Wirijekin kal Kuya ku Shikol?

1. Mitapu ik yiwamp yikuchingedinany piukusambishanya kuya ku shikol?

¹ Ap anch wawiy muvu wey wa kusambish kuya ku shikol, ap anch udi muvu wey ukwau wa kudandamen nich shikol, en ansand in Kristu ukat kurishany nich milong ni yakamish yisu. Pakwez ukwetany kand mitapu yiwamp ya “kulejan uyakin.” (Yoh. 18:​37, MM) Ov, wirijekin kal nawamp mulong wa kulejan uyakin?

2. Wirijekin kal mu jinjil ik kurutu kwa kuya ku shikol?

² Chakwel kukukwashany utwishany mu mwom, Yehova wakufumbinany kal nakash, kusutil kudi anvaj en, ni kusutil kudiay kashalapol ushishamena ni kubabal. (Jinsw. 1:8; 6:20; 23:​23-25; Efes 6:​1-4; 2 Tim. 3:​16, 17) Pakwez katat kiwijanyap milong yikuchingedinanya ku shikol yen. Chakufumbinanyau kal kudi Nzamb ni kwijik yom yisadikininga ku shikol, irijeka mulong wa kulejan uyakin. (Jinsw. 22:⁠3) Tang nakash muchim pa malejan ni yiyul ya ukwash yidia mu Mifund yisambidinau mu mavolim mawonsu maad ma buku Les jeunes s’interrogent pamwing ni mitu yikwau yambatena nich yipalangeshinau chisu ni chisu mu Réveillez-vous !

3. Mu jinjil ik ukeza kutwish kulejan uman?

³ Teritwar wey wa pakampwil ukukutwishish ulejana uman mu mitapu kushalijan. Anch akwen aman mutapu wey wa kudjal uwamp, wa kwileng ni kwikil, mashakamin ni kulond kwey, mutapu uyilimishina akwen ansand a shikol ni alej, ni mapwe ukwatina, ni aman anch ukwet mufulandal ukash mu mwom, amwing akutwish akwipul anch: “Mulong wak ey udi mwamu?” (Mal. 3:18; Yoh. 15:19) Chikutwish chikal chawiy chisu cheyey cha kulejan uman ni kurumburil yitiyij yey. (1 Tim. 2:​9, 10) Mu kusut kwa muvu, ukez kurish nich milong mudi misambu ya an a ngand ni ya machuku matumbila. Anch akwipul ang mulong wak kiukatap kuyisal, ov, ukulond anch: “Relijon wam winlikishin; Am nidi kaman wa Yehova,” ap anch, ukez kusadil chisu chinech mulong wa kulejan uman piur pa Tatukwey mukarukat, Yehova? Kwirijek kuwamp mwinshin mwa umutakel wa Yehova kukez kukukwash uyileja uman kudi alej ey, akwen ansand a shikol ni antu akwau.​—⁠1 Pita 3:⁠15.

4. Mulong wak uchingejidina anch ukusutish muvu uwamp ku shikol?

⁴ Ap anch ukwiyakamishaku pa kuya ku shikol, ijik anch kudi avud akukwashina asotina anch upandakana mu muvu wey uyila ku shikol. Chikwau, tukusangaredin mulong wa mitapu yiukweta ya kuyilej uman antu akwau adia mu teritwar wey wa pakampwil. Chawiy lel, jijaman ni irijeka chakwel uya ku shikol!