Yom ik Utekining pa Ndond ya Kusambish?

¹ Mutapu ik ukwakula ku chipul chinech? Chakin, etu awonsu tusotining kutek yisakin ya Want pa ndond ya kusambish. (Mat. 6:33) Pakwez tuwapidil kwiyipul anch, ‘Ov, kutond kwam nikata kutond kumekeshin anch nitekin yisakin ya Want pa ndond ya kusambish?’ Bibil utukasikeshin anch: “Ipakany en ayinen.” (2 Kor. 13:⁠5) Mutapu ik tukutwisha kwipak anch tutekin Want pa ndond ya kusambish?

² Chisu Chetu: Tukutwish bil kusambish nich kushinshikin mutapu tukata kusadil chisu chetu. (Ef. 5:​15, 16) Asaa inch tukata kusal rubing ni rubing mu kuyawol ku misambu, mu kutal televizion, kukimb ya kukimb pa Internet, ap mulong wa kwipuwangesh? Anch twafund uvud wa asaa tukata kusal mu yom yiney ni kuyisikej nich uvud wa asaa tukata kusal mu mijikit ya mu spiritu, tukutwish kamu kushimok nakash. Ov, tusadining asaa avud ku mudimu wetu mu chilik cha kudiburil mudimu utumbila chakwel tutwisha kwikal nich mwom umwing uwamp nakash? Tupamp twinch tukata kujing ku yikumangan ap mu mudimu wa kulejan kwisudiel kwa rubing mulong wa kuya mu kwipuwangesh?

³ Itekina Yom ya Usey: Avud pakach petu kakwetap chisu chifanyidina mulong wa kusal yawonsu yisotilau. Chawiy lel chakwel kutek yisakin ya Want pa ndond ya kusambish, tufanyidin kwitekin yom ya usey mu mwom wetu ni kusal program wa ‘yom yipandakena usey.’ (Filp. 1:10) Mu yom yiney mudi kwilej Dizu dia Nzamb, kulejan rusangu ruwamp, kubangin maswir ma dijuku, ni kukumangan ku yikumangan ya Ukristu. (Kus. 1:​1, 2; Rome 10:​13, 14; 1 Tim. 5:8; Heb. 10:​24, 25) Mijikit yikwau, mud masengan ma mujimbu ni kwiswedish, yidi ya ukwash. (Mako 6:31; 1 Tim. 4:⁠8) Pakwez yom yiney ya usey ukemp yifanyidin kwikal pa ndond yifanyidina.

⁴ Mukadivar umwing nsand wasota kutek yisakin ya Want pa ndond ya kusambish pasambishay mudimu wa chisu chawonsu pa ndond pa kwilej shikol yilemp chakwel kwirijek mulong wa kutan mudimu wa ku mujimbu wa nfalang jivud. Ndiy wileja rudim rikwau ni wasokina kwi ndond kwadinga kuswir kujim. Ndiy walonda anch: “Nikwet chisu chimwing chiwamp nakash cha mwom wam kunoku. Mudimu wa kulejan ukasikeshin kamu nakash! Nisotin kamu anch nsand mwin mwawonsu asala mudimu mud winou ni kuman yinimena. Kwikil chom chipandakenamu kuwap mud kumusadil Yehova nich yawonsu tukweta.” Chakin, kutek yisakin ya Want pa ndond ya kusambish kukat kutuletinang yiyukish, pakwez chidia kand cha usey, kukat kumusangaresh Tatukwetu wa mwiur, Yehova.​—⁠Heb. 6:⁠10.