Tumekeshany Spiritu wa Uchibol
1. Ov mutapu ik ukutwisha kurumburil spiritu wa uchibol?
Ap anch akutwish kusal katat mud ayibol, ap anch katwishinap, in kulejan awonsu a Want akutwish kumekesh spiritu wa uchibol. Awonsu asotin nakash kuziyil kwi mbil ya kulejan ni kwikadish in kwilej. (Mat. 28:19, 20; Mid. 18:5) Akat kuyibangin antu ni ipanin chakwel kuwanyish mudimu wau. (Mat. 9:36; Mid. 20:24) Atushalapol a Yehova asotin kusal yawosu yiswiridikina chakwel kuyikwash antu akwau kwilej uyakin. (1 Kor. 9:19-23) El tushinshikinany chilikej cha muntu umwing wamekesha spiritu mud winou, Filip mwin kulejan rusangu ruwamp.
2. Ov mutapu ik ukutwishau amakurump ni ankwash’a mudimu kwimburij mushiku wa Filip mu mudimu?
2 Kulejan ni Kufundish: Filip wading nich yisend yijim mu chikumangen cha pa chitot cha mivu ya kusambish. (Mid. 6:1-6) Ap mwamu, wading chakusambish mwin kulejan wa rusangu ruwamp ukweta mushiku. (Mid. 8:40) Chawiy nlel unou, pawanyishinau yisend yiyinkishinau, amakurump ni ankwash’a mudimu akutwish kumekesh spiritu wa uchibol kusutil ku kutakel mudimu nich kuzangurok. Chakin kamu chom chinech chikat kukasikesh spiritu wa Chikumangen!—Rom. 12:11.
3. Ov, Mutapu ik tukutwisha kumekesh spiritu wa uchibol piturishina nich yakamish?
3 Kwinyim kwa rufu ra Stefan, kuzengol kupandikena kwaleta kanrumbangesh kajim mu mwom wa in kwilej. Pakwez, Filip, wadandamena kulejan ni wasadila chisend chijim mu kusambish mudimu pakach pa in Samaria. (Mid. 8:1, 4-6, 12, 14-17) Tukutwish kwimburij chilikej chend mu kudandamen kwijikesh rusangu ruwamp piturishina nich yakamish ni ku kulejan pakad kasolikany kud muntu mwawonsu tukusankana.—Yoh. 4:9.
4. Chilikej ik chashay Filip mud mulej?
4 Ukaliweny wa Filip mud mulej wa Dizu dia Nzamb ukutwish kumeken mu rusangu ra mambamb ma ntung mwin Etiopi. (Mid. 8:26-38) Kukudish ukaliweny wa kusadil Bibil ni ‘kutongin pa Mifund’ udi mutapu ukwau tumekeshidina spiritu wa uchibol. (Mid. 17:2, 3) Mud Filip, tukat kusot kulejan rusangu ruwamp kwawonsu kukutwishau kwikal antu ni pa chisu chawonsu chifanyidina.
5. Ov, chom ik chikutwisha kuyikwash anvaj kukasikeshin spiritu wa uchibol mu anau?
5 Dijuku ni Chikumangen: Pakad kwidjidjek mwikadil ni chilikej cha Filip yikala nich chibudikin chiwamp pa ayangadim end. (Mid. 21:9) Chawiy chimwing kand, anvaj in Kristu atekina mwom wau pa yisakin ya Want ayikasikeshining anau kusal chilik chimwing. Ap anch akutwish kuziy nich kukwatikan mu rubing, nvaj ukata kuyilej antu akwau nich kuzangurok ukutwish kusha chilikej cha chikupu mu muchim wa mwan.—Jinsw. 22:6.
6. Mutapu ik tukutwisha kuyimekeshin ayibol adia mu chikumangan chetu kujikitish?
6 Filip wayimekeshina Paul ni Luka rak ruwamp nich muchim umwing, in Kristu akweta mushiku ipana ayinau mu mudimu wa Yehova. (Mid. 21:8, 10) Ov, mutapu ik tukutwisha kumekesh kujikitish kwetu ni ukwash wetu kud antu in mushiku nlel unou? Pamwing ap tukutwish kwipan kulejan nau ayibol pamanch ap kupwa kwa midi dichuku dikatau kuya antu akemp mu mudimu. (Filp. 2:4) Tukutwish kand kuyiladikij kwol kwetu ni kuta nau urund utungina. Yikalap nchik mikadil yetu, tusalany usu wawonsu chakwel kumekesh spiritu wa uchibol.
[Caption on page 1]
[Study Questions]