Mutapu wa Kurijek Chikumangan cha Mudimu
1. Chikumangan cha Mudimu chikweting rutong ik, ni mutapu ik tukutwisha kutaninaku?
1 Chikumangan cha Mudimu achitenchika mulong wa kutwikadish in kulejan ayifuvu. Akasikeshidin pa kulejan rusangu ruwamp ra Want, kwikadish in kwilej, ni kulejan dirumburish dia Nzamb diashejina kal piswimp. (Mat. 28:20; Marko 13:10; 2 Pita 3:7) Tukat kutaninaku nakash ku chikumangan chinech cha usey anch twirijek nawamp ni anch twikal tayad mulong wa kwakul.
2. Ov, mutapu ik tukutwisha kwirijek mulong wa kutesh diskur?
2 Diskur: Mwin kulond amulejining musul wa yom yikusalay mu diskur mu program. Ukutwish wilej malejan mey, pamwing nich maverse majimbwilau, ni ukutongijokin pa mutapu ukutwishay kumasadil mu mudimu wey.
3. Chom ik tufanyidina kusal pitwirijekina mulong wa minsambu ya yipul ni yakul?
3 Minsambu ya Yipul ni Yakul Nau in Kukumangan: Chikunku chinech achisadiling chisu chivud mudi pitwilejininga Chinong cha Kalam, nich mazu makemp ma kusambish nich ni ma kupwish nich. Tek kashony pa milong yijim mu paragraf ni paragraf, ni yirijeka mulong wa kupan yakul yinswimp ya manangu.
4. Ov, mutapu ik tukutwisha twirijek mulong wa minsambu nau in kukumangan?
4 Minsambu nau in Kukumangan: Chikunku chinech chifanyidin kuchisal mudi diskur, pakwez mwin kulond ukwipul chakwel antu amwing akumangena akula. Anch watek kashony pa milong yijim ni kushinshikin maverse, ukutwish kwakul pa chisu chikwipulau yipul. Mukadivar ukusala chikunku chinech ukusal usu wend wawonsu chakwel in kukumangan niyawiy abudisha milong yijim.
5. Chom ik chikutukwasha tutaninamu nakash mu yakumenaku?
5 Yakumenaku: Yikunku yimwing yikweting yakumenaku mulong wa kulejan mutapu wa kusadil malejan mitwileja kal mu teritwar wetu. Chitwishikin kuyit amakurump, in kulejan akweta ronganyin ap ayibol chakwel ayisala. Pa chisu urijekina chikunku chinech ukutwish kand watongin pa mutapu ukutwishau kuchisal. Anch wasalany chakumenaku chilondwila mazu ma kusadil, tongin pa mutapu ukutwisha kumasadil ni kumambatanish kulondulijan ni muntu ni muntu ukutana ku chikumbu. Shinshikin anch ukwet mukand ap gazet usadilau mu chakumenaku. Pa chisu cha Urel wa Difukwil dia mu Dijuku, ukutwish wamanany anch chidi cha usey kwiyijidish mazu minam mamwing ma kusambish nich.
6. Misu mayingishin mamwing ma kurijek Chikumangan cha Mudimu?
6 Chikumangan cha Mudimu tukutwish twachisanger nakash ching anch twirijek ni kusambel kutongijokin malejan mawamp makulejanau. Kusal mwamu kukushikij ku chibudikin chijim cha kwongojijan. (Rome 1:11, 12) Anch twitekin chisu cha kurijik Chikumangan cha Mudimu, tukez kwikal ayifuvu pa mulong wa kuwanyish mudimu wetu.—2 Tim. 3:17.