Malejan Matwadila ku Mwom
1 Chidi cha musangar mud ik pa kuman mes ma antu makat kuyengal povilau kurumburik kwa uyakin wa Dizu dia Nzamb! Kuyilej akwetu ronganyin ra Nzamb ni rutong rend mulong wa akaantu kuletin musangar chakin kamu. Malejan mud minam makutwish kumutwal muntu ku mwom wa chikupu.—Yohan 17:3.
2 Mulong wak Madi ma Usey Nakash: Nlel unou malejan amapanidin ku mitapu yawonsu yidiaku ni pa rusangu rawonsu rikutwishau kutongin. (Mul. 12:12) Pakwez, ronganyin mud riner rikutwishap kwisikan usey nich “midimu yikash ya Nzamb.” (Midimu 2:11) Ov, malejan mapaninau mu mangand matwishin kuyisejish akaantu in awonsu piswimp ni Sakatang ni kwijik rutong rend? Ov, mayikwashin antu kwijik yom yikata kushiken chisu tukata kufa ap mulong wak kudi mar mavud mwamu? Ov, mayinkishin antu ruchingej? Ov, makwashin kuwapish ditenchik dia dijuku? Ap pakemp. Kusutil ku malejan ma Nzamb kwawiy tukutwishina kutan yakul yakin ku yipul yiney ya usey nakash ya mwom.
3 Malejan ma Nzamb mapanin chom chimwing chiburedina mu mangand ma nlel unou—kukudish yaku yiwamp. Dizu dia Nzamb didioshin katond ka chikit, katond ka michid, ni katond ka wanangand mu michim ya antu itiyijina malejan ma dizu dined ni kumasadil. (Heb. 4:12) Diayibachikin antu kulik mutapu win wawonsu wa chisum ni ‘kudjal ayinau untu usu.’ (Kol. 3:9-11; Mike 4:1-3) Chikwau kand, malejan ma Nzamb mayinkin kal tutikit twa antu usu wa kupandakan yisalijok yiyimp yajika kal mij ni yaku yikisinay Nzamb.—1 Kor. 6:9-11.
4 Mulong wak Madi ma Kuswapej Katat: Mulej wetu Mujim utubabeshin piur pa kurumburik kwa yisu tushicha. Dirumburish diend dia uprofet dikwet rusangu ra katat tufanyidina kulejan pa mangand mawonsu. (Kuj. 14:6, 7) Kristu uyikedil mwiur, want wa mangand wa relijon wa makasu akuushesh katat kamu ak, ni Want wa Nzamb udi piswimp ni kushesh maguvernema mawonsu ma mangand. (Dan. 2:44; Kuj. 11:15; 17:16) Mwamu, chidi cha kuswapej mulong wa antu kwijik Mwant uyikedila wa Nzamb, kudiokal mu Babilon Mujim, ni kutazuk pa dijin dia Yehova nich ritiy. (Kus. 2:11, 12; Rom 10:13; Kuj. 18:4) Twipanany amboku pichitwishikina mu kuyilej akwetu malejan matwadila ku mwom.