Tutakelany Malejan ma Bibil Mayila Kurutu Chikunku 8: Kuyitwal in Kwilej ku Dirijek
1. Mulong wak chidi cha ukwash kwisambin dinans dimwing piur pa dirijek dia Yehova rubing ni rubing pa chisu cha dilejan dia Bibil?
1 Rutong retu mu kutakel malejan ma Bibil ridiap kusu ra kulejan jinsangu jitadila mafundish pakwez ridi kand ra kuyikwash antu twilejina nau kwikal yid ya chikumangen cha Ukristu. (Zek. 8:23) Broshir Les Témoins de Jéhovah: Qui sont-ils ? Quelles sont leurs croyances ? ukutwish kutukwash kusal chinech. Mupana kud antu asu wilejina nau Bibil, ni kuyikasikesh kumutang. Chikwau kand, itekinap aminit akemp rubing ni rubing pa chisu cha dilejan mulong wa kwisambin dinans dimwing piur pa dirijek dia Yehova.
2. Mutapu ik ukutwisha kuyikasikesh in kwilej Bibil kwez ku yikumangan ya chikumangen?
2 Yikumangan ya Chikumangen: Mutapu wa kusambish ukatau kushiken antu tukata kwilej nau Bibil kusanger dirijek dia Nzamb udi kusutil kukumangan netu pamwing ku yikumangan ya chikumangen. (1 Kor. 14:24, 25) Chawiy lel, ukutwish kusambish kuyijidish nich yikumangan kusutil ku kuyirumburil yikumangan yitan tukata kusal pa rubing, chikumangan chimwing pa chisu. Isambina mutu wa mulong wa diskur dikulondula. Yileja mutu wa mulong ukushinshikinau ku Dilejan dia La Tour de Garde ni ku Dilejan dia Buku dia Chikumangen. Rumburil Shikol ya Mudimu wa Uteokras ni Chikumangan cha Mudimu. Anch ukwet chikunku cha kusutish ku shikol, pamwing ap ukutwish wachichirikinany nend pamwing. Isambina manans majim misambidinau ku yikumangan. Sadil yipich yidia mu mikand yetu mulong wa kuyikwash kuman yom yisadikina. Kudiosh kamu pa dilejan dia kusambish, yita kwez kukumangan.
3. Milong ik ya dirijek tukutwisha kwisambin?
3 Pa chisu cha Chivurikish, cha yikumangan ya munyimuku, ya pakampwil ni ya distrik ni cha kwez kwa kalam wa munyimuku, itekinaku aminit akemp chakwel kurumburil ni kuwejaku musangar mulong wa yitenchik yiney. Akul pakemp-pakemp ku yipul mud ey: Mulong wak ututazukinau anch Atuman a Yehova? Mulong wak tukata kutazuk ndond yetu ya kukumangen anch Yot ya Want? Midimu ik yikwetau amakurump nau ankwash a midimu? Mutapu ik urijekinau teritwar ni mudimu wa kulejan? Mutapu ik ukatau kubudish mikand yetu? Kwisu kudiokiling nfalang ja kwendish nich dirijek? Biro wa mutiy ni Chisak Chitakedina yikwet yisend ik mu kutakel mudimu?
4, 5. Mavideo metu makutwish nchik kukudish kusanger mulong wa dirijek?
4 Mavideo Mafundishina: Mutapu ukwau ukutwishau kuman antu twilejina nau Bibil dirijek dia Yehova dipandakena kuwap udi kusutil ku mavideo metu. Mavideo minam makutwish kuyisend ni kuyitwal Jusqu’aux extrémités de la terre, kuyijikish Toute la communauté de nos frères, ni kuyilej mutapu tudia Unis grâce à l’enseignement divin. Mband umwing wadinga ni kutambul magazet metu ni mikand yikwau mu chirung cha mivu yitan wadila pa kuman video Les Témoins de Jéhovah : un nom, une organisation. Ndiy washikena ku kukudish ruchingej mudiau Atuman eza ni kumwendil, pakwez kupwa kwa kutal video, ndiy wova anch ukutwish kutek kand ruchingej mu dirijek. Asambisha kamu kwilej nend Bibil, ni rubing ralondulap, ndiy wakumangana ku Chot cha Want.
5 Kusutil ku kwitekin aminit akemp rubing ni rubing pamwing ni in kwilej etu ni kusadil yom ya mudimu yitwinkinau, tukutwish kuyitwal pakemp-pakemp in kwilej Bibil ku dirijek dimwing kusu disadidilay Yehova nlel.