Tutakelany Malejan ma Bibil Mayila Kurutu Chikunku 5: Kwijik Uvud wa Yom ya Kwilej
1 Padingay ni kufundish, Yesu washinshikinang ukaliweny wa in kwilejend, wayileja awiy ‘mu chilik chikutwishau kutesh.’ (Mar. 4:33; Yoh. 16:12) Mutapu wawiy umwing, alej a Dizu dia Nzamb nlel unou aswiridin kwijik uvud wa yom ya kwilej pa dilejan dia Bibil. Uvud wa yom ya kwilej ukutwishau kushinshikin ukwimen pa ukaliweny ni mikadil ya mulej ni ya mwin kwilej.
2 Tung Ritiy Rikash: In kwilej amwing akutwish kuswiriken tupamp twaad ap tusatu chakwel kwov kurumburik kwa malejan pakwez akwau akutwish kwov nawamp kapamp kamwing. Chidi cha usey nakash kumukwash mwin kwilej kutesh nawamp malejan pa ndond pa kwilej nend yom yivud mu chisu chikemp. Mwin kwilej mwawonsu uswiridin dishin dikash mulong wa kukasikesh ritiy rend risu mu Dizu dia Nzamb.—Jinsw. 4:7; Rom 12:2.
3 Piutakedila dilejan rubing ni rubing, itekina chisu chifanyidina chakwel kumukwash mwin kwilej kwov kurumburik ni kwitiyij yilejinay mu Dizu dia Nzamb. Ipuk kusutang mau-mau mu chilik cha kumukangesh mwin kwilej kuman ukwash wa yom ya usey wa uyakin ufundishinau. Itekinaku chisu chifanyidina cha kwasin pa manans majim ni kushinshikin maverse ma usey makweta mashin ma malejan.—2 Tim. 3:16, 17.
4 Imen pa Mutu wa Mulong wa Dilejan: Pitusotina kwipuk kusut dilejan mau-mau, tusotil kand kwipuk kwikal in kusutish chisu. Anch mwin kwilej usotil kulond chisu chilemp milong yend ya pakampwil, tukutwish kwirijek kuyisambin kupwa kwa dilejan.—Mul. 3:1.
5 Ku mutambu ukwau, kuzangurok kwetu ayinetu mulong wa uyakin kukutwish kusal dilejan dikasikan mulong wa kulik kulond nakash chisu cha dilejan. (Kus. 145:6, 7) Kwisambin pa chipatu dinans kanang ap yitwamana kukutwish kukwash dilejan, pakwez tusotinap yiney yikala yivud nakash ap yilemp chakwel yimukangesha mwin kwilej kwak ronganyin rakin ra mafundish ma Bibil ma dishin.
6 Kusutil ku kwisambin uvud wa yom ya kwilej wisikena ku chikunku ni chikunku cha dilejan, tukuyikwash in kwilej Bibil ‘kwendil mu kutok kwa Yehova.’—Is. 2:5.