Kudish Yaku Yiwamp ya Muspiritu, Utambul Yiyukish Yivud
1. Mulong wak chidi cha usey kushinshikin chaku chey cha muspiritu?
1 Chisu wikala kamu mwin Kristu, wasala usu nakash wa kukudish mu mwom chaku cha kusal mijikit ya muspiritu yitina kwilej Bibil, kukumangan ku yikumangan ya win Kristu, mudimu wa chingand, ni kulembil. Mud chibudikin Yehova wayukisha usu wey, ni wakasikesha urund wey ni Yehova. Katat pamwing ap kwasut kal mivu kanang kudiosh kwakubatishinau. Ov, udandamedin nich yaku yiwamp ya muspiritu yiwakudisha kudiosh wikal mwin Kristu?
2. Mutapu ik tukutwisha kutaninamu kusutil ku kutang Bibil dichuku ni dichuku?
2 Shinshikin Chaku Chey: Ov, ukwet chaku cha kutang Dizu dia Nzamb dichuku ni dichuku? Tukat kutambul yiyukish yivud mu kusal mwamu! (Yos. 1:8; Kus. 1:2, 3) Mu Isarel wa pasak, mwant mwawonsu wading ufanyidin kutang mu mukand wa Chijil “machuku ma mwom wend wawonsu.” Nich kutaninamu ik? Mwant wading ufanyidin kukudish muchim wa kwikepish ni kwilej kumwov Yehova wom ni kulik kubwambwil ku yijil Yend kuya ku mutambu ukwau. (Kuv. 17:18-20) Chilik chimwing nlel, kutang Bibil dichuku ni dichuku kutukwashin kwikal ayingila ni akad milong mu mangand minam mayimp, mijondila. Bibil utukwashin kand chakwel kwikal akwatikena nakash mu kusal mudimu.—Filip. 2:15; 2 Tim. 3:17.
3. Yiyukish ik tutanidinamu kusutil ku kukumangan ku yikumangan pakad kujing?
3 Yesu wading ni chaku cha kuya mu sinagog, mwi ndond mwadingau ni kwambambin piur pa Mifund. (Luka 4:16) Chakin anch chinech chamukasikesha chakwel kurish nich yoziu. Niyetu tudi akasikeshinau kusutil ku malejan ma muspiritu mapaninau mu yikumangan ya chikumangen ni ‘kwongojijan Kuwamp kukasikeshina.’ (Rome 1:12) Kukumangan pamwing nau akadivar netu kutukwashin kujijaman ku mar ma machuku minam ma nsudiel. (Heb. 10:24, 25) Ov, uchikwet ni katat chaku cha kukumangan ku yikumangan yawonsu?
4. Mutapu ik tukutwisha kutaninamu kusutil ku kulejan mu chingand rubing ni rubing?
4 Jinsangu jidia mu Bibil jitulejin anch atwimbuy adinga ni kulejan rusangu ruwamp ‘pichuku pichuku mu chikumbu cha Nzamb ni mu yikumbu ya antu.’ (Mid. 5:42, Manswik Masu) Ap anch tukutwishap kulejan dichuku ni dichuku, ov, tukutwish kwikal ni chaku cha kulejan mu mulad kanang rubing ni rubing? Kusutil ku kusal mwamu, tukutwish kwikal ankaliweny mu kurumburil Dizu dia Nzamb, ni tukez kuman yom yikasikeshina mu kuyilej antu akwau uyakin wa Bibil.
5. Mulong wak chidi cha usey kumulembil Yehova pakad kujing?
5 Muprofet Daniel amuyukisha kamu nakash mulong wa kumusadil Yehova nich “kujijaman” mu mwom wend wawonsu. Ndiy wadinga kand ni chaku cha kumulembil Yehova pakad kujing. (Dan. 6:10, 16, 20) Chilik chimwing, anch pakad kujing twamulembil Yehova malembil madiokila ku muchim, ukutuyukish ni kutwinkish spiritu wend utumbila. (Luka 11:9-13) Yehova ukwikal kand piswimp ni yetwetu, ukusal anch twikala nich urund wa piswimp ni ndiy. (Kus. 25:14; Yak. 4:8) Chiyukish chijim mud ik! Chawiy lel, tusalany usu chakwel kulam chaku chiwamp cha muspiritu ni kutambul yiyukish yivud yidiokila kud Yehova.