp yitwishinap kupwish uzwendj. (Kus. 146:3, 4; Jer. 8:9) Chinyim ni chinech, uruu wa Want ukarumwin mwom wa mamiliyon ma antu kuyikwash kumudjal muntu musu witiyikina kud Nzamb. (Rom 12:2; Kol. 3:9, 10) Kusutil ku kusalang mwamu, akat kusanger kuwapish mwikadil wa mwom kusambish kamu katat.—1 Tim. 4:8.
3 Machuku ma Kurutu ma Musangar: Kuwejin pa kutukwash kurish nich milong ya katat ya mwom, manangu ma Nzamb matukwashin kutenchik nawamp machuku metu ma kurutu. (Kus. 119:105) Makat kutudiosh ku mudimu wa chamwamu wa kurijek ditenchik dia yom dia katat. (Mul. 1:15; Rom 8:20) Tukwet musangar mud ik anch tusheshinap mwom yetu mu kulondul kwau ntong ja makasu kusu! Pakwez, tukat kukungin usu wetu pa ya kushilamu yakin ya Yehova ya “maur masu ni mangand masu” mukeza kwikal kutentam. Pidikeza kushik dichuku dia dirumburish dia Yehova, chikez kumekan patok anch kutond kwa antu adinga achingejidina pa manangu ma Nzamb kwadinga kuwamp.—2 Pi. 3:10-13; Kus. 37:34.
4 Ap anch manangu ma Nzamb mameken kwikal ma chamwamu kud antu ipanina nakash mu “manangu ma antu a mangand minam,” chakin kamu yawiy kusu njil ya kusadil tufanyidina. (1 Kor. 1:21; 2:6-8) Pa chinech, tukat kudandamen kulejan pa divu diawonsu uruu udiokila kud Nzamb, ndiy kusu “ukweta manangu.”—Rom 16:27.