Dandamenany “[Kusongish] Mabuj Mavud”
1 Chalondangay mu yishimu, Yesu wifanikesha amwinend nich nviny yakin, Tatukwend mudi Nfachingand, ni in kwilej end azizidilau many mudi mitiy yisongina mabuj ma nviny. Parumburilay mudimu wa Nfachingand wa chifanikesh, Yesu wakasikeshina usey ujim wa kulamat dang kwi nviny. (Yohan 15:1-4) Dilejan didi anch muntu mwawonsu udia murund wa piswimp wa Yehova ufanyidin kwikal mudi mutiy usongina mabuj wa “nviny wakin,” Yesu Kristu. Tufanyidin kudandamen kusong nakash “mabuj ma [s]piritu” ni mabuj ma Want.—Gal. 5:22, 23; Mat. 24:14; 28:19, 20.
2 Mabuj ma Spiritu: Tukutwish kwisik kuya kwetu kurutu mu spiritu ku chilik chitumekeshina mabuj ma spiritu. Ov, usadin usu wa kukudish mabuj ma spiritu wa Nzamb kusutil ku kwilej ni kutongijokin pa Dizu dia Nzamb? (Filp. 1:9-11) Kangal widjidjek kulembil mulong wa spiritu utumbila, ukutwisha kukusal ey usonga ngikadil yikat kumushiman Yehova ni yikutwisha kukukwash kudandamen kuya kurutu mu spiritu.—Luka 11:13; Yohan 13:35.
3 Kukudish mabuj ma spiritu kukez kutukwash kand kwikal in kulejan nich mushiku ukash. Chilakej, rukat ni ritiy yitubachikin twitekina chisu mu program wetu mukash chakwel tusala mudimu wa kulejan pakad kujing. Ngikadil mudi chisambu, kushimpish muchim, kuwap, kwitudish, kwishitul yitukwashin kuyakul akankuny netu nawamp. Musangar ututwishishining kutan mazang mu mudimu wa kulejan ap pa chisu chilikinau antu kwitiyij.
4 Mabuj ma Want: Tusotin kand kusong mabuj ma Want. Mu mabuj minam mudi kupesh “yakupesh ya kushiman kudiay Nzamb machuku mawonsu mulong wendendiy, charumburik anch, mabuj ma ku milamu yikata kwitiyil ku dijin [dia Yehova].” (Heb. 13:15) Mwamu tusadil nich mushiku ni kwiman dang mu kulejan rusangu ruwamp. Ov, usadil usu wa kusong mabuj mavud ma Want kusutil ku kukudish mudimu wey wa kulejan?
5 Yesu walonda anch in kwilej end ashinshamena akez kasong uvud wa mabuj kushalijan. (Mat. 13:23) Chawiy lel, tufanyidinap kwiyilikej ni antu akwau, pakwez tufanyidin kumwinkish Yehova yipandakena kuwap yetu. (Gal. 6:4) Kwishinshikin nich kashinsh mikadil yetu ayinetu kwambatan nich yilondina Dizu dia Nzamb kukez kutukwash kudandamen kumushiman Yehova kusutil ku “[kusongish] mabuj mavud.”—Yohan 15:8.