‘Ipana ni Muchim Wey’ Kudi In Kwilej ey a Bibil
1. Chom ik chifanyidina chakwel kukwash mwin kwilej Bibil?
1 Chakwel umukwasha mwin kwilej wey wa Bibil ipana, kudi yom yivud ya kusal pamutu pa kutakel kusu dilejan dia Bibil. Kambuy Paul wisika mashakamin mend mawamp ni antu alejanangay mudi nvaj wa rukat wamwishina mwanend. Ni yetu kand tusangaredin kwipan “ayinetu” chakwel tuyikwasha in kwilej etu a Bibil akula muspiritu.—1 Tes. 2:7-9, MM.
2. Mulong wak tufanyidina kumekesh kubangin kwa panretu, ni mutapu ik tukutwisha kukumekesh?
2 Mubangina Panrey: Pa chisu chisadilay mwin kwilej Bibil yom yilejinay , kom kend kakumulej swa chakwel alika urund ni antu akad kusadilang mbil jidia mu Bibil. (1 Pita 4:4) Pamwingap dijuku diend dikutwish diamutun. (Mat. 10:34-36) Tufanyidin kumubangin ni muchcim wetu wawonsu chakwel yimushikija ku kuman rukat ramukishau kudi in dijuku diend. Mishoner umwing chifuvu ulondil anch: “Chifanyidinap kuswapal kuya swa anch wapwishany kwilej. Anch chitwishikin, ukutwish washalaku ka chikunku chakwel wambambaku ni mwin kwilej wey.” Ikala tayad chakwel umukwasha mwin kwilej wey. Chilakej, ukutwish kumutazuk ku telefon ap kuya kumutal pa chisu chiyedinay. Ukutwish kushakam ni mwin kwilej wey wa Bibil mu yikumangan pamwing ni kumukwash kulam anend anch chifanyidin.
3. Ov, mutapu ik tukutwisha kumukwash mwin kwilej Bibil wetu chakwel atambul dikasikesh didiokila ku chikumangen?
3 Ukwash wa Chikumangen: Anch udi piswimp ni chikumbu cha mwin kwilej wey wa Bibil pa chisu udia mu mudimu wa kulejan, ufanyidin kumutalaku kachisu kiswimp chakwel umwijikish kudi ambay ney a mudimu. Pa chitwishikina, ku chisu ni chisu, ukutwish kwit in kulejan ashalijadina, ni amakurump, chakwel akutwalaku mulong wa kwilej. Chikwau, anch kwilej kwen kudandamedin nawamp, mukasikesha mwin kwilej wey wa Bibil chakwel ayangang ku yikumangan yisadikina ku Chot cha Want. Kusal mwamu kukez kumukwash kwinung ni chisak cha yid ya chikumangen yikeza kwikal dijuku diend dia muspiritu.—Marko 10:29, 30; Heb. 10:24, 25.
4. Mutapu ik mushiku wetu ukutwisha kututanyish yibudikin yiwamp?
4 Nvaj wakad kuziy kuyikwash anend muspiritu ukutambul musangar uvud payimenay akwat mupak wa kumulamat Yehova ni kwend mu uyakin. (3 Yoh. 4) Tukutwish twatan musangar umwing anch twipan ni muchim wetu wawonsu chakwel tukwasha in kwilej etu a Bibil.