Tukudishany Ukaliweny mu Kutong Pamwing Nau Akwetu
1. Rusangu ik ra Bibil tusotila kushinshikin, ni mulong wak?
1 Diskur dia mupostol Paul ku sinagog mu Antiok wa ku Pisidia, mud muchifundilau ku Midimu 13:16-41, dipanin chilakej chiwamp cha mutapu wa kutong pamwing nau akwetu. Paul washinshikina mwikadil ni yitongijok ya in kumutesh end ni wambatanisha nich minsamb yend ya rusangu ruwamp. Patushinshikidina rusangu riner, tutongany mutapu tukutwisha kusal chilik chimwing mu mudimu wetu.
2. Yom ik twilejina ku mutapu wasambishay Paul diskur diend?
2 Kimb Chom Chijau Antu Avud: Ap anch uruu wa Paul wimena pa usey wa mudimu wa Yesu mu kuwanyish rutong ra Nzamb, Paul kasambishap diskur diend nich kujimbul dinans dined. Pakwez, walonda piur pa chom chadinga chijay pamwing nau in Yuda avud ading ni kumutesh—rusangu ra in Yuda. (Midimu 13:16-22) Chilik chimwing, tukwikal in kupukun ku michim ya akwetu anch twakimb kwijik chom chijau antu avud. Chinech chikutwish kwit anch tuyikasikesh kubudish yitongijok yau nich yipul ya manangu ni kutesh nakash chakwel kujingunin chidia cha usey nakash kud awiy.
3. Yom ik yasala anch chikala chikash kud in kumutesh Paul kwitiyij anch Yesu wadinga Mesia washilaumu?
3 Pisambinay rusangu ra in Yuda, Paul wayivurisha in kumutesh kushilamu kwa Nzamb kwa kulet Mupandish kudiokal ku dijuku dia David. Pakwez, in Yuda avud, ading achingejin chilabu wa usalay ukutwisha kudiosh mukol wa winyikel wa Rom ni kuzambwish muchid wa in Yuda piur pa michid yikwau yawonsu. Adinga ij kamu nawamp anch Yesu amulika kud amakurump a relijon a in Yuda mu Yerusalem, amupana mu makas ma anyikel in Rom, ni kumujip. Mutapu ik welay Paul kuyitiyish anch winou Ndiy wadinga Mesia washilaumu?
4. Mutapu ik watongay Paul nich manangu nau in Yuda amuteshanga?
4 Swimp Mulad wa Minsamb Yey: Chading chijay yitongijok ya in kumutesh, Paul wasadila Mifund mulong wa kutong nau pa dishin dia yom yasambelau kal kwitiyij. Chilakej, wamwijikisha Yesu mud mwan wa David ni mud muntu walejanau kud Yohan Mubatish, muntu wadinga ukwatinau kamu nakash mud muprofet wa Nzamb. (Midimu 13:23-25) Paul walejana anch mu kumulik Yesu ni kumufish nich rufu, amakurump a relijon “awiy awanyisha mazu minam [ma aprofet].” (Midimu 13:26-28) Kupwa, ndiy warumburila anch kwading atuman amana ni mes anch Yesu amulangwisha mu afu, ni wapwitina manangu mau ku mifund ya Bibil yading yijau yawanyina mu kuvumbuk kwa Yesu.—Midimu 13:29-37.
5. (a) Mutapu ik waswimpay Paul mulad wa minsamb yend chisu chalonday kud Agrek akumangana? (b) Mutapu ik tukutwisha kwimburij chilakej cha Paul chisu tulejena uman mu teritwar wa chikumangen?
5 Ku mutambu ukwau, chisu chalonday kud Agrek akumangana ku Aropagus mu Aten, Paul wasadila milad kushalijan. (Midimu 17:22-31) Pakwez, ndiy walejana uruu wa dishin wawiy umwing, ni mu mitapu yawonsu usu wend wabudisha yibudikin yiwamp. (Midimu 13:42, 43; 17:34) Chawiy chimwing nlel, tukutwish kuswapal kupukun ku michim ya antu mu mudimu wetu anch twakimb chom chijikena kud in kututesh ni anch twaswimp mulad wetu wa minsamb kulondulijan nich mwikadil ni yitongijok yau.