Irijekany Nawamp Mulong wa Kulejan
1. Mulong wak tufanyidin kwasin pa kukudish kusanger pitutakedila dilejan dia Bibil?
1 Pitutakedila dilejan dia Bibil, tufanyidin twirijeka nawamp anch tusotin tumukwasha mwin kwilej ashikena ku kumusadil Yehova. Tufanyidin tusala usu chakwel asangera uyakin udia mu Bibil. Chawiy chom chikeza kumubachik mwin kwilej. (Kuv. 6:5; Jinsw. 4:23; 1 Kor. 9:26) Mutapu ik tukutwisha kusal mwamu?
2. Malembil makwet usey ik mu kwirijek kuwamp?
2 Lembil Kurutu kwa Kwirijek: Yehova ndiy ukata kupamish mbut ja uyakin mu muchim wa mwin kwilej, chidi komb chiwamp tusambisha nich malembil pitwirijekina mulong wa dilejan pakampwil mulong wa mwin kwilej ni mulong wa maswir mend. (1 Kor. 3:6; Yak. 1:5) Malembil minam makutwish kand matukwash kujingunyin mutapu tukutwisha kumukwash nakash chakwel izwisha mu muchim wend “ronganyin” rakin ra rusot ra Yehova.—Kol. 1:9, 10.
3. Mutapu ik tukutwisha kwirijek nich kumutongin mwin kwilej?
3 Mutongina Mwin Kwilej: Yesu wadinga wij anch mu kulejan kuwamp mudi ni kuyitongin in kukutesh. Amwipula Yesu chipul chawiy chimwing tupamp twaad anch: “Nikasala ik pakuswan kupand kwa chikupu?” Kapamp ni kapamp pakulay, wakula mu mutapu windjing. (Luka 10:25-28; 18:18-20) Tufanyidin kumutongin mwin kwilej pa chisu twirijekina. Verse ik wa Bibil tukutanga nend? Maparagraf minch mitufanyidina kwilej? Manans ik madia mu dilejan makutwisha kumukasiken mwin kwilej kutesh ap kumitiyij swa? Anch twasambel kutongijokin kurutu kwa chisu yipul yimwing yikutwishay kwipul, tukwirijek nawamp mulong wa kumwakul.
4. Yom ik yikwau yidia mu kwirijek nawamp?
4 Chirikin Malejan: Chikalap nchik tupamp twilejina kal malejan minam mu machuku masutina kal, pakwez kudi mwin kwilej kadi kapamp ka kusambish kakwilejay yom yiney. Anch tusotin tuupukuna muchim wend, chidi cha usey twirijeka mulong wa dilejan ni dilejan. Chirumburikin anch tufanyidin tusala yitumukasikeshina mwin kwilej asala. Chirikin malejan, pamwing ni mifund yijimbwilau, nich kumutongin mwin kwilej, ni pamwingap kutek kashony pa manans ma usey nakash.—Rome 2:21, 22.
5. Mutapu ik tukutwisha kumwimburij Yehova?
5 Yehova usangaredin nakash kuya kurutu kwa mwin kwilej Bibil umwing ni umwing. (2 Pita 3:9) Anch twitekin chisu cha kwirijek mulong wa dilejan ni dilejan dia Bibil, tukumekesh kubangin kwa rukat kwa chilik chimwing.