Yinkishany Atuzwendj Ruchingej
1 Yesu wayibangina pakampwil antu adinga atuzwendj. Pa yisu yimwing wasala yilay ni wayinkisha yakudia ya ku mujimbu ni wayoka ayej, pakwez diloz diend diadinga kuyilej atuzwendj “katumb kawamp.” (Mat. 11:5) Nlel unou, mudimu wa Ukristu udandamedin mulong wa kuyikwash atuzwendj ni antu akwau.—Mat 24:14; 28:19, 20.
2 Ruchingej Rakin: Amakurump a Kristendom akat chisu ni chisu kuyishilamu atuzwendj anch, akwikal ni nfalang jivud anch alambul milambu yivud ku egliz. Pakwez, Bibil ulejen anch ching Want wa Nzamb kusu wawiy ukeza kupwish uzwendj ni kupwish milong yawonsu yirishinau nich antu. (Kus. 9:18; 145:16; Is. 65:21-23) Kusutil ku kuyilej atuzwendj yifundishinay chakin kamu Bibil, tuyinkishin ruchingej ni tuyikwashin awanyish maswir mau ma mu spiritu.—Mat. 5:3.
3 Afaris pa chirung cha Yesu adinga ni kuyidiul atuzwendj, ni kuyel nich chibeng anch “‘am-ha·’aʹrets,” ap “antu a ngand.” Pakwez, Yesu wamana anch “mash mau,” ap mwom wau, udi wa “usey.” (Kus. 72:13, 14) Tukutwish kumwimburij Yesu ni ‘kuyovil riy’ atuzwendj inay mu kuyanaken ni kuyibangin mu milong yau. (Jinsw. 14:31) Kitufanyidinap kuyiswingish atuzwendj tusulangena nau ap kuyidiul ni kulik kuyilej uman. Antu avud itiyijina rusangu ra Want ading atuzwendj.
4 Yikwashany Katat: Pituyilejina atuzwendj adia mu teritwar wetu malejan ma yijidik ma Bibil, tuyikwashany kand adiula yibudikin ya uzweny ya katat. Chilakej, Bibil ulikishin kukwachik maar, masengan ma nfalang, usweral, kuna ruwand, ni yisal yikwau yiletina uzweny. (Jinsw. 6:10, 11; 23:21; 2 Kor. 7:1; Ef. 5:5) Bibil utukasikeshin win kashinsh ni kusal “ni muchim umwing,” ngikadil yiyitinau antu asadila mudimu. (Kol. 3:22, 23; Heb. 13:18) Chakin, mu dilejan dimwing antu avud a mudimu “ajimbula win yakin ni kushinshaman mudi ngikadil yiyishimokishina nakash pakatau kukimb antu a mudimu.”
5 Yehova ukat kubangin mar ma atuzwendj. Katat kamu ak Yesu Kristu ukumukamunin “chimana mar pakudilay.” (Kus. 72:12) Djat ni ilel unou, tukwet chisend cha pakampwil cha kuyikasikesh antu akwau, pamwing ni kazwendj, nich uruu wa Bibil wa ruchingej.